عصام السقا للفجر الفني: إستمتعت بالعمل مع محمد رمضان في جعفر العمدة..وهذه نصيحتي للجيل الجديد"( حوار)

*نعيم إنسان جدع ومخلص ويشبهني في الحنية والإخلاص
*محمد رمضان جدع وبيحب الشغل يمشي مظبوط
*مشاركتي في المداح من المشاركات الأقرب لقلبي

*المنافسة الرمضانية في هذا العام قوية والسبب في ذلك هو وعي الجمهور

إستطاع الفنان المتألق عصام السقا أن يحجز مكانه في موسم دراما رمضان لهذا العام 2023، وذلك من خلال مشاركته في أكثر من عمل ومن أبرزهم مسلسل جعفر العمدة والمداح 3
وفي كل دور قدمه الفنان عصام السقا كان يثبت لنا أنه فنان فريد من نوعه وجدير بالمشاهدة والنجومية، ومع إختلاف كل شخصية كان بها تحديات كبيرة، حدّثنا عنها الفنان عصام السقا في حوار خاص وحصري للفجر الفني/


بدايةً حدثنا عن إنطباعك الأول عندما جمعك القدر بالفنان محمد رمضان للتعاون معه في جعفر العمدة؟
والله التعاون مع محمد جميل جدا ومليان أريحية وبينا إنسجام لأننا أصدقاء قبل كل شئ، ف كمان إننا نطلع أصدقاء وأنتيم في سياق الأحداث ف دي حاجة فرحتني وخلت الأمر سلس وبسيط عليا وإستمتعت جدا جدا بالشغل معاه الصراحة.
عصام السقا مع محمد رمضان
كيف يرى عصام السقا شخصية نعيم ؟
نعيم إنسان جدع وعاقل ومخلص ومتفاني في محبته وإخلاصه لجعفر وبصراحة له كاريزما في بيته وفي العيلة وواثق في نفسه وبيحب أهله ودي صفات جميلة كانت كفيلة تغريني إني أعمل الشخصية.
وما هى تحضيراتك للدور ؟
أي دور بتكون تحضيراته ومذاكرته صعبة على أي ممثل بيحب شغله الصراحة بداية بقى من إنك ازاي تتخيل الشخصية وريأكشناتها وعيوبها ومميزاتها ده بياخد وقت وكل مشهد لازم يتحضرله ويتذاكرله كويس ويتجرب مرة واتنين لحد ما توصل للدرجة اللي إنت شايف نفسك فيها تمام، ف مش الدور بس اللي لازمله تحضيرات كل مشهد وكل جملة محتاجة تاخد حقها.
في الحلقة الثالثة تبيّن لنا قسوة والد نعيم عليه، وهذا ما نراه كثيرا في علاقة الشباب بآبائهم، ف ما هى نصيحتك لكل من مثله؟
نصيحة لكل الاباء يعني دلوقتي صعوبة الزمن عالجيل الجديد بتفرض ضرورة القرب منهم بشكل جامد أوي والأب لو مكنش قريب وحنين ومصاحب وبيحب أولاده وبيحتويهم صح ميلومش غير نفسه لأن كما تدين تدان تزرع خير في إبنك هتلاقيه.. تزرع قسوة برضو هتلاقيها.
وللشباب اللذين على علاقة غير جيدة بآبئهم؟
في أولاد بيشوفو إن أبهاتهم دقة قديمة مثلًا أو بيملوا من الكلام معاهم والولاد دول للأسف بيفوقوا على كارثة فقدان الأب وأحب أوجهلهم رسالة مهة:
حب أهلك اللي عندك واللي في إيدك قبل الدنيا ما تعلمك تحب اللي كان عندك واللي كان في إيدك.
إلى أي مدى يُشبه نعيم عصام السقا ؟
شبهه في حاجات كتير، فحنيته على أهله وإخلاصه لصحابه وجدعنته وثقته في نفسه وكمان دوغري وطاغي عليه الطابع الصعيدي ده غير بقى شوية حاجات تانية هتكتشفوها في تحولات الشخصية ان شاء الله.
حدثنا عن الفنان محمد رمضان وكيف كانت شخصيته داخل الكواليس؟
محمد جدع وأمير الصراحة روحه حلوة ودمه خفيف بيحب الشغل يمشي مظبوط أوي وفي نفس الوقت مبيحبش القفش واللين في طبعه حلو يعني عشان كده كانت كواليس العمل ممتعة وفيها كتير من الحب والمودة.
عصام السقا ومحمد رمضان
وماذا عن مشاركتك في المداح ؟
بصراحه من أكتر الأدوار اللي حبيتها أوي، العمل مليان نجوم عمالقة كل يوم شغل معاهم كان الواحد بيتعلم حاجة جديدة وخبرة جديدة وبيساهموا في تشكيل وعيي ك ممثل جدا الصراحة عشان كده مشاركة المداح قريبة أوي لقلبي.
وما هى التحديات التي واجهتها في المداح ؟
إن الناس تصدقك، ده أهم تحدي ممكن يواجه الممثل إن اللي قدامك يندمج معاك ويأيدك ويحب ظهورك عالشاشة ده أكبر تحدي وأهم عقبة لازم الممثل يعديها في المداح نجح بسبب قدرته على إنه يكون قد اي تحدي وكون إني أشارك في عمل مليان روحانيات وظواهر خارقة للطبيعة ده كان تحدي كبير وبفضل ربنا وكرمه الحمدلله عجب الناس.
من وجهة نظرك كيف يستطيع الفنان الفصل بين دورين مختلفين تماما عن بعض مثلما تفعل في العمدة والمداح ؟
الفصل ده بياخد مجهود ذهني ونفسي كبير جدا من الممثل والله طبعا بيأثر ذهنيا وصحيا جدا بس الحمدلله ربنا بيكرم الواحد بشئ من التوفيق والكرم إنه بيهون أي مشقة على الواحد وتحضيرات المشهد برضو بتفرق في إن الواحد يعرف يشتغل هنا صح وهنا صح وميخلطش الأمور ويحافظ على مصداقيته.

