ميمي جمال: " بحس إن التكريم كإن حد بيطبط على كتفك.. وحفيدي هو اللي جرجرنى للتيك توك "

حلت الفنانة الكبيرة ميمي جمال، ضيفة في برنامج معكم والذى تقدمه الإعلامية منى الشاذلى على قناة Cbc، وتحدثت عن عودتها للتمثيل مرة أخرى بعد غياب سنوات ومعاناتها بعد وفاة زوجها وتكريم مهرجان الزمن الجميل.

كيف كان شعور ميمي جمال بعد تكريمها بمهرجان الزمن الجميل في لبنان؟

تحدثت ميمي جمال عن تكريمها بمهرجان الزمن الجميل في لبنان، قائلة: "بحس إن التكريم وكأن حد بيطبط على كتفك وبيقولك شكرا على المشوار الطويل اللى تعبت فيه، فكنت فرحانة وهى حاجة ملهاش عمر محدد، والإنسان ممكن يتقاله شكرا في أى وقت".
لماذا عادت ميمي جمال للتمثيل بعد غياب سنوات؟

وعن عودتها للتمثيل قالت ميمي جمال: بعد وفاة زوجى الفنان حسن مصطفى، قعدت فترة مكنتش قادرة اشتغل قعدت 6 سنين في البيت، لأننا عيشنا مع بعض عمر طويل أكتر من 40 سنة، فكان الموضوع صعب جدا وقلت خلاص عندى بنتين وأنا مع نفسى لغاية لما أفوق بس اتأخرت شوية، وناس كتير كلمونى على شغل ومنتج كان عاوزنى في مسرحية كوميدى وقلتله جوايا مفيش ضحك وكل اللى جوايا حزن بس".
واستكملت ميمي جمال،"لقيت بناتى الاتنين اتجوزوا وبقيت لوحدى في البيت، فقلت اللى بحب اعمله هو التمثيل فرجعت للتمثيل وبقيت بعمل الشغل برواقة وإحساس".
ماذا عن تجربة ميمي جمال لبرنامج التيك توك ؟
وتحدثت الفنانة عن تجربتها مع التيك توك: "حفيدى أدهم غاوى تيك توك وهو اللى جرجرنى له، وكل لما أروحلهم البيت يقولى يلا نعمل تيك توك".
كيف عاشت ميمي جمال بعد وفاة زوجها حسن مصطفى ؟

وقالت نجلا ابنة ميمي جمال،"والدتى عاشت فترة صعبة وقت وفاة والدى الفنان حسن مصطفى، وقلنا لها لازم تنزلى تشتغلى، ونزلت عشان تريحنا بس مش عشان هي عاوزة ونجح الدور، ولكن دخلت في الحزن تانى لفترة طويلة".

وتابعت نورا ابنة ميمي جمال، "وفاة والدى كانت نقطة قوية في حياتها لأنهم عاشوا فترة كبيرة سوا وحتى شغلهم كانوا مع بعض وربطت الفن بوجوده".
كيف كانت كواليس ميمي جمال في مسرحية مدرسة المشاغبين؟

وعن تمثيلها بدل سهير البابلي في مسرحية مدرسة المشاغبين قالت ميمي جمال،"مثلت بدل سهير البابلي كان جالها فترة عينيها بتورم وبتدمع، وقلوا لها لازم تسافر تعمل عملية، وسمير خفاجى رفض يقفل لغاية لما ترجع ورشحنى أعمل الدور لمدة 15 يوم حتى عودة سهير البابلى".

وتابعت ميمي جمال: "حسن مصطفى قالى اوعى، وقالى كل الموجودين كوميدينات أقوياء ولو ضيعتى افيه حد منهم هتبقى مشكلة ويقولولى شوف مراتك عملت إيه فاحتراما لنفسى وليكى بلاش، بس أنا عملت بروفات واشتغلت 15 يوم والحمد لله عملت الدور بشكل سليم ولما رجعت سهير البابلى قلتلها حمد لله على السلامة وكملت هي".
ما هي أخر أعمال ميمي جمال ؟

يذكر أن الفنانة ميمي جمال شاركت مؤخرا في موسم دراما رمضان في مسلسل "علاقة مشروعة"، وهو من بطولة ياسر جلال ومى عمر وداليا مصطفى ومراد مكرم، بسنت شوقى، عفاف مصطفى، ياسمين رحمي، عمر رزيق، محمود فاروس، جودى مسعودى، كريم محجوب، نهال نور، وردشان مجدى، وعدد آخر من الفنانين، والعمل من تأليف سماح الحريرى وإخراج خالد مرعى وإنتاج مشترك بين شركتى "Forever Drama - مها سليم" و"media Hub – سعدى جوهر".
تدور أحداث المسلسل حول عمرو (ياسر جلال) المتزوج من عاليا (داليا مصطفى) ويعيشا حياة مستقرة مع ابنائهما، ويتورط عمرو في علاقة مع بثينة (مى عمر) - الزوجة السابقة لشريكه وصديق عمره أمجد (مراد مكرم) ويضطر للزواج منها سرا، وإخفاء الأمر عن زوجته الأولى عاليا، ومع تتطور الأمور حيث يجد عمرو نفسه في حيرة بين أمجد وبثينة وعاليا، وعليه اتخاذ قرارا صعبا لمواجهة ما يحدث.