ميمي جمال:" والدتي كانت رافضة جوازي من حسن مصطفى.. وكان ساند ضهري وطفل كبير"

حلت الفنانة ميمي جمال، ضيفة في برنامج "معكم" الذى تقدمه الإعلامية منى الشاذلى على قناة Cbc، وكشفت عن مواقف لا تنساها لزوجها الفنان حسن مصطفى ومدى غيرتها عليه.

كيف تزوجت ميمي جمال من الفنان حسن مصطفى ؟

قالت ميمى جمال، "والدتي كانت رافضة عشان كان أكبر منى ب 14 سنة، وكان أصلًا متجوز قبل كده وكان عنده بنت اسمها سمية".

وتابعت ميمي جمال: "اصريت على الزواج منه لأني ارتحت له جدًا، ولأن والدي توفى وأنا صغيرة ومحستش بالأبوة والحضن الدافي، وحسن كان بالنسبة ليا هو ده وكان بيسمعني لما اشتكيله وكنت مسنودة صح، وبقى عندي أمي وجدتي بس حسن اللىيساند ضهري، وقلتلها وقتها أنا مش عاوزة رجل غني ولا منتج عشان ينتج أفلام زى بعض الزميلات، أنا ببص لراحتي وحسن مصطفى قدر يعمل ده".
ما أبرز مواقف الفنان حسن مصطفى مع ميمي جمال وأسرته؟

قالت ميمي جمال: "حسن مصطفى كان زوج كويس جدا وافتكر موقف يوم فرح نورا بنتنا، وأنا عارفة إنه جامد، بس وقت ما نورا وهى عروسة بدأت تمشى هي والعريس ببص عليه اشوفه فين لقيته واقف على جنب وبيعيط، بس هو مش بيحب حد يشوف دموعه، وحسيت قد إيه هو طفل كبير".
كيف حافظت ميمي جمال على علاقة حبها بالفنان حسن مصطفى؟

كما روت ميمى جمال موقف حول فتاة حاولت التقرب منه، قائلة: "الفنانين الكبار في السن بيكون في حواليهم بنات كتير بيرقصوا في الأفلام وكده، وفى فترة كانت في بنت معجبة بسعيد صالح، ولقينا واحدة تانية بتحاول تعمل حركات على حسن مصطفى، وفي مرة جت من ضهره وهو في غرفته بيعمل مكياج وحطت إيدها على كتفه وقالتله شوفت أنا عاملة حروف اسمك على ضوافري ازاي، وطبعا هو انبهر".

وتابعت ميمي جمال،"ولاد الحلال كلموني وكنت وقتها بعمل مسرحية في القاهرة وهو في الإسكندرية، وحكولي على اللى حصل، وسافرت في تاكسي على طول وروحت على بيت والدتي وانتظرته واتاخر لأنها طلبت منه يوصلها، والصراحة كنت زعلانة ومتغاظة ولما رجع واجهته وقلتله وصلت المدام وهو من النوع اللي مش بيعترف ويحب ياكلك بالكلام، ووقتها قلتله أنا جاية عشان أقولك عيب واحنا مش صغيرين، والمركب مش هتغرق عشان احنا مخلفين ولاد وأنا ست عاقلة ومش هتكلم وياريت تحطه في دماغك وميتكررش".
ما هي أخر أعمال ميمي جمال ؟

يذكر أن الفنانة ميمي جمال شاركت مؤخرًا في موسم دراما رمضان في مسلسل "علاقة مشروعة"، وهو من بطولة ياسر جلال ومى عمر وداليا مصطفى ومراد مكرم، بسنت شوقى، عفاف مصطفى، ياسمين رحمي، عمر رزيق، محمود فاروس، جودى مسعودى، كريم محجوب، نهال نور، وردشان مجدى، وعدد آخر من الفنانين، والعمل من تأليف سماح الحريرى وإخراج خالد مرعى وإنتاج مشترك بين شركتى "Forever Drama - مها سليم" و"media Hub – سعدى جوهر".

تدور أحداث المسلسل حول عمرو (ياسر جلال) المتزوج من عاليا (داليا مصطفى) ويعيشا حياة مستقرة مع ابنائهما، ويتورط عمرو في علاقة مع بثينة (مى عمر) - الزوجة السابقة لشريكه وصديق عمره أمجد (مراد مكرم) ويضطر للزواج منها سرا، وإخفاء الأمر عن زوجته الأولى عاليا، ومع تتطور الأمور حيث يجد عمرو نفسه في حيرة بين أمجد وبثينة وعاليا، وعليه اتخاذ قرارا صعبا لمواجهة ما يحدث.