مؤلفة رواية "متربول" تفتح النار على المصنفات الفنية

فتحت الروائية ريم أبوعيد النار على المصنفات الفنية، وكشفت في تدوينة نشرتها منذ قليل على صفحتها بموقع التواصل الاجتماعي "فيس بوك" عما حدث مع سيناريو فيلمها "متربول" الذي كانت قد قدمته للرقابة للحصول على موافقة بتصويره، وقالت: "الپوست ده لتوثيق الحقائق والمعلومات، التحقيق اللي الشئون القانونية شغالة فيه مع رقابة المصنفات الفنية واللي تم ابلاغي بيه شخصيا من اللي بيحقق في الموضوع، ان الرقباء التلاتة اللي قروا سيناريو فيلمي متروبول لتقييمه كتبوا كلهم تقارير بالموافقة عليه وإجازته ومشافوش فيه اي حاجة مخالفة للضوابط الرقابية ولا ما يستدعي إحالته لأي جهة أمنية".
وتابعت قائلة: "وبعتوا تقاريرهم المكتوبة لمديرهم ناجي عبدالله اللي ضرب بالتقارير التلاتة عرض الحائط وكتب تقرير فيه معلومات غلط عن الفيلم ومالهاش أساس من الصحة عشان تبقى سبب أنه يطلب إحالته لجهات امنية لتعطيله، اللي كتبه ناجي عبدالله عن السيناريو أنه فيه عن تهجير اليهود من مصر وطبعا ده مش موجود أصلا لا في الرواية المطبوعة ولا سيناريو الفيلم اللي قدمته للرقابة ولا تقارير الرقباء اللي قروا السيناريو لتقييمه".
واستطردت قائلة: "السيد ناجي حط في تقريره سبب مش موجود اصلا عشان يبقى حجة انه يقولي هيبعت السيناريو لجهات امنية ومقاليش طبعا اللي هو كتبه في التقرير قالي سبب تاني خالص مجرد ان الفيلم فيه عيلة يهودية من الأربعينيات، وطبعا ده مش سبب أصلا يخلي العمل يروح اأي جهة أمنية لفحصه فهو حط بهارات من عنده في تقريره عشان يبقى السبب محبوك، الفيلم أنا قدمته للرقابة نص نوفمبر 2017 واتوافق عليه من الرقباء التلاتة في أوائل ديسمبر 2017، وناجي عبدالله لما كان فريند عندي على فيسبوك شاف اني مطبلاتية ده المصطلح اللي هو استخدمه لما جت سيرتي قدام شخص ما وقاله عمل لي بلوك عشان كده هو حر طبعا في ده ولما انا لاقيته عملي بلوك بعد ما بلغني بموافقة الرقابة على السيناريو بفترة قصيرة قالي تعليمات من الرقابة!!!!، بس مش حر ومش من حقه لانه شايف تاييدي للريس والدولة تطبيل انه يكتب تقرير باطل عن السيناريو بتاعي عشان يبقى حجة يطلب تحويله لجهة امنية منها يعطلي استلام السيناريو ومنها يصور لي ان الجهات الامنية هي اللي ماخرة العمل لسبب غير معلوم".
واوضحت: "السيد ناجي قالي في الاول انه سلم العمل للشؤون المعنوية وطبعا ده محصلش وفضل شهر يقول كده لغاية ما بدات اسال بنفسي في الشؤون المعنوية واكتشفت طبعا ان السيناريو معداش عليهم اصلا ولا يعرفوا عنه حاجة ووقتها كلمته قلتله اني سالت في الشؤون المعنوية ومافيش حاجة هناك فغير كلامه وقالي يبقى راح للامن القومي والامن الوطني واداني رقم وارد فهمني ان السيناريو اتورد بيه للجهات دي بس ارقام الوارد دي شكلها طلعت لجهة داخل وزارة الثقافة مش خارجها وهي الشؤون الامنية في وزارة الثقافة اللي مكتبها في نفس المبنى اللي فيها ادارة حقوق المؤلف في المساحة واللي اتسرب منها سيناريو حلقات مسلسل متروبول وراح للعدل جروب، والسيد ناجي عبدالله اجاز مسلسل اختفاء عادي جدا ومشافش فيه اي تشابه بينه وبين فيلمي اللي اتعرض عليه برضو واللي كتب له تقرير مالوش علاقة بموضوعه ولا محتواه عشان يوقفه في الوقت اللي مرر فيه مسلسل منقول عنه موضوع وفكرة واحداث ".
وأنهت التدوينة قائلة: "ولا يزال البحث عن سيناريو فيلمي متروبول مستمرا، ومين عارف يمكن السيناريو مطلعش أصلا من الشئون الأمنية في وزارة الثقافة أو يمكن مراحلهومش أصلا من الرقابة كله هيبان في التحقيقات".
يذكر أن ريم قامت بتحرير محضر ضد صناع مسلسل "اختفاء" مؤكدة أن العمل مأخوذ من روايتها "متربول" التي كانت طرحتها منذ فترة وكانت تنوي تحويلها لعمل فني.