ميدو العالمي . اشتغل علشان تاخد مش خُد علشان تشتغل!

لو كل خطوة سألت هاخد كام .. مش هتوصل.. مش هتنجح.. ممكن تكون محتاج فلوس بس مش كل اللى بيعمل فلوس بيوصل لحلمه.. محتاج تحدد انت عايز ايه؟ تحقق حلمك ولا تعمل فلوس.

أحمد حسام ميدو من أهم اللاعبين اللي احترفوا خارج مصر.. مش بس كدة يمكن أكثر اللاعبين المصريين شهرة عالمية.. أنت مقتنع به او مش مقتنع دي حاجة ترجعلك بس متقدرش تنكر انه ناجح .. وحقق اللى ناس كثيرة بتتمنى تحققه.

ميدو لما كان عنده 17 سنة تم تصعيده للفريق الأول للزمالك لعب مباراتين وسجل 3 أهداف اتعرض عليه أنه ياخد 135 الف جنيه في السنة زي الفئة الأولى اللى هما اللاعبين الكبار.

في نفس التوقيت ده جاله عرض من فريق اسمه جينت البلجيكي عارفين بكام؟ ببلاش.. اه والله العظيم ببلاش .. المقابل كان أنه يقعد في شقة وأنه ياخد بدل انتقالات على أساس أنه معهوش عربية وهيروح النادي بمواصلات.

كان بيروح النادي بالمترو ويدخل على رجله .. وزملائه بيروحوا التمرين بعربيات أحسن موديل .. الغريب أن كل اللاعيبة كانت بتتريق عليه علشان إزاي لاعب معاهم بيجي في مواصلات، مركزشي معاهم نهائي وركز بس في التدريبات وفي المباريات.

قعد في بلجيكا سنة جاله عرض من اياكس الهولندي بمرتب سنوي 2 مليون يورو .. متحاولش تحسبها علشان المقابل هيكون كبير.

ميدو مابصش تحت رجله.. مسألش هياخد كام؟ .. خلى شغله هو اللي يجيبله ملايين.. وعلشان كدة وصل.

موقف ميدو وهو صغير اتكرر تاني وهو كبير.. قبل ما يعتزل كان شايف نفسه في التحليل فراح يحلل ماتشات الدوري الإنجليزي من أرض الملعب على أبوظبي الرياضية.. ساعتها قرر مياخدش فلوس.. كان عايز يجرب، يشوف هيعرف يكمل ولا لأ؟.

ميدو كان أحسن واحد بيحلل فقررت إدارة قناة أبوظبي إنها تعمل اسبوع فيه تحليل للمباريات كلها وطلبت ميدو يكون من ضمن فريق العمل.. بس ساعتها ميدو طلب ياخد مقابل مادي 50 الف دولار علشان يعوض كل الشغل اللى اشتغله ببلاش..

الشوية اللى اشتغلهم في ابوظبي فتحوا طرق كثير وكانوا سبب رئيسي في انه يكمل الشغل في التحليل ثم التدريب .. لو فكرت في كل خطوة في حياتك هتاخد كام عمرك ما هتوصل؟.

خلى مبدئك في الحياة:
أشتغل.. علشان تاخد
مش تاخد علشان تشتغل!