مروة كامل تكتب .. لا لا لاند

معلش استحملونى شوية ف المقالة دى . أنا طول عمرى مبفهمش ف السياسة ولا بحبها و لا عمرى اتكلمت فيها بس اللى بيحصل دلوقتى دة يخلى الحجر ينطق ف معلش شوية سياسة بس من غير غلاسة . يعنى مثلا نلاقى البرامج السياسية جايبة ضيف مش عارفة واخد ماجستير ولا دكتوراة ف العلوم السياسية و يقعد على الكرسى و يتمطع و صوتة يبقى جايب الأستوديوهات اللى جنبة و يبقى شارب قبل ما يجى البرنامج شفشق ينسون و هو بيتكلم يبقى حيجيلة تشنجات و شوية و حيطلبوا لة الأسعاف و كلنا نقول (بس هو دة اللى حيجيب التايهة) و نفاجىء انة بيقول ( ان المشاكل و الصراعات السياسية اللى احنا فيها سببها الأنقسام ف الأراء بين الشعب) يا سلام و اهكل جبت الديب من ديلة يا راجل..! سبحانك يا ربى خلقت الدنيا كلها على الأختلافات و هو دة سر الحياة ...يعنى عمرك ما ح تلاقى الناس كلها على دين واحد و عمرك ما حتلاقى الناس كلها جنس واحد فى الذكر و فى الأنثى وعمرك ما حتلاقى الناس كلها هيئتها واحدة فى الطويل و القصير و الرفيع و السمين واللى شعرة ناعم و طويل واللى شعرة قصير و خشن و اللى بيحب اللون الأبيض و مبيحبش الأحمر و العكس و الأنسان الصريح و الكداب و اللى بيحب الأكلة الفلانية و التانى مبيحبهاش و اللى بيحب فصل الشتا اكتر و اللى بيحب الصيف اكتر . يعنى من غير تفاصيل اكتر من كدة ...هو اية اللى الناس فية مش مختلفين!؟ الدنيا كلها اختلافات ف الشكل و اللون و الهيئة و الطبيعة و الشخصية و الميول و الأهواء و حتى الأراء و متنسوش المقولة اللى بتقول(لولا اختلاف الأذواق لبارت السلع)هى الدنيا من اول ما اتخلقت كدة و ح تفضل كدة حكمة ربنا ف خلقة .. اشمعنى قادرين نتقبل كل الأختلافات دى و مش قادرين نتقبل اختلافاتنا ف الأراء السياسية و الهى العظيم دة الانسان دة غريب ازاى مش قادر يشوف ان الأختلاف دة طبيعى و منطقى و مش اختراع طلع النهاردة الصبح ولا امبارح بالليل .. الحكاية مش محتاجة لا دكتوراة ولا ماجستير ولا حد خارق من الفضاء دى حكمة ربنا بس احنا اللى ناقصين شوية عقل و نفسى بقى نفوق و نسيبنا بقى من ال لالا لاند اللى احنا عايشين فيها بقى لنا 3 سنين ( و ربنا يستر) .