صبحي خليل: عبد الرازق في "المداح 3" بالنسبة لي عشق..والجزء التالت لاقى نجاحا كبيرًا" (خاص)

انتهى فريق عمل مسلسل "المداح أسطورة العشق" «المداح 3» أمس من تصوير الجزء الثالث عن طريق إقامة حفل صغير للاحتفال بذلك الحدث بحضور أبطاله، وخلال الحفل التقى "الفجر الفني" ب الفنان صبحي خليل الذي يجسد شخصية "عبد الرازق" وأدلى خلال اللقاء عدد كبير من التصريحات التي تخص دوره بالمسلسل وتحدث عن رأيه في بعض الأمور وإليكم ابرز التصريحات:

صبحي خليل يتحدث عن تطورات شخصية عبد الرزاق

تحدث عن تطورات شخصية عبد الرازق خلال ال 3 أجزاء وقال: "عبد الرازق بالنسبة لي عشق من الجزء الأولاني والتالت، باختصار هو بيمثل شخصية واحد غلبان وكان حلمه بسيط لما بدأ في الفيوم في الجزء الأول وكان على قده، إنما في الجزء الثاني أحلامه كبرت ونضف والجزء التالت بقى قال أنا لازم اكسب زيهم مش هبقي الوحيد إلى مبكسبش وغير من شكله وخلع الطقيه وبدأ يلبس شكل معلم وبقي يتعامل إنه بقى معلم وحقق نجاح كبير خلال الجزء التالت".
وتابع: "شخصية عبد الرزاق شخصية طماعة ويعمل أكتر من إلى عبد الرزاق عمله وهو القتل لأنه دايمًا عايز يوصل لحاجة معينة مهما جاب ووصل فربنا يعافينا من الطمع والناس الطماعين"

صبحي خليل يكشف السر وراء لازمته الشهيرة

وصرح عن سر لازمته الشهيرة خلال المسلسل وقال: "لازمة الله الوكيل احنا عايشين مع بهايم اخترعتها بسبب صاحبي كل اما اجي اكلمه في موضوع يقولي اه ويبقي متنح فاقوله انت فاهم يابني وكان يفضل مش فاهم حاجه لغاية ما قولتله والله العظيم احنا عايشين مع بهايم وكنت في الجزء الأول بقول كلمه الله الوكيل بس من غير اي حاجة لغايه ما حسيت إني لازم أدخلهم في بعض وقولت الله الوكيل احنا عايشين مع بهايم ومن ساعتها حققت نجاح كبير جدًا الحمد الله وعلقت مع الجمهور".


وتابع: "حمادة هلال زعلان إننا مجمعناش حاجه في الجزء التالت وكل شويه يكلم حد ويقول أنا وعبد الرزاق مبنتجمعش في مشاهد ليه ومحصلش للاسف خالص اننا نتجمع وكنا مضغوطين جامد في الفترة إلى فاتت وإن شاء الله قريب هتجمعنا كذا حاجة بإذن الله".


وتحدث خلال اللقاء عن أولاده قائلًا: "ولادي دخلو الوسط الفني بمجهودهم ودخلتا معهد السينما الأول يعني سلكوا الطريق الشرعي جيهان مونتاج وعبد الرحمن تصوير لكن الناس أول ما الناس يعرفوا انهم ولادي بيقولو من شبه اباه فما ظلم لكن انا زرعت فيهم حاجات كتير حلوة لغاية ما بقوا موجودين في السوق ومعروفين بشطارتهم واخلاقهم كويسة".

مسلسل «المداح» الجزء الثالث من بطولة حمادة هلال وهبة مجدي ويسرا اللوزي ومحمد عز وعصام السقا ودنيا عبد العزيز وحنان سليمان وهلا السعيد وعفاف رشاد وخالد سرحان ومحمود عامر وبسمة ماهر وتامر شلتوت وسلمى أبو ضيف ورانيا فريد شوقي ومحمد مهران ولوسي وعبد العزيز مخيون وأحمد ماهر وصبحي خليل وأحمد كشك، إنتاج شركة سكرمو ميديا- إسلام المرسي، من تأليف وليد أبو المجد وأمين جمال وشريف يسري ومن إخراج أحمد سمير فرج.