الزعيم يشيد بموسيقى خالد حمَّاد في "صاحب السعادة"

أشاد الزعيم عادل إمام، بموسيقى الموسيقار خالد حمَّاد، لمسلسل صاحب السعادة ، الذي يذاع في رمضان الجاري، وجاءت إشادته في مكالمة هاتفية أجراها الزعيم مع حمَّاد، منذ قليل حيث أبدى سعادته بالمزيكا بشكل كامل مؤكداً أنها متناسقة مع الديكور والممثلين والتصوير مؤكداً أنها لمست إحساس الناس.
وسرد خالد حمَّاد، تفاصيل المكالمة من خلال حسابه الرسمي علي موقع التواصل الاجتماعي فيس بوك، فكتب قائلاً: حدث منذ قليل، ألو، مساء الخير.. أنا مكلمك في وقت مش مناسب؟، لا أبداً، عاوز أقولك إن إنت عامل مزيكا جميلة ومبهجة وحساسة وزي القمر، وكإنك حاسس بكل حاجة والمزيكا شبه الموضوع وبتمثل مع الممثلين والديكور والتصوير وكل حاجة، ربنا يحميك ودايماً كدة عامل حاجة حلوة وبتلمس إحساس الناس.
وواصل، ربنا يخليك يا رب وأشكرك على المكالمة الجميلة دي، يلا أسيبك مبروك النجاح وتصبح على خير مع السلامة وألف مبروك لينا كلنا، لغاية هنا كويس مكالمة موبايل لكن لما تبقى من الفنان عادل إمام، بيكون ليها طعم تاني خالص مش هاعرف أنام من سعادتي بيها، زي مكالمة السنة اللي فاتت كده، تخليك مبسوط ومبتسم لفترة طويلة أستاذ عادل إمام، ربنا يخليك لينا ويحفظك ويخليك دايماً على القمة وسبب سعادة وإبتسامة دائمة لكل شخص في الوطن العربي، أشكرك على ثقتك وذوقك ومهنيتك وأخلاقك العالية، بجد مابقاش فيه ذوق وتقدير كده أهم فنان ممثل في الوطن العربي بيكلمني بعد قرب إنتهاء عرض مسلسله صاحب السعادة ، ربنا يسعدك يا رب أشكرك بجد .
صاحب السعادة تدور أحداثه في إطار كوميدي حول حياة بهجت عادل إمام ، بعد تقاعده من عمله، مع زوجته وأبناءه وأحفاده، وما يواجهه من مشاكل بسبب غيرة زوجته الشديدة عليه، ومشاكل مع أبناءه وأزواجهم، وأحفاده بسبب إختلاف الأجيال بينهم، والمسلسل يشارك فى بطولته أحمد عيد، لبلبة، محمد إمام، خالد زكى، نهال عنبر، أمينة خليل، إدوارد، أشرف بوزيشن، تأليف يوسف معاطى، وإخراج رامى إمام.