دعاء فاروق: أتعرض لمضايقات لارتدائي الحجاب

قالت الإعلامية دعاء فاروق، إنها تعرضت لمضايقات لارتدائها الحجاب، مضيفة: "لبست الحجاب من 16 سنة وعمرى ما شوفت سيدة غير محجبة وسألتها ليه مش لابسة الحجاب، لكن أنا خلاص الناس قربت تدخل جوا الإيشارب".
وأوضحت " فاروق" خلال لقائها في برنامج "لعلهم يفقهون" المُذاع على فضائية "dmc" اليوم الأربعاء، أن هناك من هاجمها سواء بأسلوب رقيق أو عنيف على ارتدائها الحجاب بحجة أنه ليس فرضًا من الله عز وجل.
وتابعت: "أنا لست متخصصة، أنا سيدة فى حالى لكنى بدافع عن الحجاب".
يذكر أن الإعلامية دعاء فاروق، ردت على ما نشر حول رغبتها في خلع الحجاب، قائلة: "قاموا باجتزاء المقال على طريقة ولا تقربوا الصلاة، وقاموا بعمل عناوين منه لعمل تريند".
وأكدت "فاروق"، خلال تقديم برنامجها "اسأل مع دعاء"، المذاع على فضائية "النهار"، أن حديثها كان في سياق المقال، لافتة إلى أنها ارتدت الحجاب منذ 16 عامًا ولم تقف عند هذا الحدث، إلى أن تم محاصرتها بلغط وتشكيك في النيات.
وتابعت: "تغطية الشعر حسب فهمي للقرآن الكريم مباشرة دون إملاءات هو فرض مباشر من رب العالمين"، موضحة أن الآية رقم 31 من سورة النور تؤكد فرضية الحجاب مثل حفظ الفرج وغض البصر.
وعن انتقاد البعض لها بسبب استخدام "المكياج"، ردت قائلة: "قد يكون تجاوز مني وقد يكون بسبب الإضاءة، مافيش حد كامل، وربنا يهدينا جميعًا".
وقالت "دعاء": "الحجاب مش فرض.. صح انتو صح هو فعلا مش فرض.. والله يجازي اللي كان السبب اللي اخترع كلمة فرض دي ولزقها في الحجاب وكأن المقابل ليها إنه سنة، هو لا فرض ولا سنة هو أمر مباشر من رب العالمين.. زي غض البصر وحفظ الفرج في الآية الكريمة في سورة النور، وتضمن الآية حفظ الفرج وعدم إبداء الزينة لغير المحارم".
وأضافت: "هل ينفع أطلع أقول حفظ الفرج فرض؟ ويطلع ناس تقول لا مش فرض ربنا، مقالهاش صريحة إنه فرض.. هو أمر مباشر.. قل للمؤمنات يحفظن فروجهن.. حد ينفع يقاوح فيها ياخوانا، معتقدش أن ينفع يحصل في دي بالذات لغط خالص، وكمان في نهي مباشر أهوه (ولا يبدين زينتهن إلا ما ظهر منها).. يا سلام محددش الزينة إيه، براءة يا بنات البسوا مايوهات وانطلقوا براحتكم وأنا معاكم بقى".
وأشارت إلى أن الله أمر ب"ضرب الخمار على الجيوب"، والتي تعني ارتداء الحجاب وتغطية منطقة الصدر، طبقًا لجميع المعاجم اللغوية، المعرفة لكلمة "خمار" بأنه غطاء للرأس، متابعة: "مفيش كلمة هتيجي في القرآن مالهاش لازمة أو مالهاش فايدة وبالتالي لما ربنا يحطها في سياق الأمر المباشر يبقى منتفلحسش ونقول لا أصلها مالهاش معنى ولا تدل على شيء!! والجملة الدارجة اللي مبسمعش غيرها؛ ما لو ربنا كان عاوز يقولنا اتحجبوا كان قالها صريحة!! يا صلاة النبي! ربنا سبحانه وتعالى هيقولنا اتحجبوا يا بنات؟ ليه بنسمع شريط عمرو خالد؟".
واستطردت: "الشعر تاج المرأة وتلات أربع حلاوتها متغطية بتغطية شعرها.. راجع تحدي العشر سنين وشوف اللي كانوا محجبات وقلعوا شكلهم بقى ايه..؟!!! طبعا احلوا مليون مرة واللي تقول غير كده كدابة في أصل وشها لامؤاخذة".
وأردفت: "والله كان بودي أخلع الحجاب أنا كمان وأظهر أصغر من عمري بعشرين سنة بس مش هقدر أعمل كده لأن الآية واصلالي صريحة ومافيهاش أي لبس.. والموضوع متقفل من جميع الجهات".
واختتمت حديثها: "هو بس الحجاب اللي واقفين قايمين نايمين بيه يا حشريين، ايه اللي دخلكم في اللي مالكوش فيه اصلا.. خليك في نفسك يابا منك ليه جتكو الهم، كل واحد فيه العبر، وماسك لي في اللي لبست واللي قلعت.. قوم جتك الهم صالح أمك اللي كاشفة راسها وبتدعي عليك من عمايلك السودا وانت ماسك لي في اللي لبست الطرحة واللي قلعتها.. فنتنيل كلنا، ونخلينا في ذنوبنا ونلحق نستغفر ونتوب عشان كلنا ميتين"، داعية في ختام منشورها بحسن الخاتمة.