أهم تصريحات حمادة هلال في برنامج "يحدث في مصر" عن مسلسل "المداح 3"

حل الفنان حمادة هلال في ضيافة برنامج "يحدث في مصر" الذي يقدمه الإعلامي شريف عامر على فضائية "MBC مصر" وتحدث عن مسلسله الأخير "المداح 3" وكشف أبرز المشاهد الصعبة التي تعرض لها بالإضافة إلى كواليس بعد المشاهد وحقيقة وجود جزء رابع وسيرصد لكم الفجر الفني هذة التصريحات في السطور القادمة:
حمادة هلال يتحدث عن كواليس التصوير
إحنا كنا متوترين وأحنا بنصور الجزء الثالث من المداح أكتر من الاجزاء التانية عشان نوصل للنجاح المطلوب، وأحنا تعبنا أو ي أنا والمؤلفين والمخرج وكنا قاصدين نتعب عشان ربنا يكرمنا أكتر حتى إننا روحنا قنا وسانت كاترين ولبنان والفيوم وغيره عشان نطلع المشاهد مظبوطة"
وتابع: "أتمنى أعمل أساطير كتير من المداح لأن قماشته واسعة والمداح دراما مختلفة في رمضان حتى وأنا في بدايتي كنت كده برضه بحب الاختلافات أما لقيت الناس بتعمل تشويق عملت دراما زي المال والبنون ولما لقيتهم بيعملوا اجتماعي روحت أنا للرعب والمداح بالنسبه لي يعتبر سوبر هيرو العرب.
حمادة هلال: مشهد النهاية كان في وادي حقيقي
وتحدث حمادة عن مشهد النهاية وقال: "المشهد الأخير ده بيني أنا ولوسي كان في وادي حقيقي وانا شخصيًا كنت رايح مرعوب وجبل سانت كاترين كان متحدد في الورق وصورنا مشاهد كتير هناك وطلعنا على رجلنا لمدة 5 ساعات وكان في ناس بتقع مننا من التعب واما طلعت نسيت التعب إلى فات لأن ده المكان إلى كان فيه سيدنا موسى ومكان روحاني جدًا".

حمادة هلال يكشف عن تناوله لموضوع صعب في المداح
وتحدث أيضًا عن تناوله لموضوع حمل المرأة من الجن وقال: "القلق الكبير أنك ممكن تقول حاجة تضل بيها الناس لأن هي زي الشعره مينفعش جدال فيها ولا غلط، زي موضوع الجمل المخلوق من النار في الجزء التاني الناس مكنتش عارفه كده وبرضه فكرة إن أي واحده ممكن تحمل من الشيطان الموضوع ده طبعًا صعب أوي لكن احنا فاتحين مجال للخيال لان دي دراما واحنا ماشيين على خط معين وكل المشاهد كانت متحددة على الورق وكان بنبعد عن الشرع والدين في أمور الخيال عشان مينفعش نمسها خالص"

