كلام مسئول

محمد صلاح: يا مساء الخير اذا كان المثل بيقول اللي ليه ضهر ما ينضربش على بطنه فبرضه اللي له بطن لازم يعرف هيحط فيها ايه لانه فيه بعض الناس ساعات بتعتبر ان المجني عليه هوالسبب في اللي حصل له زي حكاية قرية البرادعة الناس شربت وضرت نفسها وما اتاكدتش من المواسير قبل ما تشرب المفروض يا جماعة يبقى فيه قواعد بتحكم حركة المجتمع لو كبرنا وطنشنا عن خدمة ناقصة اتقدمت لبينا هنساعد في كده لمفسدين وهنضرناس تانية والمسالة ما بقتش بقروش اسعارالنهاردة بقت نار وبالتالي حماسية المستهلك من غش التاجراومقدم الخدمة ما بقتش رفاهية او بغددة وادي حكاية العربيات المعيوبة اللي وراها اسماء شركات كبيرة الناس افتكروا انهم خدوا full option اتاريهم خدوا no option ونرجع تاني للامثال الشعبية كان عندنا مثل بيقول دا جاب يبيع المية في حارة السقايين كنا بناخده كده كدليل على استحالة ان حد يضحك علينا لكنة طلع بيتضحك علينا وبنشتري البتاع اللي بتقشر بطاطس والعلبة اللي فيها فيل والتكييف اللي هيكيفك من غير صوت يطلع كراكة ..بقينا اسرى الدعاية والاعلان من ناحية ومن ناحية تانية مش عارفين ناخد بالنا بنتكسف نطلب فاتورة احسن صاحب المحل ينده عالواد فرج يعرفنا شغلنا ولما بناخد ضمان ما بيضمنش أي حاجة حماية المستهلك دي مسئولية مَن؟ هل هي مسئولية المستهلك نفسه ولاّ اجهزة الدولة والاجهزة دي بتحمي حد ولاّ هي كمان عايزة حماية فينطبق عليها المثل اللي بيقول جبت الاقرع يونسني ام عرى دماغه وخوفني
عن حماية المستهلك من السلع المضروبة والخدمات المعيوبة هيكون لينا كام مسئول
فاصل
محمد صلاح: المفروض ان المنافسة تعدل الحال المايل عند البياعين ومقدمي الخدمات لكن كمان منع الاحتكار والتصدي للجماعة بتوع الغش في السوق عشان المكسب يزيد مسالة مهمة يعني حماية المستهلك مش بس تبص على سلع معيوبة ولا تاجر مصمم ان البضاعة المباعة لا ترد ولا تستبدل حماية بجد كل ما وسعت وبقت شاملة رئيس جهاز حماية المستهلك أستاذ سعيد الالفي هيكون لينا معاه كلام مسئول
ومن كلام أ سعيد الالفي
نحن نعاني من ازمة ثقة فالمستهلك لا يثق في اننا سنحصل له على حقه وينتظرون الينا على اننا جهاز موجود ولكنه لا يمارس عملا حقيقيا وهناك ازمة ثقة من التجار في امكانية نجاحنا في ضبط الاسواق نتمتع بالضبطية القضائية ولكن هناك حساسية في هذا الموضوع لما سمعنا ورأينا من قبل عن تجاوزات ارتكبها بعض من يتمتعون بالضبطية القضائية ولذلك اعالج هذا الامر بالتوفيق باختيار الذين يعملون معي في الجهاز حتى لا يقع احد فيما وقع فيه غيرنا لا انكر ان هناك ممارسات احتكارية في الاسواق والقانون المصري يجرمها لكنه لا يجرم الوضع الاحتكاري والفيصل بين الاحتكار والممارسة الاحتكارية من الصعب ان تضبطه الجهاز مهتم بمكافحة ظاهرة مراكز الصيانة غير المعتمدة لحماية وصيانة مصالح المستهلك والجهاز يكثف حملاته ضد هذه المراكز الى جانب تكثيف حملات التوعية للمستهلكين.
