خاص.. أحمد حمادة : تامر حسني جابر الخواطر و حقق لي حلمي

كشف الموهبة الصاعدة أحمد حمادة عن كواليس غناءة مع الفنان تامر حسني على المسرح، قائلا: أنا مدين ليك للحظة فرح لمست قلبي وخليتني أعيش بجد بعد تعب كتير في حياتي حسيت بجبران خاطر لا يوصف بحبك أوي أتمنيتك أخويا من قلبك النضيف وحبك ليا ولينا كلنا، إن شاء الله ثقتك فيا إني هكون ناجح جدًا عشان أحكي قصتي للناس وأبقي قدوه لكل حد عايز ينجح وشرف ليا إنك تشبهني بقصتك الصعبه في البدايه وإن شاء الله هكون تامر حسني الجديد للجيل الجاي.





كنت متوقع أن تامر حسني يختارك تغني معاه؟

من وأنا صغير كنت بحلم باليوم ده أنه يجي ودعيت ربنا كتير، وشاف فيا تامر حسني وهو صغير ف كنت بالنسبه له حد بيعافر فكنت عشمان في ربنا ومتأكد أنه مش هيخذلني.



وعن كواليس الشغل والتسجيل مع تامر حسني

كواليس الشغل معاه حرفيا مكنتش عايزها تخلص كان يوم لا يوصف من الضحك والحب اللي شوفناه وحسيناه منه كان جميل بكل معني الكلمه كان بيخلينا نشوفه بيعمل إيه وأول حاجه قالها لينا لما أتقابلنا عايزكم تركزوا معايا في كل حاجه هتحصل في يوم التسجيل عشان تتعلموا منها قدام وأحنا بنفكره بأسمائنا جه عندي وقالي مش محتاج طبعا أنت مكسر الدنيا يا أبوحميد.




وعن أحساس أحمد حمادة على المسرح أمام جمهور كبير مثل جمهور تامر حسني

أحساس خيالي كنت بحلم أنه يبق جمهوري أنا، جمهور عظيم بكل معني الكلمه جمهور نضيف لفنان أنضف ، و تامر حسني جابر للخواطر وهيفضل أنضف الناس في نظري حرفيا وربنا هيكرمه أكتر وأكتر.

وتابع أتمنيت إن الجمهور الجميل ده يبقي جمهوري إن شاء الله هيحصل قريب.



ردود الأفعال التي تلقاها بعد الغناء على المسرح مع تامر حسني

الناس كانت جميله أوي ولما خلصت الحفله مكنتش عارف أمشي في اسكندريه حرفيا من الفرحه والناس اللي عماله تيجي تتصور معايا وكلامهم علي صوتي أنه كان مميز واحساسي
بتمني يجي من بعد الفرصه العظيمه ديه خير كبير لأني عشمان في ربنا.


وعن أكتشاف تامر حسني لموهبة أحمد حمادة


كان حصل مشكله كنت أساءت الظن حرفيا في الفنان الكبير تامر حسني كنت طلعت تريندات كتير وربنا رزق الناس تعرفني ولكن برضه مجاش ليا فرصه فعليا ففكرت أروح لأكتر حد بيدعم الشباب روحتله وأنا مكنتش مقتدر علي فلوس الحفلة.


وعرفت أجيب تيكيت عادي مش vip ومكنتش عارف أدخل لحد ما ربنا رزق وقدرت خليت الناس ترفعني وأنا في أول صف وعملت كل اللي ميتعملش عشان يشوفني بعد تنمر كبير من الناس عليا وتريقه لا توصف وصلت لناس ضربتني عشان بتنطط عشان يشوفني صاحبي أسمه أحمد عوني شالني علي ضهره عشان يشوفني وأفتكرت أنه شافني والناس في الحفله قالولي شافك ومش عايزك يعم خلي عندك كرامه رجعت وأنا حزين قلبي كان مكسور حرفيا لأني عمري في حياتي ما جريت ورا فنان ولكن كنت تعبت عشان حاولت كتير عشان أوصل لحلمي.


وتابع، نزلت بوست كتبت فيه أنه شافني ومعبرنيش البوست وصل ونزل عنده إني لازم أبعتله صوتي يسمعني وإن أكيد صوتي حاجه كبيره إني بعافر عليه كده، ولما سمع صوتي تفاجئ جدًا، و تواصل معايا حد من التيم بتاعه إن تامر كان مبهور ومخضوض من صوتي حرفيا كلمني بعد فتره التيم عنده كنت طاير بعد الليالي حرفيا وكان من بعدها داعم قوي ليا دائما بحبه أوي وإن شاء الله هيجي يوم أبقي عندي جمهور كبير وجميل زيه، وهشكره وأقول قد إيه جبر بخاطري
بتمني أن شاء الله أشوفه ويقدمني في حفله كبيره قريب وأنا بغني أغنيتي أنا الخاصة.

وقال أحمد حمادة أنه أتشهر العسكري الذي يغني خليني ذكري في الجيش، وصوتي قريب من وائل جسار، واشتهرت بمطرب المترو.