أدمن "أسف يا ريس" يشن هجوما على السيسي بعد اتهامه الخطير لمبارك

شن أدمن صفحة "أسف يا ريس"، كريم حسين، هجومًا حادًا على الرئيس السيسي بعد اتهامه لمبارك بأنه "جاب البلد الأرض"، قائلًا له: "اللي جاب البلد على الأرض ياريس هو اللي سمح وهو في المخابرات الحربية أن حماس تخترق الحدود بعربيات الدفع الرباعي وبالأسلحة التقيلة وتقتحم السجون وتضربها بالمدافع وتهرب رجالتها وتدخل وتخرج بل وتخطف ظباط شرطة ومجندين من غير ما حد يعترضها.. وأنا عامله نفسي نايمة".
وأضاف كريم، عبر حسابه على "فيس بوك"، "اللي جاب البلد على الأرض ياريس هو اللي حاكم وحاسب مبارك على قتل المتظاهرين مع أنه كان منزل حضراتكم من يوم 28 يناير وهو اللي عمل نفسه مش شايف طنطاوي ولا باقي أعضاء المجلس ولا حاسبهم على مجزرة محمد محمود ومجزرة ماسبيرو ومجزرة استاد بورسعيد.. إعمل نفسك ميت.. واللي جاب البلد على الأرض ياريس هو اللي عمل أول حزب سياسي رسمي للإخوان وجاب منهم رئيس وهو عارف أنه هربان من سجن وادي النطرون.. وماله مش عيب يا خويا".
وتابع: "اللي جاب البلد على الأرض ياريس هو اللي كان بيضرب التحية العسكرية لمحمد مرسي، وكان بيقسم في فيديو شهير ليه أنه كان بيخدمهم لآخر لحظة.. إسرة واحدة من بعضيهم، واللي جاب البلد على الأرض ياريس هو اللي تاجر بفقر المواطن الغلبان في القنوات والخطب وقام رافع عليه الأسعار وشايل من عليه الدعم الميه والكهرباء والسلع.. هتكلوا مصر يعني.. اللي جاب البلد على الأرض ياريس هو اللي طلع وقال الناس إن المية بتتباع بسعر قليل ومش هنقدر نبيعها بالسعر ده ولازم نرفعه.. أنا مش قادر أديك".
واستطرد: "اللي جاب البلد على الأرض ياريس هو اللي ضيع 36 مليار دولار احتياطي نقدي و9 مليار دولار وديعة حرب الكويت.. اللي جاب البلد على الأرض هو اللي طلع وقال لوزير الإسكان أنا اللي بقولك ارفع أسعار الشقق.. الجنة يدخلها الفقراء.. اللي جاب البلد على الأرض ياريس هو اللي الدولار في عهده بقى ب10 جنيهات لأول مرة في تاريخ مصر".
وأردف: "اللي جاب البلد على الأرض ياريس هو اللي السياحة بقت صفر في عهده.. إنها رجس من عمل الشيطان.. اللي جاب البلد على الأرض ياريس هو اللي جنوده عمال تتقتل وتتدبح وتستشهد كل يوم وتتصور فيديو وهو يروح يقولهم يارتني كنت أنا.. قلب الأم بقى.. اللي جاب البلد على الأرض ياريس هو عمال يستلف قروض من البنك الدولي ضعف عدد القروض اللي استلفتها مصر في تاريخها.. ليك وهتاخد وعليك وهتدفع".
وقال: "اللي جاب البلد على الأرض ياريس هو اللي ضحك على الناس المرضى الغلابة بجهاز عبدالعاطي بتاع الكفته وطلع في الآخر فنكوش.. اللي جاب البلد على الأرض ياريس هو اللي طلع يشحت على دولة 7000 سنة برسالة بجنيه.. اللي جاب البلد على الأرض ياريس هو اللي مبيبقبلش لأي شخصية ليها حضور في الشارع أو شعبية إنها تبقى موجودة في مصر على طول يبقى مكانها ياما في السجن ياما في التربة يا أما في الإمارات.. اسمعوه هو بس".
وختم: "اللي جاب البلد على الأرض هو اللي ممكن يلفقلي قضية ويحبسني علشان بوست تافة زي اللي أنا كاتبه ده".
وكان السيسي، قال في حوار مفتوح مع المثقفين، "حسني مبارك منه لله، هو اللي خرب البلد، وكان لازم يمشي من 15 سنة أو أكثر، قبل أن نسقط في هذا الخراب والانهيار في كل مؤسسات مصر، وكنت أتمنى أن يترك الحكم بدون ثورة، لأن الثورة للأسف أتت فأكملت على البقية الباقية من مصر، وهذا لا يعني عيبًا في الثورة لكن طبيعة الثورات أنها تفكك البلاد، وفى النهاية أراد الإخوان أن يقضوا على البقية الباقية بعد كل هذا الخراب".