بغير موت

مساء الخير .. عندي مشكلة مع خطيبتي مش عارف اعمل فيها ايه لإنها إذا ما اتحلتش في الأغلب هفشكل الجوازة .. مشكلتي ان دمي حامي وحمقي جدا وهية منفتحة زيادة عن اللزوم , ليها أصدقاء رجالة وبنات طبعا وانا قصدت اتعرف عليهم علشان اشوف بنفسي شكل العلاقة ايه , همة زمايلها في شغلها صحيح لكن انا مش مستحمل الفكرة وفي نفس الوقت مش ممانع من مبدأ شغلها عشان انا عارف قعدة الستات في البيت بتجيب مشاكل فيما بعد , لكني غيور جدا انا نفسي حاسس اني بزودها كتير , طلبت منها قبل كدة تقطع علاقتها تماما بزمايلها لكنها رفضت بمنطق انا نفسي اقتنعت بيه والصراحة هية بنت مهذبة جدا وطريقة معاملتها مع الآخرين عموما محترمة وبتعرف ازاي تحط كل واحد في المسافة المناسبة بينهم لكن من الواضح ان المشكلة فية اني مش قادر اتفهم أو اتعامل بالمنظر ده , ياريت لو حد من القراء عنده نفس المشكلة يقوللي عامل ايه أو لو أحد الصديقات داخل فضفضة تفهمني دماغ البنات ايه في المواضيع دي يمكن اكون غلطان أو على الأقل مزودها .. شكرا ليكو جميعا