العلاقة بين التاجر والمستهلك زي المقص كل طرف في اتجاه عكس التاني التاجر عايز يكسب والمستهلك عايز ياخد احسن بضاعة باقل سعر متعارضين بس ما يفكوش وإلا كل طرف هيبقى سكينة ويبقى عندنا التاجر بتاع اكسب واجري اواضحك عالزبون خصوصا الزبون الطياري وكل القاموس اللي احنا عارفينه .. رئيس جهاز حماية المستهلك أ سعيد الالفي هيكون لينا معاه كلام مسئول
فاصل
محمد صلاح: رحب برئيس جهاز حماية المستهلك أستاذ سعيد الالفي ..منورنا يا استاذ سعيد.. هو جهاز حماية المستهلك بيحمي المستهلك من أي سلعة ولا سلع معينة ولا مش كل مستهلك بيتحمي
أ/ سعيد الالفي _ رئيس جهاز حماية المستهلك: لا هوطبقا لقانون حماية المستهلك الجهاز مختص بالسلع والخدمات المقدمة للاشخاص الطبيعية
محمد صلاح: امال قصدك مين الي ما يتحميش بقى ؟
أ/ سعيد الألفي: اللي هو الشخصية الاعتبارية يعني شركة مصنع مكتب استشاري كبير عيادة مكتب هندسي
محمد صلاح: طب دول لما ياخدوا سلع مضروبة ما تحمهومش ليه ؟
أ/ سعيد الألفي: عشان المشرع قال ان النهاردة لو دخلت في حماية الشركات هي عندها القدرة انها تجيب محامي كويس عندها شئون قانونية عندها مشتريات بتعمل مناقصات مزايدات والا هالاقي السد العالي بيقولي تعالى انا جبت توربينة بايظة من الحتة الفلانية تعالى حلها لي مقدرش ..احنا بتوع الناس العادين الطبيعيين الغلابة اللي زينا كده
محمد صلاح: عندك مثلا شركات الموبايل التليفون المحمول وبعدين يحصل انه شركات معينة في اماكن معينة تبقى ال signal بتاعتها سيئة جدا .
أ/ سعيدالألفي: هوالحقيقة ما يخص الاتصالات من اجهزة الى اماكن بيعها لاستيرادها لاشاراتها دي من اختصاص جهاز تنظيم الاتصالات فيه وقانون بيختص بهذا الجزئية فقط يعني أي حاجة تخص الاتصالات يعني حتى لما طلعت حكاية الموبايلات الصيني وخلافه ابتدوا هما يعلنوا وقالوا ما تشرتوش الموبايلات دي وهيقطعوا عنها الخطوط وقد اختلف معاهم في الراي او قد اشوف انه ..لا.. من حق المستهلك انه يعرف ايه الجهاز اللي لو اشتراه واتضحك عليه فيه هيرجعه ازاي او يبدله ازاي ما ينفعش اجي ابيعه في السوق
محمد صلاح: يعني انا لو مستهلك لو حسيت انه فيه شركة ما عاملة دعاية واعلانات وردية وحسيت ان الخدمة ما توصليش بشكل كويس ما اجيلكش؟
أ/ سعيدالألفي: بالنسبة للتليفونات ..لا .. انا بحولها لجهاز تنظيم الاتصالات فهو المختص بهذه الخدمات
محمد صلاح: طيب مش دايما المستهلك محتاج حماية اثناء شراؤه سلعة ولكن في بعض الخدمات مثلا الناس اللي بتركب قطارات وبعدين تطلع فيرلاانن مثلا اشتكي لمين اصلا
أ/ سعيدالألفي: هو طبعا احنا في ال3 سنين اللي فاته ركزنا على السلع وسلع سهلة قوي يقول دي مكسورة ومش مكسورة انت اللي كاسرها لا حد تاني اللي كاسرها فيه عننا معامل تقدر تقول اتكسرت فعلا عيب تصنيع ولا عيب استخدام ولا عيب تخزيني عندنا اللي يقدر يقولنا اذا كان دا عيب تصنيع او عيب استخدام الخدمة بقى بتبقى المشكلة بتاعتها في انه اثباتها مش سهل الضر اللي تسببت عنه عدم تقديم هذه الخدمة بالاسلوب المفروض برضه مش سهل مش في مصر بس ولكن في العالم كله ولكن لابد انه يتحط مواصفات للعربيات يكون شكلها ايه فالمفروش تشتكي وانا هل اقدر اعوضك ان المكان دا مش نضيف مقدرش اوعدك انما هاخد اجراء ضد الشركة
محمد صلاح: لو الواحد قاعد في قطر بيقدم وجبات ولقى الوجبة مش نضيفة او مسمومة
