لو لمسني هضربه

مساء الخير
مشكلتي ان موعد زواجي قرب .. انا مخطوبة من سنة ونص بس مشكلتي اني لسة مش واخدة على خطيبي لان والدي محرج علينا نخرج او نقعد في عدم وجوده ومافتكرش انه مسك ايدي مرة واحدة وانا بصراحة مكسوفة منه جداً جداً وموضوع ليلة الزفاف عامل لية ذعر وخوف رهيب ومش عارفة هتعامل معاه ازاي بتهيالي لو جه يلمسني هضربه او اتعدى عليه بالكلام ، إحنا متعلمين انا وأخواتي ان ممنوع حد يكلمنا او يلمسنا وكبرنا على الخوف عموما من التعامل مع الجنس الاخر تحسبا لأي خطا ولو غير مقصود وعلشان كدة بجد انا متوترة جداً ومش قادرة افتح الموضوع حتى مع أختي الكبيرة هية متجوزة بس مكسوفة منها هية كمان .. ياريت تقولولي الحل لان معاد الفرح قرب جداً وشكرا ليكم
ن. ب
فضفضة
محررة الصفحة .. نيفين حجازي
صديقتي العزيزة انت متوترة زيادة عن اللزوم .. نصيحتي ليكي في الاول اوعي تتهوري وتضربيه بجد أحسن الموضوع يقلب غم .. واتشجعي واتكلمي مع أختك ده هيخليكي تحسي بهدوء اكتر ويوم زفافك ان شاء الله خليكي على الفطرة وهوة هيتصرف وهيتعامل معاكي بلطف وحرص .. ما تخافيش من حاجة والف مبروك وربنا يتمم لك على الف خير