بليز... مسيو فريد العملية مش ناقصة

بقلم : صالح شيحة
تصدقنى يا فريد بيه الديب لو قلتلك إن أنا صدقتك ....لازم طبعا أصدقك لأن كلامك مقنع وحسيت إن أنا وحش لأنى صدقت الناس الوحشة بتوع ميدان التحرير اللى قالوا على أبوجمال إنه حرامى وعنده 70 مليار ...أنا عارف يا حاج فريد إن أبو جمال فعلا معندوش غير 6 مليون جنيه مصرى وبأتحدى معاك أى حد يقول غير كده .....
فضلوا يطلعوا إشاعات إن أبوجمال عايز يورث جمال الحكم ...مع إن الكلام مش صحيح أبوعلاء مكنش ناوى يورث إبنه جمال حكم مصر بأمارة إن الصحفى رضا هلال محدش لمسه ...وعمرنا ما شفنا جمال بيتدخل فى كل حاجة وأنا عن نفسى عمرى ما شفت جمال بيتكلم فى مؤتمرات الحزب الوطنى ...متزعلش يا حاج فريد ...دول حبة عيال وزى ما كان أبو جمال بيقول خليهم يتسلوا ....
ربنا يباركلك يا حاج فريد لأن كلامك كله حق ... فعلا أبو جمال كان مؤيد للثورة ...وفعلا شباب الثورة عمرهم ما طلبوا إن أبو جمال يرحل بس الراجل قال يرتاح شوية ...حقه بقاله 30 سنة عمال يخدم فى البلد ...مالى البلد حرية وعدالة إجتماعية ...عايز تجيب عيش فى ثانية بتجيب أحلى عيش ...الأنانيب متوفرة وإشاعة إن الغاز الطبيعى كان بيتصدر لإسرائيل بسعر قليل مش صحيحة ....بأمارة إن مصر محصلش فيها أى أزمة أنانيب ...
الشعب يستاهل.... محمدش ربنا ...هيجيبوا منين ريس زى أبو جمال وفعلا الشرطة مفتحتش السجون للمساجين دى عناصر أجنبية من حزب الله هما اللى فتحوا السجون .....
ياعم فريد حرام عليك الناس مش ناقصة اللى حصل فى ميدان التحرير كله كان بأمر مبارك أيوه كان بأمره لما يشوف الشباب بيتقتلوا بسببه ويسكت يبقى لازم يتحاكم ....ياعم فريد ده كان قاعد فى غرفة عمليات القوات المسلحة وشايف الشباب بيتقتل ومعملش حاجة مع إنه كان يقدر يعمل كتير ....
بليز... مسيو فريد العملية مش ناقصة ..