«أبناء مبارك» للسيسي: «جبت البلد على الأرض»

ردًا على تصريحاته

رد كريم حسين، أدمن صفحة "إحنا آسفين يا ريس" المؤيدة للرئيس الأسبق حسنى لمبارك، على تصريحات الرئيس عبدالفتاح السيسي، خلال لقاءئ بالمثقفين أمس، التي قال فيها إن "مبارك هو اللى جاب البلد على الأرض" .
وكتب حسين عبر صفحته على موقع التواصل الاجتماعي: " اللي جاب البلد على الأرض ياريس هو اللي قال في 2010 أن ستظل راية مصر خفاقة تحت قيادة أبنها البار حسنى مبارك وطلع بعد ما مبارك مشى وقال أنا قولت من 2005 أنهم مش هيمشوا إلا لما يخربوها ، اللي جاب البلد على الأرض يا ريس هو اللي سمح وهو في المخابرات الحربية إن حماس تخترق الحدود بالعربيات الدفع الرباعي و بالأسلحة الثقيلة و تقتحم السجون وتضربها بالمدافع وتهرب رجالتها وتدخل وتخرج بل وتخطف ظباط شرطة ومجندين من غير ما حد يعترضها ".
وأضاف :"اللى جاب البلد على الأرض ياريس هو اللي حاكم وحاسب مبارك على قتل المتظاهرين مع أنه كان منزل حضراتكم من يوم 28 يناير و وهو اللي عمل نفسه مش شايف طنطاوى ولا باقى أعضاء المجلس ولا حاسبهم على مجزرة محمد محمود و مجزرة ماسبيرو ومجزرة إستاد بورسعيد ،اللى جاب البلد على الأرض ياريس هو اللى عمل أول حزب سياسي رسمى للإخوان المسلمين وجاب منهم رئيس وهو عارف أنه هربان من سجن وادى النطرون ".
وواصل :"اللى جاب البلد على الأرض ياريس هو اللى كان بيضرب التحية العسكرية لمحمد مرسى وكان بيقسم فى فيديو شهير ليه أنه كان بيخدمهم لأخر لحظة ،اللى جاب البلد على الأرض ياريس هو اللى ضحك على الناس وأخد منهم 86 مليار جنية فى تفريعة عمال تخسر وبيسدد فوايدها من الأسعار اللى رفعها على الناس من النحية التانية ،اللى جاب البلد على الأرض ياريس هو اللى تاجر بفقر المواطن الغلبان فى القنوات والخطب وقام رافع عليه الأسعار وشايل من عليه الدعم المية والكهرباء والسلع ".
وتابع :"اللى جاب البلد على الأرض ياريس هو اللى طلع وقال الناس ان المية بتتباع بسعر قليل ومش هنقدر نبيعها بالسعر دة ولازم نرفعه،اللى جاب البلد على الأرض ياريس هو اللى ضيع 36 مليار دولار إحتياطى نقدى و 9 مليار دولار وديعة حرب الكويت ،اللى جاب البلد على الأرض هو اللى طلع وقال لوزير الأسكان أنا اللى بقولك أرفع أسعار الشقق اللي جاب البلد علي الأرض ياريس هو اللي راح اعترف رسميا بسد النهضة ووافق علي إتفاقية إنشاءه ،اللى جاب البلد على الأرض ياريس هو اللى الدولار فى عهده بقى ب10 جنية لأول مرة فى تاريخ مصر".
واستطرد :"اللى جاب البلد على الأرض ياريس هو اللى السياحة بقت صفر فى عهده ،اللى جاب البلد على الأرض ياريس هو اللى جنوده عمال تتقتل وتتدبح وتستشهد كل يوم وتتصور فيديو وهو يروح يقولهم يارتنى كنت أنا ،اللى جاب البلد على الأرض ياريس هو اللى بيتعامل مع رجال الأعمال بسياسة شخلل علشان تعدى اللى عايز ميدخلش السجن يشخلل واللى عايز يرجع يدفن فى البلد يشخلل واللى عايز يقفل قضية يشخلل ،اللى جاب البلد على الأرض هو اللى استعان برجالة الراجل اللى جابها على الأرض فى المناصب الوزارية والحكومية ،اللى جاب البلد على الأرض ياريس هو عمال يستلف قروض من البنك الدولى ضعف عدد القروض أللى استلفتها مصر فى تاريخها ،اللى جاب البلد على الأرض ياريس هو اللى ضحك على الناس المرضى الغلابة بجهاز عبد العاطى بتاع الكفته وطلع فى الأخر فنكوش"
واختتم أدمن صفحة "إحنا آسفين ياريس": "اللي جاب البلد علي الأرض ياريس هو اللي عدد الجنازات في عهده بقت اكتر من عدد الانجازات بتاعته ،اللى جاب البلد على الأرض ياريس هو اللى طلع يشحت على دولة 7000 سنة برسالة بجنية ،اللى جاب البلد على الأرض ياريس : هو اللى مبيبقبلش لأى شخصية ليها حضور فى الشارع أوشعبية إنها تبقى موجودة فى مصر على طول يبقى مكانها يأما فى السجن ياما فى التربة يا أما فى الإمارات ،اللى جاب البلد على الأرض هو اللى ممكن يلفقلى قضية ويحبسنى علشان بوست تافة زى اللى انا كاتبه دة".
شاهد الصور..