حمادة هلال يكشف عن كواليس حصرية بينه وبين نجوم المداح
وتحدث حمادة عن الكواليس الخاصة بالمداح وقال: "أنا كنت واقف مبسوط من المشاهد بيني وبين محمد رياض وعمال اقول للمخرج مفيش مشاهد تانية والمشهد المواجهه بيني وبين محمد رياض واغلب المشاهد كان مشهد واحد وبالنسبه لاحمد سمير المخرج اول احساس ده هو الصح والحلو المشاهد الصعبة بالنسبة لي كانت مشاهد الرقية وانك ترقي حد ملبوس هي دي إلى كانت أصعبهم بعيدًا عن المغارة وكل الاحداث وسلمى كانت خايفة تيجي المسلسل قولتلها متخافيش انتي معاكي المداح وهي عملت الدور هايل بصراحة وحاولنا نطمنها وفي على النت حاجات كتير ومشاهد مشابهه للحقيقة بس طبعا في حاجات مبالغة فيها".
وتابع: "قعدنا أكتر من 8 شهور في الكتابة وعيدنا كتير أو ي عشان هي شعرة بسيطة بين الكوميدي والرعب وعملنا حاجات كتير عشان تناسب الاحداث ومنكونش بنضحك الناس بدل ما نرعبهم ونبقي تريقة للناس".
"المداح صعب يتعمل 30 حلقة، الخواجة لما بيعمل الحلقات في مسلسلات الرعب دي بيعمل 6 حلقات عشان يعمل خمس مواسم ف الموضوع مش تعب بس ده موضوع كبير أوي أوي، ده مسلسل رعب مش مسلسل اجتماعي وحدوته المداح صعبة ولكنه براند بيعيش وله حكاية لوحده ويارب تكمل على خير".
حمادة هلال يتحدث عن السوشيال ميديا
تحدث حمادة عن وسائل التواصل الاجتماعي وقال: "السوشيال ميديا بقت صعبه جدًا والناس بتقلد بعضها في الكومنتات فلازم اسمع الآراء واعملها يعني مثلا احنا قللنا أوي في الرباعيات الجزء ده عملنا نحو 3 أو 4 بس في مكانهم لاننا زودنا الوضع جدًا وزودنا الرباعيات في الجزء إلى فاتت.
وتابع: "لما تلاقي كومنتات كتير ورا بعض اعرف أن ده كمين وساعتها الموضوع ده مبيأثرش فيا خالص إنما لو حد واحد بس بيتكلم وبينصح فهو ده بيكون عنده حق
وحاولت أوجه رسالة من خلال المداح انهم يلجأو لربنا ويبعدوا عن أمور السحر".
وتابع: "أنا حبيت صابر المداح أوي وشوفت رموز معينة عشان أعرف أعمله وكل اما اقعد اشوف مسلسل تاني عشان أعمله قبله كان هو يجي في بالي لأنه في بالي من 6 سنين وقبل عيال حبيبة برضة كان نفسي اعمل حلم العمر ولكن الجمهور كان خايف من فكرة اني مطرب وبتضرب بس عملته ونجح، نجاح الغنوه بيفرحك أوي أوي لما تلاقي الاغنية عايشه من زمان بتخليك مبسوط ونجاح التمثيل لما بيكون الموضوع تقيل بيبقي حاجه تانية".

حمادة هلال: صابر المداح مش ملاك وفي ناس كتير زيه
وأضاف: "لو الورق وحش هتبقي بتعمل إلى عليك وخلاص مش هتبقي مصدق لكن لما تبقي الحكاية هي إلى شايلاك بتخلي الموضوع حقيقي وفيه دراما كتير فالمشاهد إلى بتحكمنا، صابر مش ملاك وفي ناس كتير زيه لان باباه كان بيفتح بيه المندل فالولد عنده طاقات شيطانيه وهو فاكراها ملائكية واما جه بخرج من العالم بتاعهم خرج غلط وحصل صعوبات وخرج في الجزء الثالث برضه بطريقة غلط فاشتغلوا في موضوع ابننا جه".
حمادة هلال: كنا بنبات في المغارة 7 أيام
وتحدث عن لحظة معرفته بنجاح المداح وقال: "أول يوم لما لقيت العالم كله منزل فيديو ابننا جه اتطمنت لما لقيت السوشيال ميديا ومدفعتش جنيه سوشيال ميديا، هو مش عيب إن حد يصرف على شغله بس مينفعش أصرف على حاجة زي دي زبطريقة باينة إني كده، لإني بحب أدي فرصة أفرح بنجاحي واقول إلى حصلنا ده بعد تعبنا في المغارات إلى كنا بنبات 7 أيام ونجاحنا لقيناه بعد أما كنا بنبات في الجبل، إحنا تعبنا فتعبنا مراحش عن الفاضي.
تفاصيل مسلسل المداح
يعتبر آخر أعماله هو مسلسل "المداح" الجزء الثالث من بطولة حمادة هلال وهبة مجدي ويسرا اللوزي ومحمد عز وعصام السقا ودنيا عبد العزيز وحنان سليمان وهلا السعيد وعفاف رشاد وخالد سرحان ومحمود عامر وبسمة ماهر وتامر شلتوت وسلمى أبو ضيف ورانيا فريد شوقي ومحمد مهران ولوسي وعبد العزيز مخيون وأحمد ماهر وصبحي خليل وأحمد كشك، إنتاج شركة سكرمو ميديا- إسلام المرسي، من تأليف وليد أبو المجد وأمين جمال وشريف يسري ومن إخراج أحمد سمير فرج.