"حكايات كابتن ميزو" هي زاوية ثابتة يقدمها "الفجر الرياضي" كل جمعة يتناول فيها حكاية طريفة في عالم الساحرة المستديرة . وفي حكاية هذا الأسبوع، نستعرض دليل المشجع المصري في روسيا بطريقة فكاهية بعد تأهل المنتخب الوطني إلى المونديال للمرة الثالثة في تاريخه.
تأهلت مصر كأس العالم 2018، والمقرر إقامته روسيا، حيث ستكون الأنظار والأعين متجهة صوب الدب الروسي في شهر يوليو المقبل، من أجل مشاهدة الحدث الكروي العالمي، الذي يحدث كل 4 سنوات، لا سيما الكثير من المصريين الذين يشاهدون الفراعنة لأول مرة في المونديال، بحكم أنهم لم يعاصروا مونديال 1990 بإيطاليا، وهي البطولة الأخيرة التي تأهلت إليها مصر.
الجميع بدأ يتحدث كيف له أن يسافر إلى روسيا، وهل من الممكن أن ندعم الفراعنة من قلب موسكو، وهنا نستعرض بعض النصائح والإرشادات التي من المفترض تطبيقها عند الوصول إلى الأراضي الروسية ومحاولة التعامل مع أبناء فلاديمير بوتين، حاكم بلاد السحر والجمال.
وإليكم دليل المشجع المصري على النحو التالي:
* الروس مش بيحبوا يتكلموا انجليزي يعني محدش هيفهمك ولا انت هتفهم حد * نسوان روسيا مش قاعدين في المطار مستنيين * اعمل اي حاجة في روسيا إلا الاغتصاب و المخدرات و الإرهاب ، غير كده عيش يا معلم * في روسيا ممنوع التدخين في الاماكن المقفولة و في الحدائق العامة و محطات الاوتوبيسات اللي في الشارع * لو هتمشي تتكلم بصوت عالي و تضحك بصوت عالي في الشارع هيبصولك بقرف * لو بصيت على واحدة و تنحت ممكن تقولك بتبص على ايه و ممكن تتخانق معاك * الروس عندهم استعداد للأشتباك بالايدي و المشاجرة في اي وقت و اي مكان * الجو شهر 6 في روسيا بيبقى عامل زي اخر اسبوعين في مارس بتاع مصر و ممطر * ابوس ايدك بلاش تحرش * ضابط الجوازات في المطار من حقه يرفض دخولك البلد بدون اي سبب،، و بتحصل كتير اوي اوي اليومين دول * الروس عالم صايعة و النصب هنا منتشر * ليك مهلة اسبوع من وصولك البلاد و تعمل حاجة كده اسمها ريجستراتسا ( ورقة كده مكتوب فيها مكان اقامتك و مدة اقامتك جوه البلد) و لو مش معاك الورقة دي و الشرطة وقفتك المفروض قانوني بتدفع غرامة 7000 روبيل في البنك الوطني الروسي او بتاع الشرطة هياخد منك فلوس و يسيبك * ممنوع السير في الشارع و انت شايل في ايدك ازازة خمرة و ماشي بتشرب منها و بتعربد *ارجوك بلاش تحرش * في روسيا محلات السلاح اكتر من مطاعم ماكدونالدز وغالبية الشباب معاهم سلاح ابيض او مسدس بيضرب بلي بيعور * نسيت اقولك انهم شايلين السلاح بالتصريح بتاعه عادي خالص * حاول متتصاحبش على حد علشان هم اصلا مش بيحبوا الاجانب ففي الغالب هيبقى عايز يعمل عليك مصلحة ويستغلك * حاول متغيرش فلوس غير في البنك او مكاتب الصرافة و خلي بالك الفلوس المضروبة كتيرة هنا * نسبة كبيرة من الروس نزلوا مصر و داقوا حوارات المصريين * بلاش معاكسات ارجوك و خليك واجهة حضارية لبلدك * هتعدي الشارع بص على الاشارة و متعديش غير في اشارتك علشان لو اتمسكت هتدفع غرامة * الروس بيمشوا يتفوا و ينفوا في الشارع بلاش تعمل زيهم * كل محطة اوتوبيس بيبقى متعلق فيها يافطة مكتوب فيها ارقام الاوتوبيسات اللي بتعدي عليها و مواعيدها * روسيا فيها كاميرات في الشوارع والمحلات ومداخل البيوت والمولات والعمارات ومفيش خرم ابره مفيهوش كاميرا * باسبورك زي جلدك متروحش في حته من غيره هو و الريجستراتسا و الورقة الصغيرة اللي هتاخدها من ظابط الجوازات في المطار * الورقة اللي هتاخدها من ظابط الجوازات في المطار اسمها ايميجراسيونا كارتا هتسلمها تاني في المطار وانت مغادر * باسبورك لو ضاع تتوجه لأقرب قسم شرطة و تعمل محضر وبعدين تتوجه للقنصلية و تشوف هيعملوا ايه معاك * موسكو فيها شبكة مترو انفاق كبيرة جداً و كلها تحف معمارية من ثلاثينات القرن اللي فات وبيسموها قصور الشعب حوالي 14 خط مغطية العاصمة كلها حاول متتحركش جواها لوحدك و انت لسه جديد علشان هتتوه * حالياً الجنيه عامل حوالي 3.6 روبيل و متفتكرش ان فرق الارقام ده معناه انها دولة فقيرة . لو قعدت في مطعم و اكلت وشربت واتبسطت مش هتدفع اقل من 1000 روبيل * روسيا في الصيف جميلة جداً واللون الاخضر يسر العين لكن في الشتا جحيم بارد * موسكو من اغلى العواصم في العالم اعمل حسابك في فلوس كتيرة * هتكسر فيزة هتعيش زي المطاريد او هتتمسك و هتروح محكمة وهتاخد ورقة طرد لازم تغادر خلال 10 ايام و هتاخد ختم حرمان 5 سنين * وحياة امك يا شيخ بلاش تحرش * معظم المحلات و المولات و المطاعم و الصيدليات بتقفل من 10 مساء ماعدا محلات الورد 24 شغالين * حاول تعرف كام كلمة روسي غير خراشو علشان تعرف تتعامل هنا ( اسمها خراشو مش خراشوف على فكرة) * اول ما تقوم من النوم اعرف الطقس ظروفه ايه علشان هتلاقي شمس و هوا و سحاب و برق و رعد في يوم واحد ولازم يبقى معاك شمسية و الا هتتبل بجد * عادي اوي ان حد يوقفك و يشحت منك سيجارة ، هنا الكيف مناولة مش مقاولة * معظم الشعب معندهمش ثقافة الاستئذان من حد علشان يعدي فطبيعي لو لقيت حد زقك في طابور او في المترو او اي حتة علشان يعدي اوعى تقفش و تتخانق لأن ده الطبيعي بتاعهم هو مش شايف نفسه قليل الذوقو بعدين حضرتك تركب * لما المترو يقف حضرتك تقف على جنب لحد ما الركاب اللي نازلين ينزلوا وبعدين تركب.