أ/ سعيد الألفي: ياريت يبلغنا فورا .. شوف انا هقولك حاجة منظومة حماية المستهلك في العالم كله لها 3 اطراف نمرة واحد جمعيات حماية المستهلك قريبة من المستهلك جنبه في اماكن اللي هو متواجد فيها بيشترك فيها مستهلكين في الحفاظ على حقوقهم وانها تقدر تجيبلهم الحق والقانون اعطى الحق لجمعيات حماية المستهلك في رفع دعاوي قضائية نيابة عن المستهلك لاول مرة في مصر ولاول مرة انه يحصل ان حد يرفع قضية نيابة عن حد ، جهاز حماية المستهلك 75 % من مجلس ادارته من المجتمع المدني ولاول مرة في مصر يبقى جهاز حكومي من الجمعيات الاهلية ونقدم خدمة في مصر معظمه حكومة ان كانت كهربا او مية قطورات أي حاجة من دي حكومة فبالتالي لازم حد من برة الموضوع دا خالص وبالتالي جمعيات حماية المستهلك هي المنوط بها الاهتمام بهذا الموضوع واحنا طرف من الاطراف الطرف التاني اجهزة الرقابية في الدولة منهم جهاز حماية المستهلك دا الطرف التاني في المعادلة ولازم تكون هذه الاجهزة رقابة فعالة قوية تقدر تجيب للمستهلك وللجمعيات حقوقها نمرة 3 طرف مهم جدا في المعادلة المستهلك ذات نفسه انت النهاردة بتنزل تشتري حاجة اتاكد ان المواصفات اللي مكتوب عليه هي دي اللي انت عايزها تاريخ الانتهاء وتاريخ الصلاحية وخلافه مكتوب عليها لو لقيت فيها أي حاجة اتصل بالجمعية او اتصل بينا
محمد صلاح: انت عارف الناس دلوقت مشغولة في اكل عيشها جاب علبة زبادي لقاها مضروبة بيقلب ولقى شوية فيران ماشين كده وبيلعبوا بيكنش لحد ما يوصل القطرعايز يروح مشواره ؟
أ/ سعيد الألفي: معندوش ثقة انه لو حصل شكوى حد هيجيبله حقه نمرة واحد ، نمرة اتنين انه الحق عايز يرجع له هو فلما الحق مش هيرجع له هو طب هما هيعملوا لي ايه وبالتالي ما بيشتكيش طبعا هي حكاية هيعملوا لي ايه هي دي النقطة الي يرايت لو المستهلك يساعدنا عشان نقدر نساعده لو انت اشتكيت النهاردة من حاجة زي كده اللي هييجي يركب القطر او اللي هييجي يشتري علبة الزبادي دي او.. او.. او.. هيلاقيها احسن مما كانت عليه
محمد صلاح: على مستوى الخدمات مثلا المستشفيات فيه مستشفيات عامة حكومية وفيه مستشفيات شبه حكومية او فيها اقسام شبه قطاع خاص وكذلك فيه المستشفيات الاستثمارية بتاعة الفلوس الكتيرة والفاتورة العالية اذا حد لقى الخدمة سيئة التمريض سئ خد حقنة مضروبة او اللي بيلاقي فاتورة مبالغ فيها يعني ايه ؟
أ/ سعيد الألفي: أي حد بيبقى داخل مستشفى بيبقى فيه حاجة اسمها حقوق اللي هيقدم له هذه الخدمة لازم الاسعار يكون عارفها قبل ما يخش فيه رقابة على المستشفيات قوية جدا من وزارة الصحة احنا برضه مكن نتلق هذه الشكاوي بس الحتة بتاعة الادوية والمستشفيات وزارة الصحة عندها رقابة على المستشفيات فقط جهاز مخصص للرقابة على هذه المستشفيات .. اهم حاجةما تسيبش حقك حتى لوانت مقتنع انك مش هتاخد حاجة ارجوك خلينا نعرف علشان نحسن من اوضاع هذه الناس
محمد صلاح: فيه حاجات كتير بتدي شهادات جودة وجودة انتاج بتراقبوا الناس دي ولاّ بتاكدوا ان الشهادات دي فعلا صالحة لمن يستحق لانك عارف فيها كمية كبيرة من المجاملات
أ/ سعيد الألفي: كان فيه اجتماع مع سيادة الوزير رشيد محمد رشيد لوضع المواصفات القياسية علشان موضوع الجودة والهيئة القومية لضمان الجودة بما فيها الشهادات اللي بتعطى حتى للمستوردين هيحصل فيها اجراء جامد جدا في اليومين اللي جايين ولكن انت بتكلمني برضه في البيزنس بتاع الخدمات اللي هو لسه بادئينه من 3ايام قلنا هنبتدي بحكاية الخدمات البنكية من حق المستهلك المعرفة حقك في المعرفة هو دا المهم طبعا الشهادات دي لازم لها رقابة لكن مفيش مستهلك هييجي يشتكي من شهادة جودة
محمد صلاح: اه بس انت بتحمي المستهلك لانه شهادة الجودة صادرة لشركة بتطرح منتج ممكن يبقى المنتج مضروب اصلا ؟
