لم يلمسني أو يتحرش بي.. أقوال الفنانة هلا السعيد حول سائق أوبر في تحقيقات النيابة

بدأت محكمة جنح الشيخ زايد، منذ قليل، أولى جلسات محاكمة سائق أوبر المتهم بمحاولة التحرش بالفنانة هلا السعيد.
قال المستشار علي فايز محامي المتهم ان النيابة لم توجه للمتهم تهمة التحرش طبقا للتحقيقات وتحريات الأجهزة الأمنية التي اكدت عدم تحرش المتهم بالفنانة هلا السعيد وهو ما أكدته أيضا الفنانة خلال التحقيقات قائلة: "هو ملمسنيش خالص".
قالت الفنانة هلا السعيد في تحقيقات النيابة العامة: اللي حصل ان انا كنت نازلة من بيتي علشان كنت رايحة مشوار في مدينتي وساعتها طلبت أوبر عربية علشان توصلني لمدينتي، وفعلًا التطبيق جبلي العربية ماركة بي واي دي فيراني اللون واسم القائد السيارة مصطفي وهو ده اللي قبل الطلب وجالي عند بيتي في سوديك وركبت معاه وساعتها متكلمش معايا خالص ولقيته ماشي وواخد طريق محور الضبعة علشان يوديني لمدينتي.
وأضافت هلا السعيد: فجأة وانا راكبة معاه خلال سبعة دقائق لقيته هدي بالعربية وراح راكن علي جنب وساعتها سألته انت وقفت ليه راح قايلي علشان فيه عطل في العربية وقالي ان الطرمبة سخنت، ولقيته نزل من العربية وراح لافف ناحية الشنطة وفتح شنطة العربية وساعتها سمعت صوت خبط في شنطة العربية فانا حسيت ان هو بيجيب حاجة منها.
فلفيت علشان اشوف هو بيعمل إيه فلقيت حزام وزرار بنطلونه مفتوح وكان حاطت ايده علي عضوه الذكري معرفش هو بيعمل ايه، وانا ساعتها خوفت منه علشان الطريق كان مقطوع والمشاكل اللي بتحصل اليومين دول روحت فاتحة باب العربية ونزلت أجري نحو 2 متر لورا تقريبًا وساعتها فضلت اشاور للعربيات علشان حد يقفلي بس محدش وقفلي.
واستكملت: هو لما لقاني عماله اشاور واستنجد بالناس راح قافل بنطلونه وراح قايلي انتي خايفة من ايه انا مش هعملك حاجة اركبي معايا وانا هوصلك خلاص ومتخافيش انا مش هعملكك حاجة بس انا مردتش اركب معاه وراح واقف اتبول في الشارع علشان انا عندي سكر ولازم كل شوية أفك مية.
وراح قايلي انتي فيه حد جايلك قولتله ايوه فقالي خلاص انا هفضل واقف لحد ما الشخص اللي جي يجيلك لقيته راح منزلي شنطي من العربية وحطها في الشارع ولقيته ساعتها فضل واقف حوالى دقيقة وراح واخد بعضه وماشي ولاغى الريكوست على اوبر.
وساعتها روحت صورت نفسي بموبيلي عشان اثبت الواقعة وبعديها السواق اللي كان جيلي جه ووصلني للبيت وبليل يومها روحت على قسم ثان الشيخ زايد وعملت المحضر وهناك قالولي اطلعي بكرا على النيابة علشان أقول اقوالى وهو دا كل اللي حصل.