اللحمة تُشعل أزمة في مترو الأنفاق

مش عارفة ليه اليومين دول بركب مترو الانفاق يمكن عشان بتعب من السواقة وخصوصا عشان العيد والزحمة ولا عايزة اشوف ناس جديدة واشوف بيفكروا وبيتكلموا علي ايه هذه الايام ساعدني علي ذلك وجود المحطة في نفس الشارع الذي اسكن فيه . اول مرة ركبت المترو طبعا بسأل التذكرة بكام ومنين وفين زي مااكون مش مصرية زي باقي الخلق المهم ركبت اول يوم وانا سعيدة جدا تاني يوم نفس الطريقة ثالث يوم بدأت اتقلم وعارفة الطريق..ازاي اروح وازاي اجي .. وبحكم اني بحب الحكايات والقصص سمعت حديث ثلاث رجال عن عيد الاضحي واللحمة وغلو الاسعارواننا كنا نشتري العجل ونتقاسم فيه ودلوقتي مش قادرين حتي نتقاسم في خروف وبما انني ماشية علي نظام غذائي صارم امتنع فيه عن اللحوم والبط والسمن والزيت عشان صحتي واحافظ علي وزني وقوامي طبعا ماكدبتش خبر واتفلسفت وقلت بلاها لحمة بصيت لقيت كل الناس بصت لي كأني من كوكب تاني منتظرين اكمل الكلام وفعلا قلت ياجماعة بعد سن الاربعين لازم نقلل من اللحوم او نمتنع عنها عشان صحتنا وبما الان الاسعار ارتفعت ممكن استخدام البديل زي السمك والدجاج والارانب فردت سيدة بجانبي اننا عامة قللنا الاستهلاك لكن لانستطيع الاستغناء عن اللحمة قلت لها الرسول عليه الصلاة والسلام كان لاياكل اللحم وانما اللبن والبلح وغيره من الاكل البسيط ايه المشكلة ناكل البلح واللبن والجبن بالطماطم والخيار وردت اخري ازاي ده احنا لو يوم اكلنا كدة نحس ان احنا هفتانين ونفسنا في حتة لحمة او ِبطة حلوة ولا جوز فراخ عتاقي محمرين مش كفاية مفيش رفاهية في حياتنا فقلت لها اكيد مفيش رفاهية لاننا بنصرف كل فلوسنا علي الاكل ليه نجيب كل حاجة كام كيلو اشتروا بالنصف كيلو والربع كيلو فرد عليا رجل احسست انه متفهم قالي ان ديه افكارهم وثقافتهم ومش ممكن تغيريها ومن الصعب تفهمها قلت له والضغط والكلوسترول والقلب بعد الاربعين لازم ناخد بالنا ونقفل بقنا وفوجئت برد فعل الرجل الذي بدأ الحديث بيقول "اقفلي بقك " انت... سكر ضغط .. قلب .حأكل لحمة .
طبعا نزلت قبل محطتي بمحطة عشان مسمعش اكتر من كدة ولما وصلت العمل وبحكي لزملائي واولادي قعدوا يضحكوا ويقولولي كويس ان مضربكيش !!!
يضربني ليه هو انا عملت حاجة غلط ؟؟