السلام عليكم، أولاً أحب أشكر أسرة "بص وطل" بشكل عام. أنا ما زلت في المشكلة ومحتارة، وأوقات مش بافهم نفسي ولا باعرف أنا عايزة إيه؟؟ أنا عندي 21 سنة وتعرّفت على زميلي في الكلية، هو شاب محترم وكويس، بس لسه قدّامه جيش وشقّة وشغل، بغضّ النظر عن كل ده هو بيحبنى جدا، وقبل كده طلبت منه إننا نسيب بعض وبعد كده رجعنا تاني. أنا متأكدة إنه ممكن يعمل أي حاجة علشاني، ومخلص لي، لكن المشكلة فيّ أنا؛ باحس إني متقلبة أوي في مشاعري تجاهه، أوقات باحس إني مشدودة ليه وهو ده اللي يناسبني وأتمنى أعيش معاه، وأوقات باحس إنه عادي في حياتي. برضه نقطة إننا في نفس السن دي عاملة لي عقدة؛ باحس إني أعقل منه في كذا حاجة، رغم إنه راجل وبيتحمّل مسئولية ومش زي كتير من الشباب الهايف، بس طبعا قدامه مش أقل من سنة ونص أو سنتين عشان يتقدم ده غير الشقة؛ لأن أهلي مش هيوافقوا أسكن في بيت عائلة، وهو له شقة فيها. أنا مش فاهمة نفسي؛ لأن دماغي تعبتني من كتر التفكير؛ أسيبه علشان في نفس سني، وإني باحس إني أعقل منه وأوفق على اللي أهلي يقولوا عليه؟ ولا أنتظر لحد ما ييجي لي؟ أنا مشوشة جدا أوقات باخاف وأوقات باتطمّن على نفسي معاه في المستقبل، وطبعا كله بتقدير ربنا عز وجل. وكمان في نقطة مهمة جدا.. أنا باخاف ربنا ومش عايزة أعمل حاجة حرام، أنا باقول له كلامنا كل يوم مع بعض مش كويس، رغم إننا بنتكلم عادي كل واحد يطمّن على الثاني، ولما باقول له نقلل من كده وعايزين نطيع ربنا يزعل ويقول إنتي مش بتحبيني وأنا صدّقتك للمرة التانية. أنا بجد مش عارفة دماغي بتفكر إزاي، تعبت وعايزة نصيحة، خصوصا إن ضميري بيؤنبني لما باسيبه؛ لأنه بيتعب بسببي أوي، وخايفة أكون وجودي معاه علشان بيحبني وبس مش علشان أنا بحبه زيه، ولا هو كده البنت اللي تلاقي واحد يحبها تتدلع، ولما تحب واحد هو يتدلع عليها.. غريبة الدنيا أوي! آسفة على الإطالة لكن أرجو النصيحة وأنا منتظرة.
nona
عزيزتي.. أنا أشعر بمدى حيرتك وترددك في اتخاذ قرار في هذا الموقف، ولكن من الواضح جداً من كلامك إنك ماحبيتيش الشخص ده ولا حتى عقلك مقتنع بيه وطبعاً ده له أسباب كتير. أنتي مش مقتنعة بظروفه خصوصاً إنه لسه في بداية حياته، وقدامه وقت عشان يكون في علاقة رسمية بينكم، وكمان مشاعرك متقلبة تماماً، وده معناه إنك مش بتحبيه؛ فالحب يا عزيزتي هو شعور بالاطمئنان والاستقرار والتوافق بين القلب والعقل، ومع الأسف أنتي ماعندكيش التوافق ده. ومن خلال كلامك شعرت بأنك تريدين الارتباط فقط، وده من حقك، ولكن تمهلي وفكري جيداً إن الارتباط لازم يكون مبني على أسس سليمة علشان تعيشي مرتاحة ومقتنعة في المستقبل. الشخص ده قريب منك في السن أو في نفس سنك تقريباً، وده مسبب لك مشكلة؛ عشان طبعاً هو محتاج وقت عشان يكون جاهز إنه ياخد خطوة رسمية وأنتي قلتي مش أقل من سنتين! طيب فكّرتي في الفترة دي أنتي هيكون وضعك إيه معاه؟؟ يا ترى إيه شكل العلاقة بينكم في خلال الفترة دي؟؟ عزيزتي.. أخاف عليك الدخول في تجربة من البداية محكوم عليها بالفشل، في نفس الوقت، وأنا مش ضد إنك تستحملي ظروف شخص وتقفي جنبه في أزمته في حياته، ولكن لما يكون فيه ارتباط رسمي واقتناع منك في البداية، بس أنتي أصلاً مش مقتنعة بيه ومترددة جداً في اتخاذ قرار إنك تستمري معه أو لأ، أنا باحترم فيكي شعورك بالمسئولية، وإنك مش عايزة تعملي حاجة غلط وبتراعي ربنا في تصرفاتك وده تفكير كويس منك. صديقتي.. إنتي سنك لسه صغير ولسه هتعرفي ناس كثير في حياتك، وإحساسك إن فيه حاجات مش لاقياها في الشخص ده لازم تفهّميه إنك مش هتكوني مرتاحة للعلاقة بالشكل ده، إنه مش قادر يتقدّم لك رسمي، وإنه لو عايزك هيتقدم لك لما ظروفه تسمح. أما بالنسبة لك يا صديقتي محتاجة وقفة مع نفسك؛ علشان تعرفي إيه هي مواصفات شريك حياتك، وإيه اللي إنتي محتاجاه يكون فيه، وإيه هي شروطك لقبول شخص، يعني لازم تحددي مواصفاته والأولويات بالنسبة لك، المهم في النهاية إنك تشعري مع الشخص اللي تختاريه بالراحة والاقتناع الكامل، وتفكّري بعقلك أكتر علشان تعرفي تختاري صح، وتحددي في البداية إنتي عايزة إيه، استخيري الله في أمرك وأتمنى إنك توصلي للقرار السليم.