ردود أفعال نجوم الفن والإعلام على قرارات لجنة الانتخابات اليوم

تعليقا على الأحداث السياسية التى تمر بها مصر ، كتب عدد كبير من الفنانين والإعلاميين تعليقات لهم علي الفيس بوك وتويتر علي النتيجة النهائية التى أعلنتها اللجنة العليا للانتخابات ، رصدنا كلماتهم وتعليقاتهم على الأحداث الجارية ، باعتبارهم شريحة كبيرة من المجتمع المصرى تؤثر وتتأثر به .
- خالد أبو النجا : العسكر يلعبون بالنار بالدفع بشفيق تزويرا و ترك رشاوي مرسي و الإخوان. بينما الجمع المصري قدم الحل باكتساح حمدين. العسكر أول من ستحرقه النار .
- آثار الحكيم : الشباب دائما كان يسبق الصفوة فى التفكير والفعل ..أرجوكم يا شباب شوفولنا حل .
- هشام سليم : كلنا مسئولين كله كان بيهتف بالروح بالدم وكلهم كان قصدهم بالرشوة و المحسوبية و ده لمدة ستين سنة.
- جيهان فاضل : سأصوت بثقة للدكتور محمد مرسى ووصول الجنرال شفيق للرئاسة سيناريو اسود سيحول مصر الى سوريا جديدة .
-المطربة سيمون : ده طيور الظلام بجد .
- نبيل الحلفاوي : ويبقي الوضع كما هو عليه .
- محمد وفيق: قلبي حزين علي مصر .
- رانيا محمود يس : مازال الثوار الابرياء ينظرون الى ثورة ومبادئها بنفس براءة 11 فبراير2011 بالرغم من الاحباطات العديدة وبعد ما سرقت الثورة من اصحابها مع ذلك الثورة مستمرة ولكنى أقولها بكل اسف وحزن لم تعد الثورة هى التى تشغلنى فقط لكن يشغلنى الان مدنية الدولة التى ستسرق ايضا برائتكم .
- حنان مطاوع : كل ثورة وانتوا طيبين،بجد الفتره الحلوه دي عرفتني بناس قمر وخلتني اقرب من ناس بقوا اصحاب اللي هو انتوا:) معلش كلها 4سنين معتقل ع الماشي اوصمت بالاكره زي الصمت الانتخابي كده واللي حيعيش مننا حيرجع يقول الثورة مستمره لجل العدل والعداله الاجتماعيه، جوله اوت بس اللي جليه ان شاء الله ف الجون :))
- يسرا اللوزي : لو الناس اللى عاوزين حمدين كانوا انتخبوه من الأول بدل ما يتفزلكوا و يلعبوا "رسك"، ما كانش ده بقى حالنا !
- انجي وجدان : لقد وقعنا في فخافيخ كثيرررررر .
- صبري فواز : أول مرة يسمحوا للمصريين ينتخبوا بحرية .. قوم أيه ... المصريين اختاروا يبقوا عبيد عند العسكر أو عند المرشد .. حاجة يعنى .. خرة خام .
- المخرج احمد عبد الله : بالأمانة.. انا متحمس اتحرك النهاردة اكثر من يوم 28 يناير.... يالله بقى.. ما نخليهاش سهلة عليهم كده...
- السيناريست والمنتج محمد حفظي : الاختيار بين شفيق و مرسي زي الاختيار بين المصل واللقاح. مش عايز ولا مصل ولا لقاح.
- السيناريست مدحت العدل : ولا طعن؟ماكل هذا الجبروت يا ضيعة دماء الشهداء أيها الإخوان المسلمون أنتم من تحالفتم مع العسكر وبعتم الثورة اللعنة عليكم الدم يلاحقكم .
- تامر حبيب : الي كل من يدرس او يفكر او يقرر ان يرشح مرسي في الاعادة : " لكم دينكم و لي دين " .
- السيناريست محمد ناير : من حق اي حد انه يحبط و يزعل بس لازم نبص لقدام و نفكر ياترى حكمة ربنا ايه .. انا شايف انه العسكري مكنش له رأس نظامي واضح الآن له و حيتحرك بيه .
- المطرب محمد محسن : إعادة بين مرسي وشفيق، يعني إعادة بين المرشد والمشير، يعني مرشدير! أفيقوا من فضلكم الثورة ترجع إلى الخلف! .
- الكاتب علاء الاسواني : مقاطعة الانتخابات بقرار فردى انسحاب لن يفيد الا الفلول. المقاطعة الشاملة تنجح بتنظيم وحملة وحشد فتنزع شرعية الانتخابات . قرارنا بعد النتيجة.
- الاعلامي معتز عبد الفتاح : هو ليه أنا حاسس زي ما يكون مصر فيها حالة حداد؟ ما فيش حد هيقدر يرجعنا إلى ما قبل 25 يناير، إلا إذا إحنا سمحنا له واحنا مش هنسمح بمبارك جديد.
- الاعلامي احمد العسيلي : ليه يكسب مرسي وبدعم شعبي كامل وببلاش، وهو في الحقيقة في موقف ضعيف وهي الجماعة مصرّة على تجاهل الجميع؟ نستفيد من الموقف عالأقل!
- الناقد سلامة عبدالحميد : وحياة دمك يا شهيد ثورة تاني من جديد.. والمرة دي لازم يكون معروف مين موجود ومين لأ عشان الوساخة كترت أوي .
- فريق انا مصري : الاحرار يناضلون لاستكمال الحرية و العبيد يطلبون تحسين شروط العبودية .
- الكاتب فهمي هويدي : مرسي ام شفيق !!.. الاول ينبغي ان تفكر قبل ان ترفضه في حين ان الثاني ترفضه دون ان تفكر واذا كان الاول لا يمثل افضل ما تمنيناه الا ان الثاني يجسد اسوأ ما توقعناه .
- بلال فضل : المسألة مسألة ضمير.كيف تنتخب لحكم مصر شخصا لجأ إليه مبارك لينقذه لم يستقل عندما رأى دم المصريين يراق في موقعة الجمل وحمى قتلة أمن الدولة .