أ/ سعيد الألفي: انا دوري بيجي بعد تلقي الخدمة وبعد ان تصل للجهاز شكوى لو جاتلك شكوى من حاجة شربتها اكلتها استخدمتها يبقى انت اشتريتها وحصل فيها مشكلة واتكلمت لما برجع بقى على الجهات الرقابية الاخرى او الجهات الرقابية الاخرى على مصنع هذه الخدمة او السلعة والمحل اللي باعها وخلافه بنرجع بقى على كل جزء فيها يتجه الى الحاجة دي مظبوطة ولاّ لا لغاية لما المنظومة تكتمل .. فطبعا انا معنديش سلطة ان انا اراجع على شهادات الجودة المصدرة ولا اتعامل مع ما قبل الانتاج حتى
محمد صلاح: برضه في الخدمات مسالة العلاقة بالسلعة لو السلعة بيت اوشاليه او فيلا الكومباوند دلوقتي تلاقي البنا على 30% و70% حمامات وجناين وتروح ماتلاقيش حتى بعد مكان يستلم يلاقي الرسم الهندسي اللي هو اختار على ضوئه عند التنفيذ مافيش منفس اصلا يعمل ايه؟
أ/ سعيد الألفي: طبعا لا عقار ولا غير عقار ولا حاجة من دي هتباع غير بالاعلان والاعلان هو اللي خلاك تشوف ان الرسمة دي عاملة كده والاعلان هو اللي فيه الكلام دا كله ولا يمكن لاي حد يكبر او يبيع كميات كبيرة من أي منتج الا بحملات اعلانية يبقى الاساس في هذا الموضوع انك ازاي تضبط هذه الحملات الاعلانية لانها تكون صادقة انت مش عاوز تحط ضوابط تمنع الأعلانات ولكن بالعكس حرية الراي مكفولة .. الي حصل انه عند تكوين الجهاز وعند اقرار القانون محطوش فيها حتة الاعلانات وعشان كده المهندس رشيد قدم لمجلس الوزرا تعديل لقانون حماية المستهلك باضافة الاعلانات المضللة ، كم من الناس بيشتروا وبيلهثوا وراء اعلانات على الفضائيات وعلى الصحف القومية والحزبية والمعارضة والمستقلة والمشكلة الخطيرة جدا اللي احنا مش عارفين هنتصرف فيها ازاي لغاية دلوقت الاعلانات التي تبث من خارج مصر وبالذات على الفضائيات
محمد صلاح: ماهو وثيقة تنظيم البث الفضائي اتعرقلت بعد ما بحثوها وزراء الاعلام العرب وحاولا يعملوا مفوضية لضبط مسالة البث الناس قالت لك حرية مش حرية فالعملية بقت سداح مداح.
أ/ سعيد الألفي: لازم مصر تاخد فيها خطوة لان انت عندك 85 مليون مستهلك ودا قوة شرائية كبيرة ، والمستهلك المصري للاسف بيلهث وراء هذه الاعلانات سعر كويس شكلها في التليفزيون حلو وللاسف هذه الاعلانات معظمها مضلل وبتيجي منها شكاوى كتير جدا ، وشكاوى كتيرة بتشمل شركات الصيانة وشركات ابادة الحشرات ..اخدنا إجراء في هذا الموضوع اتفقنا مع الرقابة الصناعية انه أي مركز صيانة عايز يجدد رخصته او يفتح جديد لازم جهاز حماية المستهلك اذا جه من هذا المركز شكاوي يتم حلها الاول وللمستهلك المركز اللي يقولك انا بصلح 1، 2 ،3، 4 اعرف انه كداب على طول مركز الصيانة لا يصلح الا ماركة واحدة فقط
محمد صلاح: الوزارة بتيجي عند اول السنة تقولك لا زيادة في المصروفات فالناس بتروح تلاقي زيادة في المصروفات الناس تعمل ايه ساعتها ماهو دا مستهلك ؟
أ/ سعيد الألفي: موضوع الاسعار عامة ، السواد الاعظم يعتقد ان جهاز حماية المستهلك معمول علشان الاسعار لما تغلى الجهاز ينزلها ، اصلا وجود جهاز حماية المستهلك وجهاز حقوق الملكية الفكرية التلاتة دول سبب نشاتهم هو التحول الاقتصادي من اقتصاد موجه الى اقتصاد حر، الاقتصاد الموجه يعني الحكومة هي اللي بتتجه هي اللي بتحدد سعر كل منتج هي اللي بتشغل الناس هي اللي بتديلهم مرتبات تتناسب مع الاسعار اللي هي حاطاها ايام السلع كلها مسعرة ومش موجودة .. النهاردة بتخش أي مكان بس المهم انه الحاجة سعرها بيعلى النهاردة بنستهلك 50% من اللي احنا بناكله بنستورده من برة فطالما انت بتستورد الحاجات دي من برة اللي بيتحكم فيك الاسعار العالمية كون ان دخلك هنا مش قادر على هذه الاسعار يبقى المشكلة مش مشكلة السعر المشكلة مشكلة الدخل ازاي بقى نحسن دخلنا دا موضوع تاني
محمد صلاح: وبالتالي الجهاز مالوش علاقة بالاسعار .
