عفاف رشاد للفجر الفني: "مشهد موتي في المداح 3 احتوى على سكينة حقيقية وقرأت الشهادتين بالتصوير"

يشهد الماراثون الرمضاني لعام 2023 منافسة كبيرة وتنوع بين النجوم وأعمالهم الفنية وينتظر كلًا منهم أن تُقيم أعمالهم وادائهم من قبل الجمهور الذي ينتظرها منذ فترة ويسعى فريق عمل كل مسلسل أن يبذل أقصى جهده لينال استحسان المشاهدين بشكل كبير.
وإذا تطرقنا للحديث عن استحسان الجمهور لابد أن نذكر مسلسل "المداح" الذي حقق نجاح مبهر في جزأيه الأول والثاني خلال الفترة الماضية، والذي يخطط ليكون الجزء الثالث منه "المداح أسطورة العشق" (المداح 3) الذي يتم عرضه الآن هو الحصان الأسود في رمضان 2023 أيضًا.
وبسبب انقلاب الأحداث رأس على عقب في الحلقة العاشرة والحادية عشر من المسلسل بسبب الفنانة عفاف رشاد الذي تقوم بدور الحاجة عفاف والدة «صابر-حمادة هلال» بعد أن تم قتلها على يد ابنتها «هبة- هلا السعيد» تحت سيطرة الجن عليها حرص الفجر الفني أن يتواصل مع الفنانة عفاف رشاد لتحدثنا باستفاضة عن دورها في المداح وكواليس مشهد القتل وتناقش معنا قضية مسلسل المداح وإليكم نص الحوار:
هل ستظهر شخصية الحاجة عفاف في المداح 3 مرة آخرى بعد قتلها وتشهد تغيرات كما ظهر أغلب الأبطال مثل أحمد بدير و تامر شلتوت مرة آخرى؟
الحقيقة إنها مش هتشهد تغيرات أو تحول أو ظهور زي كل الشخصيات تاني الي في المسلسل أنها تظهر زيهم على هيئة جن أو أي حاجة لا هي هتنتهي قصتها إنها الست الطيبة الحنونة لصابر وأخته الي بتخاف عليهم وبتحبهم زي ما ظهرت لصابر في الحلم ووصته على أخته برغم الي عملته فيها، وفي وجهه نظري الحاجة الوحيدة الي ممكن تكون اتغيرت في الجزء الثالث مش هتكون في شخصيتي ولكن هي انضمام نجوم كبار للعمل أضافوا كتير جدًا.
من وجهه نظرك هل وجود أكثر من جزء في أي عمل فني يساعد في نجاحه أم في هبوطه؟
مش أي عمل بينجح بكثرة الأجزاء، مسلسل زي ليالي الحلمية الناس هي الي كانت حابه المسلسل من أول جزء وطلبوا جزء تاني وتالت بس لما لاقوا الأجزاء كترت والموضوع زاد الموضوع بقي صعب وفقد رونقه، وفي مثال تاني على النقيض مثلاً مسلسل الكبير أوي 7 مستمر لغاية النهاردة ومحقق نجاح كبير جدًا والناس مزهقتش عشان معمول صح هي الفكرة بتدور حول المنطقة أن المسلسل مكتوب بطريقة صح لية منعملش منه جزء أول وتاني وتالت ورابع؟ بس أنا رأيي الشخصية بصراحة أن 3 أجزاء من أي عمل بيبقوا كفاية أوي أوي وأحب أن الفنان ميعتمدش على النجاح الي حققه قبل كدة لكن يدور على حاجة جديدة يفني فيها طاقته وتنجح هي كمان ويستمر الموضوع ده وينوع في نجاحه أكتر وأكتر.
ما هو أصعب مشهد واجهتيه في سلسلة المداح وما هي كواليسه ؟
المشهد الي خوفت منه أوي أوي هو مشهد قتلي في الحلقة ال 11 في الجزء الثالث على يد هلا السعيد لإني لقيت ناس جايين يلبسوني زي درع حديد كدة وبيقولولي البنت هيبقي معاها سكينة حقيقية وحامية مش بلاستيك زي أي مشهد في التمثيل فأنا كنت نايمة على جمبي ولو حركت أيدي سنتي واحد بس كان ممكن السكينة تيجي على أيدي او على كتفي لأن الطعنات كانت كتيرة أوي أوي وهلا كانت متقمصة الشخصية جدًا لأنها قايمة بدور مجنونة لدرجة إني سمعت صوت نفسها جمبي بالظبط وقعدت أتشاهد كتير عشان كنت خايفة أموت بجد في اللحظة دي برغم إني كنت لابسه درع حديد.
