ضابط شرطة يوجه رسالة لمؤلف مسلسل"بعد البداية".. والأخير يعتذر له

كشف المؤلف عمرو سمير عاطف، كاتب مسلسل "بعد البداية" للنجم طارق لطفى، أن أحد ضباط الشرطة، وجه رسالة عبر حسابه الخاص بموقع التواصل الاجتماع "فيسبوك"، معرباً عن غضبه من تقديم الصورة السيئة لضباط الشرطة فى مصر، ويؤكد له أن هناك نماذج إيجابية داخل جهاز الداخلية، لما لا تتجه الأعمال الدرامية إلى إظهارهم، ورد عليه "عاطف"، مؤكداً له أنه سوف يحرص على تقديم النموذج الإيجابى منهم، وأنه بالفعل قدم ذلك فى مسلسل "لعبة إبليس".

وكتب "عاطف"، عبر حسابه الخاص بموقع التواصل الاجتماعى "فيسبوك": " ظابط شرطه من الاصدقاء على الفيس باعتلى الرساله اللطيفه دى : صباح الخيرات .. مبدأيا كل سنة وحضرتك طيب ورمضان كريم ... ثانيا احب ابارك لحضرتك على لعبة ابليس وبعد البداية بصراحة جهد هايل .. ثالثا انا كضابط نفسي ومنى عيني اشوف مسلسل قاءم على فكرة ان زي مافي ضباط وحشين في ضباط حلوين زي اي مكان ... تفتكر حضرتك الامنية دي صعب انها تتحقق اسف طولت على حضرتك ".

ورد عليه سمير عاطف قائلاً: " اولا انا مافيش عندى اى موقف معادى للشرطه على الاطلاق انا باعادى بس التصرفات الخاطئه اللى بيرتكبها اى مواطن بيشتغل اى شغلانه حسب اعتقادى وتقييمى طبعا واللى ممكن يكون غلط او صح ثانيا اعز اصدقائي واجدع اصحابي ظباط شرطه فعلا والله بجد وما ارضاش اطلاقا ان يتقال عليهم كلمه مش كويسه او يتعرضوا لاى مشكله او اذى ابدا ".

وأضاف: " ثالثا طبيعة الاعمال البوليسيه او اللى بتحتوى على جرائم بتحتم وجود شخصية الضابط والا ما يبقاش اسمها اعمال بوليسيه الكلمه نفسها مشتقه من بوليس يعنى شرطه ومن الطبيعي والعادى والمتوقع ان بعض الشخصيات من الظباط تكون فاسده او شريره وبالتالى عادى جدا انك تشوف ظباط فاسدين فى هذه الاعمال من غير ما ده يكون معناه ان كل الظباط فاسدين ".

وتابع: " رابعا اعترفلك ان فيه السنه دى بالصدفه موجه كبيره بتجتاح الدراما من الاشرار الظباط ويمكن ده كان فيه تجاوز للواقع ولو ان الواقع بتحصل فيه بلاوى واوعدك بجد انى فى اول فرصه ها تتاح ليا ها احاول انى اقدم نموذج لظابط شرطه بطل وجدع ومحترم خامسا العملين اللى انا عاملهم السنه دى فيهم بالفعل ظباط شرطه كويسين ونماذج ايجابيه فعلا زى مثلا هشام جوز منى اللى بيعمله الفنان نبيل عيسي زوج روجينا فى مسلسل بعد البدايه وزى ظابط تانى ها يطلع فى مسلسل لعبة ابليس وها يأثر بشكل قوى وايجابي فى الاحداث".

وواصل فى رسالته: " واخيرا ما تزعلش انا عارف ان فيه عدد كبير جدا من ظباط الشرطه الشرفاء وفى الحقيقه لو فيه اى موقف من الدولة والنظام فى اى وقت من الاوقات فانا عن نفسي ظباط الشرطه بيجوا فى اخر قائمه طويله من المهن الاخرى اللى بيسبب اصحابها مشاكل اكبر بكتير واللى فيهم وعندهم فساد اخطر واكبر لكن ظباط الشرطه فيهم كميه كبيره جدا جدا من الناس الطيبه اللى زيك ".

وختم رساتله بتقديم الاعتذار له قائلاً: "احترامى ليك وباعتذرلك ولكل ظابط شرطه شريف لو الضرورات الفنيه ما اتاحتليش فرصة تقديم ما يكفي من النماذج الايجابية".