أ/ سعيد الألفي: اطلاقا
محمد صلاح: طيب نرجع لحكاية المدارس في حالة زي كده بيجيلك وتبلغ وزارة التربية والتعليم ولا ما يجيلكش ؟
أ/ سعيد الألفي: لا انا صراحة ما جاتليش ولا شكوى من مدارس علشان برضه لو جت الشكوى من الاسعار زي منا اتفقنا انه احنا مش جهاز تسعير ولا يوجد جهاز حماية مستهلك في العالم كله يتدخل في الاسعاراللي هيخش الموقع بتاعنا هيلاقوا مقارنات اسعار عاملاها الجمعيات عندنا
محمد صلاح: اللي هي جمعيات المجتمع المدني ؟
أ/ سعيد الألفي: واحنا في الجهاز بنعمل دراسات اسعار نقول والله الحاجة دي في الحتة الفلانية بكذا نفس الحاجة دي في الحتة الفانية بكذا
محمد صلاح: طيب انت حاسس العلاقة بينك وبين الناس ازاي يعني عندكم الموقع وارقام تليفونات للجهاز حاسس بتجاوب بينك وبين المستهلك ولا لسه قناعات الناس انه محدش هيعمل لنا حاجة ؟
أ/ سعيد الألفي: احنا لما ابتدينا وفتحنا الخط الساخن ، الشكاوي عندنا ابتدت تطلع من 10 شكاوي في اليوم ل50 شكوى في اليوم للنهاردة وصلنا الى 300 شكوى في اليوم فبالتالي انه لو الناس حاسة انه الشكاوي بتاعتها ما بتلاقيش صدى مكانتش كلمتنا تاني ..احنا وصل لنا النهاردة حوالي 190 الف استفسار وشكوى وخلافه بعد تجميع كل الامور بعد ضبط الامور عدد الشكاوى اللي وصل لنا النهاردة فوق ال23 الف شكوى اللي اتحل منهم 89% لكن مقدرش اقول ان انا غطيت الجمهورية ولاّ عندي الميزانية اللي اعمل بيها الكلام دا كله برضه
محمد صلاح: خليك معانا لسه الكلام مخلصش
فاصل
محمد صلاح: رئيس جهاز حماية المستهلك أ سعيد الالفي شاف انه العلاقة مع الجمهور فيه نجاح نسبي معانا مداخلة مع الناس سالناهم عن الجهاز نشوف وترد عليه
أ/ سعيد الألفي: اتفضل
فاصل
مواطن1: انا معنديش أي معلومات على جهاز حماية المستهلك .
مواطن2: مفيش حد بيسال في التاني يعني انا جبت ترينج قالك خد بديل يامااخدش حاجة مفيش ترجيع.
مواطن3: اللي اعرفه انه لازم اروح الجهاز قبل 14 يوم من شرالجهاز المفروض يكون معايا فاتورة رسمي مختومة بختم الشركة وختم السجل التجاري والبطاقة الضريبية
مواطن4: مفيش أي حاجة ملموسة من حماية المستهلك او المستهلك بيحس ان الدولة او المسئولين مهتمين به
مواطن5: الجهاز دا ممكن ياخد لي حقي وممكن ما ياخدش .
مواطن6: يعني انا رحت اشتري موبايل وطلع بايظ.
ولجات لمركز صيانة فانا اتمنى ان الدولة ترجع لنا حقوقنا .
