دعاء فاروق: خلع الحجاب ليس شرطًا للنجاح وبرامجي الدينية مرحلة وانتهت

بعد 8 سنوات من تقديم البرامج الدينية، خرجت المذيعة التلفزيونية دعاء فاروق على المشاهدين ببرنامج مختلف يعتمد على "تواجد المواطنين والمتخصصين في تناول الأمور الحياتية أكثر من تواجد المشايخ".

وقالت المذيعة دعاء فاروق، إن برنامج "حياتنا" –الذي يعرض على قناة النهار- هو البرنامج الذي كانت تحلم بتقديمه طوال عمرها بعدما فرضت عليها نوعية من البرامج لم ترض طموحها الإعلامي.

وأضافت:"هو ده الشكل اللي كان نفسي أعمله اللي فيه تفاعل مباشر مع الجمهور، وبيناقش قصص من الحياة، وبيجمع بين التصوير الخارجي مع الناس واستضافتهم في الاستديو".

وانطلق برنامج حياتنا على قناة النهار أواخر مارس الماضي، وهو برنامج أسبوعي اجتماعي تفاعلي، حقق نجاحا لافتا خلال وقت قصير، ومن الموضوعات والفئات التي تحدث عنها مصر في عيون الأجانب المقيمين بها، الأقزام، التوائم، السفر.

وعن استمرارها في تقديم البرامج الدينية لعدة سنوات قالت "اتفرضت عليا لكني مدينة ليها بإني عملت قاعدة عريضة من الناس اللي حبتني وتابعتني".

وأضافت"قناة الحياة حطتني في القالب الديني الصرف كأي مذيعة محجبة بتتحط في قالب متر في متر، قماشة ضيقة، كانوا شايفين ان هو ده الشكل اللي يدوب نعمله، مذيعة وشيخ أو مذيعة ودكتور تسأل الأسئلة وتستقبل المكالمات وخلاص، وأزيد من كده مش مطلوب".



دعاء فاروق خلال تصوير حلقة عن أجواء رمضان في شارع المعز

وتابعت"رغم كده قدرت أوسع الإطار ده شوية لكن نوعية البرامج دي مكنتش بترضي طموحي الإعلامي وكنت حابة أنزل بنفسي وأروح أصور مع الناس وأناقش قضايا اجتماعية مختلفة".

وقدمت دعاء فاروق برامج دينية عبر قناة الحياة من أشهرها "كلام من القلب" و"الدين والحياة".

وتقول إن تلك المرحلة من حياتها التي استمرت 8 سنوات انتهت وحان الوقت للانتقال لمرحلة جديدة: "أعتقد ان كده كفاية وإلا كنت هسجن نفسي في إطار صعب أخرج منه".

وعبرت عن سعادتها الكبيرة بردود الأفعال على برنامجها الحالي :"الحمد لله البرنامج سمع وعمل صدى من أول حلقة، اللي جمعنا فيها أكبر عدد من التوائم في الاستوديو وتفاجئنا انها اتشافت بالملايين ولسه مستمرين".

وقالت إن ما يميز البرنامج "مفيش حاجة شبهنا وبنعمل حاجة مختلفة عن نوعية البرامج الموجودة، مفيش مذيع بينزل يصور خارجي بنفسه وده فارق مع الناس".

وعلقت على الهجوم الذي يطال المحجبات وآخره الهجوم على اللاعبات المصريات اللاتي شاركن في الأولمبياد،:"مش فاهمة إية اللي مضايقهم هي لابساه فوق رقبتك، دي بطلة رياضية ووصلت لريو وهي لابسة ومحتشمة ولبسها اللي أنت بتهاجمه مكنش عائق قدامها انها تتمرن وتوصل للمكان ده".



وأضافت "فيه اتجاهات للقلع الكل دلوقتي بيقول اقلعوا اقلعوا، واللي لابسين مش عاجبينهم انهم وصلوا، يعني أنت عاوز تقلعهم بحجة انهم يثبتوا نفسهم ومفيش حاجة تعيقهم ولما يوصلوا وهم لابسينه تنتقدهم انت إية مشكلتك ما كل واحد حر!"

وأشارت إلى كونها أول مذيعة محجبة تقدم برامج منوعات، قائلة :"كنت بستضيف نجوم وأغطي مهرجانات وأنا محجبة وبعدها قررت أقدم حاجات اجتماعية بتفيد الناس أكتر".

لم تقابل أي معوقات بعد ارتداء الحجاب عام 2002 قائلة:"الشيخ صالح كامل اللي ماسك الإيه آر تي أكتر حد متفتح في العالم وأول واحد طلع مذيعات محجبات يقدموا برامج عادية وبعده الجزيرة بدأت تخلي المحجبات يقدموا النشرة وبعدها المراسلين والمسألة بقت مفتوحة قدام المذيعات المحجبات".

وترى أن الحجاب ليس مقياسا للحكم قائلة :"فيه مذيعة شاطرة ومذيعة لا".

وعلقت على قرار د.صفاء حجازي رئيسة اتحاد الإذاعة والتليفزيون باستبعاد 8 مذيعات من الظهور على الشاشة لمدة شهر لحين عمل "ريجيم" لإنقاص وزنهن الزائد قائلة:"عندها حق، وفيه مقاييس شكلية للظهور في التليفزيون ولازم المذيع يبقى شكله مقبول، وبعدين هي مستبعدتهمش نهائي إنما لحد ما يخسوا".

وتثير أناقة المذيعة دعاء فاروق انتباه الفتيات والسيدات اللاتي يتابعنها وتقول:"معنديش استايلست وبختار لنفسي اللبس، ساعات بنلبس اللبس مع تغيير القميص والطرحة فيبان مختلف أو بستعين بدواليب اخواتي، وأيام البرنامج اليومي أحيانا كان فيه سبونسرز (رعاة) بيلبسونا".

وتخرجت دعاء فاروق من كلية الآداب قسم اللغة الإنجليزية - جامعة طنطا، وتم قبولها للعمل كمذيعة في شبكة راديو وتلفزيون العرب عام 1998، وعملت في قناة المنوعات وإية آر تي العالمية، وانتقلت دعاء فاروق للعمل في قناة الحياة عام 2008 وتقدم حاليا برنامج "حياتنا" على قناة النهار.