عاااااااااااااااااااااااااااد لينتقم

الراجل اللى واقف وراء عمر سليمان

بعد السلام والتحية وصلتنى اخبار حلوة شقية عن انتخابات رئاستنا المصرية لكن فى البداية سيبونى افضفض عامية لا تقولى فصحى ولارسمية اسمع ياخويا انت وهى ى وركز معايا شوية .
لو جعان أو شبعان لو بردان أو حران لو تعبان أو همدان لو زعلان أو فرحان سيبك من كل ده وتعالى نروح المهرجان ..أيووووه المهرجان بعد نزول عمرسليمان دا العملية سخنت وبقيت تمام ولو كنت كتبت في يوم كومنت على الفيس أو تويتر استخبى بسرعة وخليك جبان واشترى روحك يا غلبان وخلى بالك من الراجل اللى كان واقف وراء سليمان رجع وناوى ينتقم وشعاره عاد ياإخوان .
البداية بعد بيان التنحى التاريخى طلع الجميع فرحان مبسوط وسابوا الليلة ومسكوا فى الراجل المكبوت اللى كان واقف وراء سليمان مظبوط وعمالوله صفحات يامعلم وبقى الراجل أشهر مشهور واشتغلت الكومنتات والحركات والقفشات لحد ما الراجل بقى من العلامات وبقى ينضرب بيه المثل فى القلشات والنكات ورغم كل ده سكت الراجل وكبر دماغه من الحورات وفضل مستنى وأهو جه الوقت يا معلم وسليمان دخل واتكلم واترشح وممكن يكون الريس وساعتها الراجل بتاعه ههيص وينتقم منكم والراجل يجرى ويفيص .
من امبارح لحد النهاردة والفيس والتويتر مرعوب ومن انتقام الراجل مخضوض والسؤال بقى ياترى ممكن صاحبنا يعمل اية واللى يقول هيقفل الفيس واللى يقول هيفرض الجزية بس المهم انه كله مستعد للحساب واللى كلوه بط بط هيطلع عليهم وز وز وفى انتظارالجديد وعلى دنيا الفيس والتويتر كله يبئى سعيد مع أخف دم شعب موجود مهما كان الشديد وسيبونى بسرعة ألحق أعتذر عن كومنت قديم بدل ما أطلع متكلبش فى حديد وسلام دلوقتى خلص الكلام .