فاصل
محمد صلاح: ايه رايك في الكلام دا يا استاذ سعيد ؟
أ/ سعيد الألفي: يعني احنا زي الدكتور طالما ما اتصلتش بينا .. لما هتعيا هتجيني هتشوف اذا حصل نتيجة ولا لا بقول لحضرتك فوق ال20 الف واحد اتحلت مشاكلهم
محمد صلاح: الناس ممكن عبر وسائل الاعلام تتابع الموقع لكن مش كل الناس بتستخدم الكمبيوتر ليه ما يبقاش في بعض المحلات او كل المحلات تجبرها انها تعلق ارقام الجهاز ؟
أ/ سعيد الألفي: شفت يافطة البضاعة المباعة لا ترد ولا تستبدل مش موجودة مش بس كده هل انت شفت في محلات يافطات استبدال واسترجاع ..حقك في الاستبدال والاسترجاع دا موجود بس على الاقل اليافطة بتاعة البضاعة المباعة لاترد ولا تستبدل خلاص .. حاجة بقولها للمستهلك انه مش هينزل يشتري عربية ويحصل لها حاجه بعد 20 يوم يقوله لا مش هيرجعها .. لا هيرجعها طالما معاه الضمان بتاعها احنا بنتكلم كمان في مكوى ، غسالة تلاجة .. نمرة اتنين الي جاب سخان في بيته وجرى له حاجة فبالتالي هيجيلنا وهيصر على انه ياخدنا احنا عندنا اكتر من 60 او 70% من الشكاوي اللي جايلنا من سلع معمرة ، السلع الغذائية 2% و3% فانا اقصد انه مش كل سلعة بتجيبها كل 3 او 4 سنين مرة هي دي اللي هتشتكي منها والسلعة الي انت بتستخدمها 3مرات في اليوم يعني 365 يوم في السنة ماتشتكيش منها ، ففيه علاقة بين سعر المنتج ، حاجة تانتية طب ياجماعة السلع الغذائية دي اكيد فيه ناس بتشتكي من حاجات بايظة ما بتشتكوش ليه.. ياعم وانا لو اشتكيت هتعملي ايه ..اه ممكن مقدرش اعملك انت بالذات حاجة للراح اللي جاب علبة تونة او علبة زبادي ولاقاها مش مظبوطة لكن الشكوى لنا بنزل الرقابة الصناعية عليهم بنزل التجارة الداخلية عليهم او مباحث التموين كل دول بينزلوا على هذا المتتج اللي انت شايفه بسيط دا
محمد صلاح: ان ما اتشالش من السوق على الاقل بيتصلح حاله؟
أ/ سعيد الألفي: بالظبط وانت تكون بتساعد الناس اللي حواليك المواضيع تمشي في الاطار السليم ادي كل الحكاية
محمد صلاح: استاذ سعيد هي العقوبات بتبقى ايه ادينا نماذج لبعض العقوبات مثلااللي بيقدم خدمة مش كويسة ممكن العقوبة يبقى شكلها عامل ازاي اللبي بيقدم منتج بيتاكل منتج مش بيتاكل ؟
أ/ سعيد الألفي: العقوبات لقانون حماية المستهلك هي عقوبات مادية وليست عقوبات بدنية والمفروض ان هي تكون تقيلة طبعا اول ما القانون طلع مجلس الشعب راى انه العقوبة اقصاها 100 الف جنيه دي عقوبة كافية طبعا مع التطور واللي بيحصل في السوق ومعاللي الواحدج شافه ..لا100.. الفجنيه مش كافية
محمد صلاح: دا بيتوقف على ايه على نوع السلعة ؟
أ/ سعيد الألفي: يتوقف على مدى الجرم فيها وتقدير القاضي وتتراوح العقوبات من 10 الاف جنيه ل100 الف جنيه وللقاضي يتراءى له الاستعانة باي قانون له عقوبات اغلظ
محمد صلاح: بيبقى فيه كلام كل فترة كده على المياه المعبأة في قزايز بيقولوا عليها مياه معدنية .
أ/ سعيد الألفي: مفيش مياه معدنية في مصر .
محمد صلاح: امال المية اللي الناس بتجيبها في قزايز دي ايه ؟
أ/ سعيد الألفي: مياه معالجة ، مية كانت موجودة مية ابار او حتى مية حنفية في بداية الجهاز وقفنا كام شركة مية ومش وقفنا بس لا احنا نشرنا على الملأ .. فيه جمعية احنا مولنا لها الدراسة وعملت الدراسة عن المية المعبأة اللي موجودة في الاسواق حصل انه فيه شركات وقفت المهندس رشيد اصدر قرار بوقفها في ساعتها ولكن فيه حاجات غير مطابقة لمواصفات ولكنها صالح للاستخدام الادمي ، فيه حاجات غير مطابقة للمواصفات وغير صالحة للاستهلاك الادمي
محمد صلاح: طيب االناس تتطمن ازاي ان المياه دي اللي بتشربها سليمة ؟
أ/ سعيد الألفي: اللي حصل بعد الهيصة اللي حصلت على المية دي المهندس رشيد وزير التجارة والصناعة اصدر قرار قالك كل شركات المية المعباة الموجودة في مصر تخضع لنظام الجودة وادالهم مهلة لتوفيق اوضاعهم ..على ما اعتقد انه فيه حوالي 15 شركة خاضعين لهذا النظام قفلوا
محمد صلاح: المواطن يعرف ازاي حقوقه يعني بالاضافة لجهد الجهاز؟
أ/ سعيد الألفي: دي فيها حتة الثقة يعني المواطمن ما بيروحش الانتخابات عشان معندوش ثقة ان صوته هياثر مع ان فيه غرامة على اللي مايروحش الانتخابات دي مشكلة مجتمع مش مشكلة جهاز .. التعليم عليه جزء كبير ، الاعلام عليه جزء كبير احنا بنتكلم في ثقافة مجتمع كلما هتزيد ثقافة المجتمع كل ما هيحس ان الاجهزة دي هتاخد معاه مواقف ايجابية كل ما الموضوع يزيد حبة بحبة ولكن موضوع الثقة دا موضوع كبير وعميق فيه ازمة ثقة في الدولة ..
