ناهد السباعي: تبرؤ محمد رمضان من "إحكي يا شهرزاد" مرفوض.. وتفجر مفاجأة بخصوص تجميد بويضاتها

علقت الفنانة ناهد السباعي، على تبرؤ الفنان محمد رمضان من فيلم إحكي يا شهرزاد، والذي جمعهم عام 2009، مؤكدة أن تبرأ الفنان من عمل قدمه هو أمر مرفوض بالنسبة لها، بجانب الحديث سبب تجميد بويضاتها.

وقالت خلال حوارها مع الإعلامية أميرة بدر، في برنامجها VIP، المذاع عبر قناة هي: مستحيل أتبرأ من عمل قدمته، ومش أنا الوحيدة اللي اشتغلت في الفيلم في ناس كتير اشتغلت ومبسوطة وفخورة بشغلها، ومش معنى إني غلطت في اختياري أو في أدائي أو شغلي إني أطلع وأقول أمام كل الناس إني بتبرأ وبعتذر، ده مش صح لأن لو أنا مش مبسوطة بالعمل ده في حد مبسوط إنه اشتغل معايا في العمل دا، وفي مخرج وكاتب تعبوا في العمل دا وفي ممثلين تانين شايفين أن العمل ده كويس بالنسبة ليهم.
وتابعت: مينفعش أني أطلع أنا لأخطاء أنا عملتها سواء اختياري أو أدائي أو أي حاجة أو عدم التزامي في إني أقدم الدور بشكل كويس، إن أنا ارمي كل مجهود الناس دي وأقول أنا أتبرأ وندمانة وبعتذر للجمهور، وبعتذر جدًا لكل الناس اللي بتعمل كده، أنا بشوف أن دا مرفوض جدًا.
وتعليقًا على تبرؤ محمد رمضان من فيلم إحكي يا شهرزاد، فقالت ناهد السباعي: وأنا فخورة إني اشتغلت في الفيلم دا مع ناس كنت طول عمري بحلم أشتعل معاهم، من أول أستاذ يسري وأستاذ محمود حميدة ومنى زكي وسوسن بدر، فيلم كبير ومهم وعايش والناس بتحبه، خسارة إنه شايفه كده.
كما كشفت الفنانة ناهد السباعي، عن تجميد بويضاتها بطلب من والدتها المنتجة ناهد فريد شوقي، قائلة: طبيعي كان نفسي أكون أم، وجمدت بويضاتي ب طلب من والدتي، وكان لازم أجمد بويضاتي علشان مكونش متسرعة في اختيار شريك يكون معايا أضطر أخلف، واختار شريك حياتي بشكل أحسن، ومكونش خايفة من المستقبل، وأريح والدتي وأختي، وعلشان يكون اختياري سليم ونفسي يكون أولادي شبه والدهم.
أما عن أغرب المعاكسات التي تقلتها ناهد السباعي، فقالت: على طول بضحك لما بتعاكس، وكنت عاملة مشهد في فيلم إكس لارج، والناس حافظة كلام المشهد وبقوا يقولولي أنا بحب البوس أوي وعندي 4 حسنات في ضهري، إيه دا ليه حد يقول كده، دي من أغرب الحاجات اللي بسمعها وبضحك أوي عليها ودا لما مشهد ينجح.