أبرز تصريحات أحمد العوضي في "صاحبة السعادة" مع الإعلامية إسعاد يونس

تصدر الفنان أحمد العوضي تريند "جوجل"، ومواقع التواصل الاجتماعي، بعد ظهوره مساء أمس في برنامج "صاحبة السعادة" مع الإعلامية إسعاد يونس، حيث كشف خلال اللقاء عن العديد من الكواليس المتعلقة بحياته الشخصية، وعن سر نجاح زيجته من الفنانة ياسمين عبد العزيز، وعن تفاصيل مسلسله الأخير "ضرب نار"، وعن تشبيه بالفنان الراحل أحمد زكي، وغيرها من الأمور.
أحمد العوضي: "في أول الجواز كنت عصبي جدًا.. ومش عيب إن الراجل ياخد الرأي الصح"

وأكد أحمد العوضي على أنه في بداية زواجه كان يتعامل بعصبية شديدة، مُضيفًا: "في أول الجواز كنت عصبي جدًا وكنت واخد الموضوع كله إني هفرض سيطرتي، ومع الوقت فهمت إن الموضوع شركة ومش عيب إن الراجل ياخد الرأي الصح".
"مفيش كرامة بين المحبين".. أحمد العوضي يكشف عن أسباب نجاح زيجته

وأوضح أحمد العوضي أن أي الزواج الناجح يعتمد بشكل كبير على السرية بين الطرفين، مُتابعًا:"في الأول ممكن تحصل مشكلة وتحكوا لحد، وممكن تبقى عايز تصالح، ومفيش كرامة بين المحبين، الكرامة ديه تأتي بسبب تدخل بعض الأفراد في العلاقة، وأنا وياسمين في 4 سنين تكيفنا مع بعض".

وكشف أحمد العوضي عن شعوره في حالة سفر زوجته الفنانة ياسمين عبد العزيز، قائلًا:"مش بنبسط لما ياسمين تبعد عني، بس لما بتسافر أو كدا ببقا شوية قاعد براحتي، ومفيش حد معايا بشغل التلفزيون براحتي أو بعلي الصوت براحتي، ومافيش حد أنا خايف على مضايقته، وبالرغم أنها بتوحشني، وبلعب بلايستيشن براحتي، ولما بعمل كدا يومين وأكلمها اقولها انتي فين، ارجعي".
"هي اللي هتخليك بني آدم".. أحمد العوضي يكشف عن أهمية ممارسة الرياضة

كما كشف أحمد العوضي عن حبه الشديد لممارسة الرياضة، فقد وصفها بأنها عمود الحياة، مُوضحًا:" الرياضة هي عمود الحياة، وهي اللي هتخليك بنى آدم، ولازم تلعب أي رياضة، ولازم طول الوقت أنزل ألعب الرياضة اللي عايزها".
متروحش ل سكة المخدرات.. أحمد العوضي يوجه نصيحة لجمهوره

ووجه أحمد العوضي نصيحة لجمهوره الشباب، وهي ضرورة الابتعاد عن المخدرات، مُضيفًا:" متروحش ل سكة المخدرات لإنها بتدمرك، حتى لو شايف إنك بتاخد قليل منها، والعقل هو اللي بيوزن كلامك، حتى لو شقي العقل هو اللي بيوزن كلامك حتى لو بتتخانق".

أحمد العوضي:"معتز جدًا بنشأتي.. وبحب طفولتي في عين شمس"
كما تحدث أحمد العوضي عن ذكريات طفولته وعلاقته بأهالي مدينة عين شمس، مُؤكدًا: "أنا معتز جدًا بنشأتي وبحب طفولتي في عين شمس، ولسه سايبها من قريب، وبحس إني سفير للطبقة الشعبية والطبقة اللي خرجت منها، وطول الوقت بطلع أقول إني فخور بعين شمس، وأنا بعتز جدًا بيهم".
أحمد العوضي:"والدي محرمنيش من أي حاجة.. وأمي توفت وأنا عندي 9 سنين"

وقال أحمد العوضي أنه تربى في بيئة بسيطة للغاية، وأن بيته كانت مساحته 60 مترًا، مُتابعًا:" والدي محرمنيش من أي حاجة، ويمكن أنا ناشف شوية عشان أبويا بس اللي رباني، أمي توفت وأنا عندي 9 سنين فمكنش فيه أم، وأي حاجة بنجح فيها لازم أنزل الشارع هناك عشان أشوف رد فعلهم عن ابنهم".

وعبر الفنان أحمد العوضي عن سعادته البالغة بتعاونه للمرة الثانية مع زوجته الفنانة ياسمين عبد العزيز في مسلسل" ضرب نار"، الذي عرض في موسم رمضان 2023، لافتًا أن هدفهم كان تقديم عملًا رائعًا،:" كان لينا هدف أنا وياسمين إننا نقدم حاجة حلوة، ومسلسل حلو عشان الناس مستنيانا بعد مسلسل اللي ملوش كبير، وجت من هنا فكرة ضرب نار، مش واخدين قرار إننا نكون ثنائي، حسب الموضوع اللي قدامنا، ولما عملنا اللي ملوش كبير ونجح حبينا نوثق النجاح ده بضرب نار وممكن السنة الجاية منبقاش مع بعض ورمضان اللي بعده نرجع وهكذا".
أحمد العوضي يعلق على تشبيه بالراحل أحمد زكي

وعن تشبيه بالفنان الراحل أحمد زكي، فقال أن هذا الأمر أسعده جدًا، وأن السبب في ذلك يعود إلى الشكل والاستايل العام لشخصيته في مسلسل" ضرب نار"، لافتًا أن شخصية الخديوي في مسلسل" اللي مالوش كبير" تعتبر الأقرب له من حيث طريقة الكلام.

أحمد العوضي يكشف موقفه من تناول المحشي والسوشي

وتحدث أحمد العوضي عن حبه الكبير لتناول اللحوم، وعدم حبه للمحشي والسوشي، مُضيفًا:" أنا لحمجي، أي حاجة فيها لحمة تمام كبدة تمام، ومليش في المحاشي، وياسمين بتحب السوشي ولو كلت السوشي والأكل ده أحس إني ارتكبت جريمة، يعني آكل عكاوي، كوارع، لحمة رأس، فتة، أنما سوشي والحاجات دي بيتاكلوا إزاي أصلا".

"ضرب نار".. آخر أعمال أحمد العوضي الدرامية

وفي سياق آخر، كانت آخر أعمال الفنان أحمد العوضي الدرامية مشاركته في الماراثون الرمضاني، من خلال مسلسل" ضرب نار"، وهو بطولة ياسمين عبد العزيز، ماجد المصرى، مها نصار، انتصار، ضياء عبد الخالق، هدى الإتربى، أحمد الرافعى، إيمان السيد، أحمد عبد الله محمود، تامر نبيل، تامر مجدى، أحمد غزى، ايسل رمزى، زينة منصور، تيسير عبد العزيز، حسن العدل، أحمد صادق، طارق النهرى، إسراء رخا، لبنى ونس، سهير المرشدى تأليف ناصر عبد الرحمن وإخراج مصطفى فكرى وإنتاج شركة سينرجي.