من مرحلة رياض الأطفال إلى شهادة الثانوية العامة.. قرارات العام الدراسي الجديد ونظام الامتحانات

ينطلق العام الدراسي الجديد 2022- 2023، يوم 1 أكتوبر المقبل 2022 لجميع المراحل التعليمية، وسط إجراءات أمنية واحترازية مشددة؛ حفاظًا على صحة الطلاب وجميع المشاركين بالعملية التعليمية.

ويرصد "الفجر" خلال هذا التقرير ملامح الدراسة بالعام الدراسي الجديد 2022- 2023.

- من رياض الأطفال إلى 3 ابتدائي لا توجد امتحانات.. ولا توجد واجبات منزلية.

-للطفل في رابعة وخامسة ابتدائي.. امتحان في منهج الشهر الأول عليه 15 درجة + امتحان في الشهر التاني عليه 15 درجة + امتحان في نص السنة عليه 30 درجة + مهام أدائية عليها 35 درجة + 5 درجات للمواظبة يساوي 100 درجة دي نتيجة الطالب في الترم الأول، ونفسها بالظبط في الترم التاني.

-نتيجة الطالب في رابعة وخامسة دون درجات.. هتكون بالألوان كالتالي: اللون الأزرق: من (85 درجة إلى 100)، واللون الأخضر (من 65 لأقل 85)، واللون الأصفر (50 لأقل 65)، اللون الأحمر من (1 لأقل من 50)، ويشترط لنجاح الطالب الحصول على 30% على الأقل من درجات امتحان الفصل الدراسي الثاني، في كل مادة من المواد.

-لكي ينجح الطالب في الصف الرابع أو الصف الخامس، لا بد أن يأخذ في كل المواد يا أصفر يا أزرق يا أخضر، أما إذا أخذ اللون الأحمر في مادة يبقى ساقط فيها، ولازم يدخل دور تاني، ولو جاب في الدور التاني أحمر برضة هيعيد السنة.

-امتحانات الطلاب في 6 ابتدائي، وأولى إعدادي وثانية إعدادي وأولى ثانوي وثانية ثانوي، هتكون كالتالي:
-امتحان في نهاية شهر 10 وامتحان في نهاية شهر 11، هيكون على كل امتحان 10 درجات، والامتحان هيكون من منهج نفس الشهر، والعشر درجات دول هينضافوا لدرجات الطالب في امتحان نص السنة.

- امتحانات نصف السنة ستكون من منهج الترم الأول كله، يعني مش معنى إن الطالب امتحن في شهر 10 أو شهر 11 إنه خلاص لن يأتي منهم حاجة في الامتحان. لأ.. الطالب سيمتحن في 10 و11 ونفس المنهج هيمتحن فيه في نهاية التيرم.

-وبكده سيحصل الآتي: الصف السادس الابتدائي والأول الإعدادي والثاني الإعدادي والأول الثانوي والثاني الثانوي، مجموع الطالب في كل الصفوف دي هيكون كالتالي: 5 درجات سلوك (هيحطهم المعلمين في الفصل) + 5 درجات حضور (هتحطهم إدارة المدرسة بناء على حضور أو غياب الطالب) + 10 درجات عن الامتحان الشهري + درجات الامتحان في كل مادة بنهاية الترم، ومجموع كل دول هيكون نتيجة الطالب في الترم الأول، ونفس الكلام في الترم التاني.

- بالنسبة للشهادة الإعدادية لن يوجد أي تغيير فيها.
- بالنسبة لامتحانات أولى وثانية ثانوي، ستكون: كلها على التابلت، والامتحانات هتكون على مستوى الإدارة التعليمية، واللي هيحط الامتحانات موجه المادة في الإدارة (مش المدرسة)، أما امتحانات الشهر بتاعت أولى وتانية ثانوي فهي ستكون قصيرة وبسيطة وكام سؤال لن يكون امتحان امتحان يعني.. ولو الطالب جاب 7 من 10 في أول شهر، وجاب 9 من 10 في تاني شهر، فهو سيأخذ التسعة لا السبعة، لأن الطالب سيأخذ الدرجة الأعلى في الامتحانين.

- بالنسبة بقى لشهادة الثانوية العامة (3 ثانوي عام)، الأسئلة ستكون (85% اختيار من متعدد + 15% أسئلة مقالية قصيرة).. الطالب سيجاوب أسئلة الاختيار من متعدد في البابل شيت زي كل سنة، وسيكون فيه ورقتين في الآخر كده يجاوب فيهم على الأسئلة المقالية.

- تصحيح أسئلة الاختيار من متعدد سيكون إلكتروني (بس التصحيح لن يكون في مكان واحد زي ما كان بيحصل كل سنة، سيكون فيه مراكز تصحيح إلكتروني في المحافظات، وده هيكون من خلال أجهزة إلكترونية موجودة في كل مركز تصحيح).

-بالنسبة - للأسئلة المقالية، فهي ستصحح برضو إلكتروني، إجابات كل طالب ستأتي لاثنين معلمين متخصصين في المادة.. ستأتي لهم على التابلت، وكل واحد يصحح الأسئلة ويعطي درجة للطالب، لو المعلم الأول قال الطالب ده يستحق 5 درجات على الأسئلة المقالية، والمعلم التاني قال الطالب يستحق 5 درجات (يعني الاثنين اتفقوا) يبقى الطالب يأخذ الخمس درجات.. لكن لو معلم فيهم قال الطالب يستحق 5 درجات والتاني قال الطالب يستحق 7 درجات (يعني اختلفوا).. هنا الإجابة ستذهب لمعلم تالت يفصل بينهما، ويا يقول الطالب يستحق خمس درجات، يا يقول الطالب يستحق سبع درجات.. وسيحدد الطالب يأخذ كام في الأسئلة المقالية للمادة دي، وهكذا هيحصل في باقي المواد.

- بالنسبة للتظلمات في الثانوية العامة؟.. لما النتيجة تظهر والطالب يتظلم على النتيجة، سيذهب يستلم ورقة أسئلته اللي عليها اسمه، وورقة إجابته اللي عليها اسمه، ونموذج الإجابة اللي اتصحح منه.

سيكون فيه تدريبات للطالب على شكل الأسئلة الجديدة، إما عن طريق التابلت (يعني هيكون فيه منصة يدخل عليها الطالب يشوف النماذج التدريبية)، أو يدخل على موقع الوزارة يشوف النماذج التدريبية.. والطالب هيدخل الامتحانات بمجلدات المفاهيم (ودي هيكون فيها ملخص المنهج في كل مادة).

- الوزارة قبل نهاية نص السنة، ستعلن للطلبة، مواصفات كل امتحان لكل مادة.. يعني العربي 50 سؤالا منهم مثلا يعني 40 أسئلة اختيار من متعدد و10 أسئلة مقالية، وهكذا في كل المواد.. وستعلن عن مخرجات التعلم في كل مادة الطالب يذاكرها ويدخل بيها الامتحان، يعني الامتحان سيكون معروف هيجي ازاي وعدد أسئلته، ومنين بالظبط.

-أتصور كدة إن الدكتور رضا حجازي وزير التربية والتعليم وضع كل النقاط على الحروف من بدري علشان كل واحد يكون عامل حسابه وعلى علم بكل شيء مبكرا.. مش مطلوب منك كولي أمر غير تساعد ابنك يستعد كويس لو عايز يحقق طموحه في الوصول لشيء محترم، ما دام كل شيء أصبحت على نور في كل الصفوف الدراسية.