أحمد شاكر يكتب: العيب فى مين.. مبارك ولا مرسي ؟

تفتكروا العيب في مين ؟
في فساد مبارك
ولا عشوائية مرسي ؟

اقولكم ؟
العيب فينا احنا
احنا شعب اتربي غلط , ثقافه زيرو فى كل حاجه
متعلمناش نحب بعض , متعلمناش نصفي ونقول الصدق ونعمل الصح
عندنا استعداد غريب اننا نعمل اي حاجه غلط والاغرب .. اننا بنستمتع بيها
عارفين لو صح .. مبنحبش نعمله !

النقيد عندنا هوايه , والفشل استقرار

عشوائين جوا انفسنا ,, افكارنا نفسها مهلهله ومش مرتبه
واكبر دليل اننا شعب عشوائي بالفطره .. مثال مصغر
وانتا فى المدرسه
اكتر ماده كنت بنبقا شاطرين فيها .. اللى مدرسها بيدينا بالجزمه اكتر فيها
اكتر استاذ كان بيتهزأ مننا فى الفصل , الاستاذ اللي مكنش بيضربنا
لما الاستاذ كان بيطلع من الفصل , بشكل لا ارادي نقف ونطبل ونهيص
ولو بس لمحنا خياله من برا , بنقعد زي الجزمه

اوعو تستهونو بالعلامات دي , دي اساس حياتنا دلوقتي
احنا شعب اتعود يمشي عدل .. بس لما يخاف
اتعود يعمل الصح .. بس لما يترهب
للاسف متعودش علي ثقافة انه يعمل الصح .. عشان صح


مبقولش نظام مبارك كان حلو , ولا مرسي معديه العيب
بس المشكله الاساسيه فعلا .. فينا احنا