محمد صلاح: فيه اللي بيقدم لك شكوى وحضرتك تقول انه اه بالنيابة عنه ترفع دعوى قضائية .
أ/ سعيد الألفي: مش كل الشكاوي اللي بتجيلنا بنرفع عنها دعاوي ممكن نحلها ودي
محمد صلاح: فيه اتصال بينك وبين المستهلك دا ؟
أ/ سعيد الألفي: على طول اللي بيحصل ان اول ما الشكوى بتجيلنا بياخدوا رقم الشكوى منه بعد كد الجهاز بيتصل بالشاكي بيقوله مطلوب منك الورق الاتي عايز الفاتنورة عايز شهادة الضمان عايز كذا عايز كذا عشان اضمن لك حقك فاما يبعتها له بالفاكس يا اما بيجيبها وبعدين بيحصل تواصل مع المستهلك لحد ما بيوصل له حقه بيبقى فيه تقرير عن كل شكوى من ساعة مادخلت لغاية ما اتحلت ايه اللي تم فيها
محمد صلاح: طب احنا معانا شوية ناس تعاملوا مع الجهاز نشوفهم .
فاصل
مواطن1: محتاج يتفعل لان انا شخصيا مريت بتجربة كنتى شاري بنطلون من احد الشركات المضمونة جدا وبعد مرور ايام رحت قالي لا دا هو كده عملت محضر في القسم كانت النتيجة لف بقى على ما تاخد حقك لك هو الجهازشكله كويس لكنت مفرغ من مضمونه اولا لعدم وجود الادوات اللي بتساعدهم للضرب بايد من حديد على جشع التجار من ناحية تانية انه غير معلوم لكتير جدا جدا من الناس انا عشان اخد حقي رحت عملتن محضر في القسم وجبت النجدة وفي الاخر مخدتش حقي
مواطن2: جبت كولدير عشان يتحط في جامع فبعد 15 يوم فوجئت ان الكولدير دا عطلان اساسا فرجعت للشركة اللي انا خدت منها الحاجات دي الفاتورة معتمدة وكل حاجة طبعا رفضوا ان هما ياخدوه وقالوا ما نعرفش عنك أي حاجة المهم لجات لجهاز حماية المستهلك فوجئت ان الجهاز بيطلب مني اوراق وحاجات وطلبات المواطن العادي ما يقدرش ان هو يعملها وفي النهاية خدوا نمرة التليفون وخدوا العنوان بتاع الشركة والعنوان بتاعي وكل البيانات وما سالوش فاضطريت طبعا انا اجيب واحد من برة يعمل صيانة للكولدير
مواطن3: التليفون الصيني دلوقت هيتلغي معرفش ايه السبب ؟
فاصل
محمد صلاح: وفي بعض الاحيان بيتلب منه فواتير ماهو لازم يكبردماغه
أ/ سعيد الألفي: افقول لحضرتك احنا ماشيين بالقانون عشان اجيبلك حقك لوانا رحت لاي تاجرهيقولي مش انا اللي بعتها هنجيب مصحف ونقعد نحلف عليه بقى .. يعني هنعملها ازاي ما انا عشان كده بقول للمستهلك اناعايز بس الورقة الصغيرة اللي بيديهالك الكاشير وانت خارج بس
محمد صلاح: عايز تتاكد ان السلعوة دي من المحل دا ؟
أ/ سعيد الألفي: بس كده.. امتى اشتراها واشتراها بكام العدد بتاعها قد ايه وامتى طبعا بس عشان اصحح معلومة الراح اللي بيقول جهاز كولدير بيقول طبوا مني اوراق هو اللي اتطلب شهادة الضمان بتاعتها والفاتورة فقط ولكن لو انت اشتريت حاجة من غير شهادة ضمان زي الاخ اللي بيتكلم عن الموبايل الصيني ، الموبايل الصيني دا لامعاه ضمان ولا معاه فاتورة ، ماهو برضه احنا اتفقنا ان المنظومة بتاعة حماية المستهلك لازم لها 3 اطراف الجمعيات والاجهزة الرقابية والمستهلك ، مش شرط الفاتورة
محمد صلاح: عشان تتاكد ان السلعة لو معيوبة تعرف تجيب له حقه ..طيب ايه حكاية العربيات ؟