في رأيك أن قضية المداح والسحر وأذى المقربين موجودة في الحقيقة ولا هو عمل درامي بس؟
موجود طبعًا أنا بصراحة في الأول مكنتش معترفة بيه خالص في الأول لغاية ما شوفت ناس قريبين مني اتأذوا وحياتهم اتدمروا بسبب السحر ولسة شايفة واقعة إمبارح في التصوير ولقيت الموضوع حقيقي لإني وقفت قدام واحدة ممسوسة فربنا يبعد عننا كل الحاجات دي والناس المؤذية ويحفظنا.
تعاونتي مع حمادة هلال في الحب كدة والمداح بأجزاءة هل هناك اختلاف في التعامل أو الاداء الفني لحمادة من وجهةة نظرك بعد كل هذة السنوات؟
حمادة هو صديق عزيز وابن وحاجات كتير أوي وبرغم إني أكبر منه بكتير وقد أمه إلا إني بحب أخد بنصايحه في الحياة، أنا أول مرة أشتغل معاه كان في الحب كدة وكنت أخته وساعتها أدركت إنه إنسان مهذب جدًا جدًا وإنسان محترم وهادئ وبيبص لربنا في تعامله وكل صفاته جميلة وفرحت أكتر وأكتر لما اشتغلت معاه في المداح وكان في صدفة جميلة هي إني في البداية كنت ضيفة شرف في الجزء الأول وعملت مشهدين بالعدد ولكني كنت مبسوطة بالتعامل مع المخرج ومع حمادة، فكنت في الكواليس بهزر معاه وبقوله لو عملت مسلسل كويس لازم أكون معاك مكنتش أعرف أن المسلسل له جزء تاني لقيت نفسي فعلًا واخدة بطولة في الجزء التاني والتالت ونفذ بكلمته معايا فهو إنسان خلوق جدًا وحزينة جدًا إني خلصت شغلي معاهم بدري أما بالنسبة للناحية الفنية هو شاطر من بدري وبيطور من نفسه كل اما الوقت يعدي ومن مميزاته أنه دايمًا بيجي اللوكشين حافظ شغله كويس وبيجي في مواعيده ربنا يوفقه كمان وكمان لأنه يستاهل كل خير.
الفنانة عفاف رشاد من أسرة المداح الأصلية من الجزء الأول، ما هو اختلاف الجزء الثالث عن باقي الأجزاء؟
أنا شايفه إن المسلسل ناجح أوي اوي من أول جزء ف الي منضم جديد بيجي على سمعة المسلسل لأنه فارض نفسه بنفسه وفارض سمعته الحلوة عند الناس والجمهور في نجوم جديد أنضموا وشرفونا وشايفه إن المداح هيضيفلهم وهما هيضيفوله، والمداح أسطورة العشق هيكون في تاريخهم المهني حاجة مشرفة جدًا لأنه عمل متميز فعلًا.
في أعمال تانية بجانب المداح في رمضان أو خارج رمضان؟
بشتغل في مسلسل تحت الوصاية مع المخرج محمد شاكر خضير ومع شيرين دياب وخالد دياب ومع منى زكي وكوكبة كبيرة من النجوم وبصور مشاهدي كلها في إسكندرية وهخلص بكرة وإن شاء الله هيبدأ عرضه يوم 16 رمضان القادم.
بعيدًا عن المداح بعد فوزك بعضوية نقابة المهن التمثيلية، ما هي المشكلات الموجودة الذي تسعي لحلها الفترة القادمة ؟
أنا عضو في النقابة من أيام الثورة قعدت 4 سنين مع دكتور اشرف عبد الغفور وبعدين 4 سنين في دورة تانية مع دكتور أشرف زكي وزيهم في دورة بعدها والسنة دي أن شاء الله هكون عضو 4 سنين وهبقي كملت 16 سنة عضو مجلس في النقابة، المشكلة الي النقابة كلها بتواجهها هي قضية التشغيل وإننا بنحاول نعمل خطة بحيث إننا نقضي عليها ونخلي كل الممثلين يشتغلوا، النقابة بتاعتنا عملت حاجات كتير كويسة طول الفترات الي فاتت عملنا إسكان للشباب في مناطق محترمة جدًا وعملنا علاج طبي وعملنا دار مسنين لأهالينا الفنانين الكبار في السن الي ملهمش مأوى، وعاملين حاجات وإنجازات كتير ولسه هنعمل وأنا بتشرف إني من نقابة المهن التمثيلية لإن نقابتنا عاملة خدمات قيمة وكلنا فيها أسرة واحدة وكلنا حوالين بعض ومع بعض دايمً