ما رأيك في المنافسة الرمضانية هذا العام ؟
منافسة قوية جدا.. واللي مخليها قوية وعي الناس اللي زاد أوي مع تقدم التكنولوجيا واللي بيساعد الممثل يعرف تقديره لنفسه وفريق العمل يقيم نفسه بس بصراحه الحمدلله إن صناعة المسلسلات عموما والسينما استردت عافيتها الحمدلله.
عصام السقا
وماذا تتابع من الأعمال التي تُعرض ؟
بصراحة ضغط الشغل بيخلي الواحد مقصر أوي في متابعة الأعمال التانية وكمان وقت رمضان بيكون ضيق ومحدود خصوصا لو دخلنا رمضان ولسه في حاجات مثلا مخلصتش فالتصوير بس بحاول أتابع أو أشوف تخاطيف كدا على قد ما أقدر.
وما هو الدور الذي تتمنى تجسيده خلال أعمالك القادمة ؟
بصراحة أنا نفسي وأتمنى أقدم دور تاريخي أنا عندي شغف كبير أوي تجاه تراثنا وتاريخنا سواء الإسلامي أو المصري ان شاءالله أحقق يعني الأمنية دي قريب.
حدثنا عن تجربتك في يحيى وكنوز؟
العمل ده من أقرب الأعمال لقلبي؛ لأنه طفرة في مجال الكارتون ومسلسلات الأطفال وكانت من أجمل تجارب حياتي ك ڤويس أوڤر وممثل ومنتج وإن شاء الله يكمل السنين اللي جاية ويكون جزء أساسي في رمضان؛ لأنه بجد عمل قيّم ومتعوب فيه.
وماذا عن إحتمالية وجود جزء ثالث في العام القادم؟
إن شاء الله يكون في أجزاء كتير يارب مش جزء تالت بس الحمدلله العمل ناجح جدا وعامل صدى واسع وكويس أوي أوي وسط أوساط الشباب والأطفال والعائلات كمان، ف ربنا يسهل يعني ويكون في إن شاء الله.