أ/ سعيد الألفي: حصل استدعاء لعربيات كتيرة جدا في الولايات المتحدة بسبب دواسة البنزين العربية التويوتا الكورولا اعتقد حوالي 9 ملون عربية ، احنا بالنسبة لنا في مصر اول ما سمعنا الخبر دا عن طريق المكتب الجاري بتاعنا في واشنطن كشفنا على العربيات اللي هنا وسالنا شركة تويوتا اللي هنا ، اتويوتا في مصر بتستورد العربيات من مصنع في جنوب افريقيا وفيه العربيات الخليجي اللي بتيجي من دول الخليج مفيش أي شكوى جاتلنا على حكاية دواسة البنزين لامور فنية وخلافه ، الشكوى اللي جاتلنا من نوع معين اعتقد من كورولا 2008/2009 حاجة اسم Step tronic اللي هو الفتيس المانيوال وما بين الاتوماتيك وجد انه فيه ناس مش عارفة تستخدمه فيه ناس تم البيع لها هذا الكلام على انه اتوماتيك فيه ناس فعلا ها الجهاز مش شغال عندهم وبالتالي جبنا بتوع شركة تويوتا وطلع قرار من الجهاز باصلاح وتغيير العلبة بتاعة الفتيس دا لحوالي 6500 عربية واتفقنا معاهم على جدول زمني معين والشركة بطلت تجيب الفتيس دا تاني بتجيب المانيوال او العادي .... والعربية لا تضر بسلامة وامان المواطن واي حاجة هتضر بسلامة وامان المواطن دا سيتم سحبها من السوق ....
محمد صلاح: البلد اتملت بضاعة صيني وطبعع هتقول للراجل هات الفاتورة مفيش بتعملوا ايه بقى ؟
أ/ سعيد الألفي: لو مطرح أي جهاز حماية مستهلك في العالم هتعمل ايه ..؟ باتفق مع هيئة الصادرات الصينية الرقابة على الصادرات الصينية انه أي حاجة جاية مصر لازم يدولها شهادة انها مطابقة للمواصفات لو ما ادوش هذه الشهادة البضاعة ما تخش مصر
محمد صلاح: طب ماهو فيه طرق غير شرعية الناس اللي هتصدر والتهريب .
أ/ سعيد الألفي: زي الموبايلات الصيني دي اكيد مهربة ماهو مش ممكن جهاز تنظيم الاتصالات يجي لك موافقة على الموبايلات وبعد كده يقولك لو استعملته هقطع عنك الاتصال
محمد صلاح: انت بتنصح المستهلك بايه؟
أ/ سعيد الألفي: بنصح المستهلك ارجوك ارجوك لما تشتري البضاعة اشتريها من حد تعرفه لو حد ما تعرفوش ارجوك احصل على فاتورة وشهادة ضمان لو هي سلعة معمرة ، اقرا الحاجة قبل ما تشتريها ، عندك شكوى او استفسار او أي حاجة عن أي منتج انت ناوي تشتريه شوف اقرب جمعية حماية مستهلك بحيث كل ما المستهلك يتصل بينا كل ما هيزيد معرفة ، نزلنا في وقت من الاوقات ارقام مراكز الصيانة للشركات المنتجة لكافة السلع المعمرة على حساب الجهاز ..اما دخول البضاعة ودا بقى المهندس رشيد اصدر قرار وحصل انه كان في زيارة للصين وهو هناك
محمد صلاح: انت عايز الناس تتصل بيك انت معندكش شكوى من انه عليك حمل زيادة ؟
أ/ سعيد الألفي: لا ماهي دي شغلتي مقدرش اشتكي منها ، اشتكي ان انا عندي نقص موارد ما لكن اشتكي ان انا عندي حمل زيادة ، منوع منعا باتا لاي جمعية من جمعيات حماية المستهلك وطبعا لجهاز حماية المستهلك انه يتلقى أي اموال من أي حتة فيما عدا موازنة الدولة
محمد صلاح: هل حدث انه جات لك شكوى ولضعف النفقات والموارد حال دون ان تمشي في الشكاوى دي؟
أ/ سعيد الألفي: لا انا اقول لحضرتك حاجة انا بطبيعتي بحب التحدي ، انا اتمنى انه جهاز حماية المستهلك ناس كتير بيقولوا ما يعرفوش انا اتمنى انه يكون ليا اعانات بس اتمنى انه التليفزيون يرحمني في السعر شوية ..نمرة اتنين انه انا عايزافتح الخط الساخن على مستوى الجمهورية عايز كل مستهلك في مصر يحس بالجهاز
محمد صلاح: كان معنا النهاردة رئيس جهاز حماية المستهلك أ سعيد الالفي قال كلامه معانا النهاردة كان كلام جميل كلام معقول واكيد كان كلام مسئول خلص الكلام سلام نلتقي في الحلقة المقبلة