انا اتجننت عشان أبعت رسالة زي دي ؟!

السلام عليكم
مشكلتي بتتلخص في اني حاسس بكمية عقد نفسية غريبة من فكرة لفكرة دماغي باظت خالص من مشكلة للتانية الدنيا اتراكمت على نافوخي ومش عارف اعمل ايه .. السؤال هنا هوة انا اتجننت مثلا عشان أبعت رسالة زي دي ؟ صحيح انا ما شرحتش مشكلتي بالتفصيل أو هية ايه تحديدا لكن الفكرة في السطرين اللي كتبتهم .. وهية الدماغ بقت عاملة زي غرفة الكرار بتاعة زمان لدرجة اني مش بعرف أنام نهائي ادخل أنام ألاقي كمية زحمة في دماغي غريبة بفضل بالمنظر ده للصبح هتجنن من كتر التفكير والقلق وياريت فيه حاجة بتتحل .. أسف للإزعاج لكن فعلا مستني النصيحة .
احمد فهمي

فضفضة
محررة الصفحة .. نيفين حجازي

أستاذ احمد حضرتك مش مريض نفسي وكل الحكاية انك عندك ضغوط كتيرة ومشاكل محتاج ترتبها حسب الأولوية وابعد تماماً نصيحة مني في التفكير لحظة الدخول الى النوم من أخطر ما يمكن .. عندك اليوم بطوله حدد لنفسك ساعة أو اتنين من اليوم للتخلص من موضوع أو مشكلة بعينها وإذا المشكلة اللي فيها صعوبة في حلها ارميها بعيد شوية بشكل مؤقت لغاية ما تخلص من المشكلة التانية .. ولو نجحت في إيجاد الحل في أزمة معينة كافئ نفسك باي حاجة ولو بسيطة حتى لو كانت انك هتشتري لنفسك قميص جديد وعلى فكرة حكاية أننا نكافئ نفسنا على اي إنجاز ده موضوع صحي جدا وبيسيب اثر رائع جوانا ، حاجة تانية : لما يكون عندك مشاكل بلاش تفكر فيها كلها في وقت واحد لأنك في النهاية هتكتشف ان دماغك وجعتك على الفاضي .. خلي الأمور بسيطة وهون على نفسك وخلي كل مشكلة على حدى ، وياريت لما تفكر في حاجة تحدد لنفسك وقت للتوقف عن التفكير وتعيش الباقي من يومك عادي جدا بالطريقة دي انت بتسيب مساحة كويسة جدا لباقي تفاصيل حياتك وانت بعيد عن الإحساس بالضغط العصبي .. صدقني الطريقة دي ناجحة جدا .. وصدقني الهموم عشان موجودة وقاعدالنا بالمرصاد في كل الأحوال يبقى نقسم وقتنا للتفكير فيها عشان نعرف ونقدر نفكر في باقي عيشتنا بشكل كويس ويبقى عندنا الوقت اللي نقدر نسعد نفسنا وأسرتها فيه .
[email protected]