كارثة مدوية .. عربية "رينو" كادت تنهى حياة "شنودة " لهذا السبب!!

قال عماد شنودة المدير المسئول بمؤسسة الصوت الحر، أنه تعرض لواقعة مؤسفة كاد أن يلقى حتفه هو وأسرته بسبب سيارته ال"رينو" التي تسببت في حرق قدمه وإصابته بحروق من الدرجة الأولي .
وأضاف شنودة قائلا :" كنت هموت أنا وعيالي ومراتي (لولا حماية الله لنا) دعوني أروى لكم ما تعرضت له ، القصة بدأت بأني أثناء سواقتي عربيتي ماركة رينو كليو موديل 2003 في أول نوفمبر الماضي فوجئت بصدمة قوية جداً في قدمي، وقعدت أصرخ من كتر الألم، طبعاً مراتي وعيالي اترعبوا وقعدوا يصرخوا معاي وهما مش فاهمين أنا بصرخ هزار ولا جد بس تضامنوا معي. وبعد عدة مناورات وانا رجلي محروقة ومن قوة الصدمة مكنتش عارف ان كانت صدمة كهربائية أم ميه مغلية انفجرت في قدمي، بعد لحظات من الصدمة سيطرت علي العربية ووقفت وعرفت أنها مياه مغلية انفجرت في رجلي داخل العربية، مؤكدا متستغربش أيوه جوا العربية.

واستطرد حديثه قائلا:" اتصلت بطبيب صديق وشرحت له الوضع فوصف لي الأدوية المطلوبة، مضيفا أنه فى اليوم الثانى وهو جالس فى منزله ومش قادر اتحرك طبعاً اتصلت بالأهل والأصدقاء احكيلهم عن اللي حصل فكانت ردود افعالهم زي حضراتكم كده بالظبط؟؟ يالا الهول، ميه وبتغلي جوا العربية؟ طب ازاي. واحد من أصدقائي المدئرمين اللي كل حياتهم عربيات، قاللي معلش يا برنس هي جات فيك، هي كل العربيات الرينو بتعمل كده. اتاري السر في ان الشركة العبقرية اللي بتصنع الرينو عامله السربنتينا (المشع) بتاع التكييف السخن جوه صالون العربية وبالظبط جنب دواسة البنزين لزوم التدفئة بالشتاء!!! المهم ان ده حصل وبدون اي مقدمات وانا مواظب علي الصيانة، وحتي ولو مش مواظب علي الصيانة الجزء ده من العربية مش موجود كجزء من الأجزاء اللي لازم تتغير أثناء الصيانة الدورية. طبعاً انا ورجلي بالحروق اللي شفتوها مقدرتش اتحرك من البيت لعدة ايام. قلت لنفسي انا مش هاسكت لان ده عيب تصنيع (او عيب تصميم) رهيب ممكن يتسبب في قتل اي حد. رحت دخلت علي موقع شركة رينو الدولي وكتبت شكوي. بعدها بأربع خمس ايام اتصلو بي بتوع شركة رينو هنا في مصر (#المصرية #العالمية #للسيارات #EIM)) وطلبوا رقم الشاسيه بتاع العربية، قلت في نفسي دا باين عليها شركة محترمة وشكلها هتعمل حاجة. اديتلهم الرقم وبعدها بيومين اتصل بي مدير الصيانة بالشركة (مهندس يحي خليفة) ، المهم المهندس يحي سألني ايه اللي حصل، حكتله،. اوم ايه يقولي وايه يعني اللي حصل؟؟ ماهي ديه مشكلة معروفة في العربيات الرينو وبتحصل كتير؟؟؟ قلتله بس دا ممكن يتسبب في موت ناس؟؟ قالي لا مش بيحصل لأن الناس بتلغي التكييف السخن في العربية و يا دار مادخلك شر؟؟ بالسهولة ديه؟ وقالي احنا ممكن نصلحها لك ونعمل خصم بس انا منصحكش تعمل كده لأن الموضوع دا ممكن يحصل تاني؟؟ يانهار أسود ومطين بطين؟ الراجل بيعترف انه الموضوع معروف وبيحصل وهما مش فارق معاهم؟؟ قلت له دا كلام خطير و غير مقبول وانا هاصعد الأمر، قالي براحتك؟ كتبت للشركة في فرنسا تاني وحكيت لهم اللي حصل، تاني يوم جاي تليفون من شخص مختلف المره ديه، الأستاذ #حسام_شهاب مدير خدمة ما بعد البيع في الشركة العالمية للسيارات #EIM ، والحق يتقال الراجل بتاع مبيعات بجد، بيتكلم بمنتهي الذوق والأدب. المهم علشان مطولش عليكم الراجل قاللي انت عاوز ايه واحنا تحت أمرك؟ قلتله ان الشركة تعترف ان دا عيب تصنيع وتعمل استعادة لكل سيارات الكليو وتصلح العيب. قالي دا مش ممكن يحصل وان دا مش عيب تصنيع واحنا ممكن نعوضك؟؟ قلتله ازاي، قاللي تختار عربية جديدة؟؟ تعالى اختار عربية جديدة بدل القديمة واحنا هنعمل الازم؟؟ رحت فعلاً الشركة في ابو رواش واستقبلوني استقبال الملوك وبعد ما اتفرجت علي العربيات اخترت واحدة. بعده بأسبوع اتصلو بي وقلولي العربية جاهزة وهنعملك خصم 4000 جنيه؟؟ طبعا انا مبعرفش اشتم فسكت وقلت له شكراً. كلمت الشركة مرة تاني في فرنسا وهي ديه الحاجة اللي بتخليهم يتصلو بي فوراً. تاني يوم فعلاً جالي اتصال من حسام شهاب مرة تانية وقالي: ياأستاذ عماد اصل انت اخترت عربية غالية وأحنا منقدرش نعمل تخفيض اكتر من كده؟؟ اختار عربية تانية؟ قلتله ماشي وأخترت عربية ارخص، بعد اسبوع انتظار اتصل بي النهاردة وقالي معلش الخصم انخفض ل 3000 جنيه، طبعاً انا افتكرته بيهرج بس قالي معلش هو دا كل اللي نقدر نعمله؟؟ طبعاً بين كل مكالمة والتانية اسبوع وايملات بيني وبين الشركة في فرنسا وتسويف ووجع قلب وقرف. وهكذا انتهت القصة ايها الأصدقاء. شهرين من وجع الدماغ والأيملات والتليفونات والزيارات وفي الأخر 3000 جنية خصم علي العربية؟ انا ومن خلال هذا البوست وهو اطول بوست اكتبه في حياتي بحاول احذر الناس من العربية الرينو وماقد يحدث لمن يمتلكونها. احذرو فالرينو بها سم قاتل لك ولمن معك. ولاعزاء لحسني النية مثلي من صدقوا ان من الممكن ان شركة سيارات محترمة قد تعترف وتتحمل مسؤليتها. ولكن هيهات. انشرها بقدر كرهك لتوكيلات السيارات وخوفك علي عيالك".