بالفيديو.. تامر أمين يرد على منتقدي حديثه عن "المجلس الأعلى للعالم"

أوضح الإعلامي تامر أمين حقيقة الفيديو الذي انتشر له على مواقع التواصل الاجتماعي أثناء حديثه في برنامجه عن وجود "مجلس أعلى للعالم" يتحكم في ظواهر كونية، مؤكدًا أن الكلام اقتطع من سياقه.

وقال "أمين"، في حلقة برنامجه "من الأخر"، مساء الخميس: "لقطة بس بسرعة كدة تنويه عايز أقوله لحضراتكم، رغم إن أنا مش من أنصار طول الوقت الرد على مواقع التواصل الاجتماعي وكدة، لأن أنا قلت لكم قبل كدة إن هذا المجال مجال افتراضي مينفعش نعيش فيه ونصدقه، لأن الفيديوهات اللي بتنزل، سواء لمذيعين أو صحفيين أو لسياسيين أو رياضيين أنا بقول لكم لا يمكن الوثوق بها مية في المية، لأنها بتبقى لو مكنتش ملعوب فيها بتبقى مقتطعة من سياقها".

وأضاف: "زمايلي كانوا من شوية بيقولولي إن فيه على اليوتيوب، وبالتالي بقا على الفيس بوك وتويتر ومواقع التواصل الاجتماعي تريقة كبيرة أنا بتعرض ليها بسبب الجملة اللي أنا قلتها امبارح ولا أول امبارح على موضوع مجلس أعلى العالم أو مجلس إدارة العالم، والناس بقا بتتريق وبتهزر، وعلى فكرة أنا مبزعلش، لكن في النهاية بس أنا بحب التنويه من أجل الموضوع، لكن السخرية والتريقة وبتاع مبزعلش".

وتابع: "القصة إن الناس أولًا نسبت الكلام لي، أنا كنت بتكلم في هذا الفيديو عن ردود أفعال الحلقة اللي أنا عملتها في البرنامج من 4-5 أيام اللي كان فيها ضيوفي اللواء حسام سويلم، الخبير العسكري، والدكتور أمجد إسماعيل، أستاذ الفلسفة الفنية، وهم اللي كانوا بيقولوا هذه النظرية، وكانوا بيقولوا على مجلس أعلى للعالم أو مجلس إدارة للعالم، وموضوع اللعب في الطبيعة، فأنا كنت بتكلم عن ردود الأفعال وبقول السيناريوهات مصدقين إيه ومش مصدقين إيه والناس ردت على بإيه وكذا ففي حد خد الجزء ده من كلامي واقتطعه ونزله لوحده".