أعلن الفنان شادي خفاجة عن مرض والده وتدهور حالته الصحية، ودخوله في حالة غيبوبة بسبب خطأ طبي تعرض له بعد خضوعه لعملية جراحية منذ شهرين، بجانب تعرضه لعملية نصب من إحدى المستشفيات الخاصة، وذلك من خلال حسابه الشخصي على موقع التواصل الاجتماعي "فيسبوك". كتب شادي خفاجة منشورًا قال فيه :"أنا مش عاوز أبويا يموت، أرجوكم ساعدوني، إمبارح ابويا بدأ يخرف و يفقد الوعي و بدأ يدخل في غيبوبة ، كلمت الدكتور الجراح بتاعه بقوله ابويا بيموت، رد عليا يقولي اعمله ايه؟، الدكتور الجراح اللي عمل عملية ملوثة بيقول على العيان بتاعه اعمله إيه؟". وتابع شادي خفاجة قائلاً: "أنا أبويا بيروح مني بسبب أخطاء الاطباء و مستشفى عين شمس التخصصي، أبويا دخل يعمل عملية فتأ في الصدر و ركب شبكة بتاريخ 5 اغسطس بمستشفى عين شمس التخصصي و نصبوا عليا قالولي ادفع 25 ألف جنيه تأمين و اللي هيتبقى بنعملك بيه استرداد، فوجأت بعد العملية بفاتورة ب 90 ألف جنيه ، اتصرفت و مكتب رئاسة الوزراء الدكتور مصطفى مدبولي و الدكتور أشرف ذكي جابولي قرار بتخفيض 30٪ من المبلغ و كتر ألف خيرهم بأمانة و ربنا يبارك فيهم". وأضاف شادي خفاجة قائلاً: "أبويا فضل يتابع مع الدكتور الجراح أحمد عادل عباس عبد الشافي جامعة عين شمس في عيادته و في المستشفى، و جرح أبويا دون تحسن مع فقدان الشهية و حالة إعياء عامة جسديًا و ده بسبب إن الجرح ملوث جدًا من العملية و النتيجة ان الدكتور طلب حجزه و دخوله عمليات مرة تانية في مستشفى عين شمس التخصصي مرة تانية و كلفتنا 10 آلاف جنيه مقابل يوم واحد فقط، و خرج على البيت ،ومن يومها الدكتور بيبعت تمريض يغير ع الجرح و بيتابع معاه و لكن دون جدوى أو تحسن و ده منظر الجرح و الحال اللي أبويا وصل ليه". وواصل شادي خفاجة كلامه قائلاً: "أبويا حرفيًا بيموت مني و مش قادر اعمل إيه أنا و اخواتي، احنا من امبارح في مستشفى الدمرداش؛ لإني مش هقدر أدخل تاني عين شمس التخصصي ويتعمل عليا نصباية زي كل مرة و عدى على دخول أبويا 24 ساعة في الدمرداش و رامين أبويا في غرفة فيها 6 مرضى بدون تكييف او مروحة و ده خطر جدًا على الجرح في الجو ده ، و مفيش لا تمريض يركب له محاليل تغذية وريدية ولا في دكتور جراح يبص على حالة الجرح و التلوث اللي هو وصل إليه نتيجة العملية و الدكتور نفسه اللي عامل العملية مش عاوز حتى يجي يبص على الحالة بتاعته بالرغم من إنه شغال برضه في مستشفى الدمرداش". واستكمل شادي خفاجة قائلاً: "معقول ده حال المستشفيات في مصر وفي النهضة اللي البلد فيها دلوقتي ،و لو أنا مش قادر أدفع 90 ألف جنيه في مستشفى خاص هترمي زي الكلب كده في مستشفيات بلدي الجامعية اللي المفروض سمعتها مسمعة في الوطن العربي كله،أرجوكم أبويا والله هيروح مني لو مالحقتوش في ال 24 ساعة دول".