" كنت بفكر اعتزل الفن قبل جعفر العمدة وقريب هعمل عملية تجميل".. أبرز تصريحات هالة صدقي

حلت الفنانة هالة صدقي، ضيفة ببرنامج " ضيفي " مع الإعلامي معتز الدمرداش، أمس الجمعة، في ثالث أيام عيد الأضحى، على قناة الشرق الإخبارية، وتحدثت عن أبرز أعمالها الفنية واخرهم مسلسل "جعفر العمدة"، لذلك نستعرض أبرز تصريحاتها في السياق التالي.
سبب ابتعاد هالة صدقي عن السينما

وكشفت هالة صدقي، سر ابتعادها عن السينما، قائلة:" كنت سباحة وكل الأدوار اللي جيالي مايوهات والمخرجين بيستسهلوا، والمايوه كان بالنسبة ليا زي البنطلون لابساه وبتمرن بيه ليل نهار، ولقيت كل اللي جايلي بعد كده مايوهات للإثارة وبيصوروني بشكل مش مظبوط فوقفت السينما خالص".
فكرة اعتزال هالة صدقي عن الفن

قالت هالة صدقي أنها قررت مسبقًا الاعتزال من الفن، قائلة: "كنت بفكر اعتزل الفن قبل جعفر العمدة لأن في تجارب مريت بيها وحسيت إن الحكاية باظت ومش اللي انا متربية عليه والورق اللي بيتكتب في اللوكيشن والبطل اللي ممكن يلغي المؤلف وبيغير المخرجين وكنت بلاقي لو معايا بطلة تاني ممكن المخرج يجاملها ومفيش حد بيشتغل لمصلحة العمل بيشتغلوا لمصلحة أشخاص".
كواليس مسلسل جعفر العمدة

كما تحدثت هالة صدقي عن نجاح مسلسل جعفر العمدة وقالت: "جالتي مكالمات من كندا واستراليا والعالم كله ولما خرجت في العيد اتوهمت من رد الفعل والأغرب إن الأطفال ولشباب دلعوني دلع السنين وفرحانة بيهم أوي".

وتابعت: "صفصف مكنتش البطلة لكن فرضت نفسها كبطلة، ومهما قدمت بعد كده يبقى في مقارنة بين دور صفصف".
هالة صدقي تكشف عن اهم محطاتها السينمائية

كشفت الفنانة هالة صدقي عن أهمية فيلم الهروب في مشوارها الفني، قائلة:"فيلم الهروب كان محطة في مشواري بس كان لازم يتخطط ليه ولكن من قلة الخبرة مقدرتش اكمله".
تصالح هالة صدقي مع سنها

وتابعت: " أنا سعيدة بالكارير بتاعي وكان ممكن يكون أفضل بس أنا بفكر أنه يكون أطول وحاطه في دماغي إني متابعة هدى سلطان وشايفة مشوارها ماشي ازاي، وفضلت لأخر دقيقة نجمة وتصالحت مع نفسها لما طلع شباب صغير معاها مشيت مع الموجه".

وتابعت هالة صدقي:" أنا كبرت في السن والجمهور شايفني من وأنا صغيرة ومينفعش اقول إني لسه صغيرة لأن ادواري اتحرقت، لكن كل حاجة بعملها بتكون مميزة وأنا بتميز عن جيلي إني بقدر أعمل الكوميدي والدرامي".
قرار هالة صدقي إلى اللجوء لعملية التجميل

وأضافت: "مضايقة من اللغد وقريب هعمل عملية تجميل وهشيله، وعشان اعمل عملية تجميل محتاجة ميزانية خاصة يعني أربع مسلسلات وفيلمين و5 لقاءات تليفزيونية".