عمرو سمير عاطف يتحدث عن اتهام "خيال مآتة" بالسرقة ويحكي تجربة مشابهة

تحدث السيناريست عمرو سمير عاطف عن واقعة اتهام الكاتبة نهال سماحة لفريق عمل فيلم "خيال مآتة" بسرقة فكرة فيلمها الأول، مطالبًا الجميع بعدم الانحياز لأي طرف حتى تظهر الحقيقة.
وكتب "عاطف" عبر حسابه الخاص بموقع التواصل الاجتماعي "فيسبوك": "بخصوص موضوع سيناريو فيلم احمد حلمى والكاتبة نهال سماحه أنا بانصح الجميع بعدم الانحياز لطرف أو افتراض سوء او حسن النية لان الموضوع المفروض انه ياخد شكل قانونى وعندنا جهات قادرة انها توضح الحقيقة ولو فيه حق ضايع يرجع لصاحبه ولو فيه تجنى واتهام باطل يبان برضه".
وحكى "عاطف" تجربة مشابهه: "انا بس حابب انى انتهز الفرصة واحكى تجربة شخصية كانت مشكلة واوضح ازاى اتحلت عشان اى سيناريست يقدر يحافظ على حقه لو سيناريو هو كاتبه اتسرق ويعرف يدافع عن نفسه وياخد حقه الأدبي والمادي لو حد ادعى عليه زورا وبهتانا أنه سرق منه فكرة او سيناريو".
وأضاف: "لما كنت بكتب رقم مجهول فجأة لاقيت سيناريست مجهول بيدعي ان المسلسل مسروق منه وانه قدم نفس الموضوع للرقابة من سنه والكلام ده ما اتقالش عادى ولا السيناريست ده -اللى هو طبعا ولا سيناريست ولا حاجه - حاول يستوضح الحقيقة او يقرا حلقة او حلقتين من المسلسل او يستنى ويتفرج -زى ما نهال بتقول انها عملت - قبل ما يتهمنى بالسرقة لاء ده راح على طول للصحافة وفوجئت بسيل من الاخبار بتتكلم عن ان المسلسل اتاخد من كاتب شاب وانه ها يرفع قضية وانه بيهدد وانه ليه حق والمؤلم فى الموضوع ان فيه ناس اعرفهم ويعرفونى كويس لاقيتهم مصدقين ان ده حصل فعلا وفيه منهم اللى راح للكاتب ده وقاله ما تسبش حقك واحنا معاك".
وتابع: " ساعتها كنت كاتب 15 حلقة من المسلسل وقابلت المنتج فلاقيته هو كمان عنده شك فى ان احتمال ده يكون حصل فعلا وقالى ما ندى للواد ده اى حاجه انا اتضايقت جدا ورفضت تماما الكلام ده وصممت انى مش ها اثبت ان ده ما حصلش وبس لاء ده انا كمان ها اسجن المدعى ده وها ارفع عليه قضية تعويض ..وتوقفت عن كتابة المسلسل لمدة اسبوعين ورحت للرقابة على المصنفات الفنية عشان اعرف ايه الحكاية بالظبط لاقيت ان الكاتب ده مقدم نص اسمه "رقم خاص " وان ده هو كل التشابه اللى بين العملين " الاسم" وساعتها احنا كنا مسميين المسلسل رقم خاص فغيرناه وبقي رقم مجهول وانتهت المشكلة ! بس انا كنت باغلى كنت فى قمة الغضب والشعور بالاهانة وصممت انى اوكل محامى وارفع قضية رد اعتبار".
وواصل: " دورت على محامى كويس لغاية ما الاصدقاء والزملاء دلونى على محامى مخضرم بيشتغل مع المنتج هشام عبد الخالق فى شركة الماسة اتصلت بيه وحكيتله الحكاية قالى انت بعتت القصة دى بالميل لاى حد قلتله ايوه بعتها لشريف عرفه سنة 2009 قالى خلاص الميل بيثبت التاريخ قلتله طيب واللى قال انى سرقت ده اعمل معاه ايه قالى تسيبه للزمن وتركز فى شغلك ياباشا ..هديت طبعا تماما وابتديت انسي الموضوع والحكاية انتهت بسرعة زى ما ابتدت".
واختتم: "لو عندك قصة او سيناريو ابعته اى ميل ولو لنفسك كده انت اثبتت انه اتكتب فى التاريخ بتاع الميل لو حد ادعى عليك زورا انك سارقه ها يبقي من السهل جدا انك تثبت كذبه ولو حد سرقك ها يبقي سهل جدا انك تجيب حقك وانا بانصح الكاتبه نهال لو هى متأكده تماما ان الفيلم متاخد منها انها تختار احد طريقين اما انها تتخذ اجراءات قانونية واكيد هى بعتت الموضوع بالميل فى تاريخ يسبق تاريخ كتابة الفيلم او انها تتجه للصحافة والفيس بوك وتبقي المعركة بتدور على مرأى ومسمع من الجميع وده مش فى صالحها ولا فى صالح اى حد ولا ها يرجع حق ولا ها ينصف حد .
مره تانيه انا مش منحاز لطرف وعارف ان احمد حلمى محترم جدا -وفق كل اللى اتعاملوا معاه - وفى ضوء اللى انا سمعته عنه متأكد تماما ان لو نهال اثبتت حقها هو ها يكون اول واحد يردلها اعتبارها بس نستنى كلنا ونشوف الطريق القانونى ها يثبت ايه قبل ما ندافع عن حد او نهاجم حد".