محمد عربي يكتب : معاك فلان الفلانى من عيلان العيلانى يا ريس

سيدى وتاج راسى رئيس الجمهورية اقدم اغلى واطيب تحية ليك وللاسرة الكريمة مع الدعاء لكم بدوام الصحة والعافية وبعد.
معاك فلان الفلانى من عيلان العيلانى فى مصر والله ياريس ماجيتش ديوان المظالم عشان اشتكى لاسمح الله ابدا لكن جيت لما العقل شت من كتر الحسابات فقلت يمكن الاقى عندك الحل وبايدك وزن كلامى بميزان العدل وتحسبها معايا .
ياسيدى الرئيس انا شغال فى شركة قطاع خاص باخد فى الشهر حوالى 2000 ربع جنية(500جنيه) فى الشهر بالبدلات بكلة بدفع ايجار منهم حوالى 800 ربع جنية فى الشهر وحوالى نور وكهربا وميا ونظافة حوالى 600ربع وبحاول اوفرهم والله ياريس ومتجوز وعندى عيلين فى المدارس لسة وطبعا لازم اسيب فى البيت مصروف كنت بسيب 40 ربع فى اليوم لقيت الميزانية ماتسمحش خلتها 20 ربع تلم بية ام العيال اليلة وبركب مواصلات رايح جاى حوالى 1200ربع فى الشهر دول ماكنوش كدا ياريس بس انا حاولت اوفر كنت بركب توك توك لغاية الطريق الرئيسى باربع تربع وفرتهم وبقيت امشيها وكنت بركب عربية تودينى لغاية اقرب حتة لشغلى وبعدين اغير العربية كانت ب40 ربع راح المفترى السواق غلاها بقت ب60ربع قال اية البنزين مش موجود والكارتة غيليت طب ياسيدى احنا مالانا ثم ان البنزين موجود فى كل مكان اهو والناس غلابة بيدفعوا وهما ساكتين وفرتهم وركبت الاتوبيس رغم انه غالبا مابيوصلش بس اهو احسن من مافيش وبقيت اتمشى النص كيلو الباقى لغاية ماوصل الشغل وكنت بجيب الجرنال تقريبا يوميا لاقيت مالوش لازمة اية لازم اعرف اية الى بيحصل واناواثق فيك ياريس رحت موفر اربع تربع زيهم وكنت بجيب علبة كشرى ب10تربع فى اليوم اهى كانت فطارى وغدايا وساعات عشايا لاقيتها مش نافعة رحت رايح وجبت رغيف بربعين وشوية طعمية على بدنجان بحوالى اربع تربع وطبعا ياريس رحت اشتغل شغل تانى لقيت المفترى بعد اما شغلنى قالى همشيك لان المحلات هتقفل بعد كدا 10 ومش مستحملة واهو كان بيدينى هو كمان 2000 ربع وراحوا ...تعرف ياريس دانا بدعى ان ولادى مايعيوش لحسان اوديهم التامين يطلعوا عندهم امراض الدنيا وانا مش ناقص عجز فى الميزانية واهى ماشية ياريس ببركة مشروعك ربنا معاك ويقويك علينا وتنهض بينا .
هتقولى طب اية مشكلتك مافيش ياريس كل ماهونالك بس ان عمر ماعدى عليا يوم 10فى الشهر الا اما اكون شتبط خالص طب اعمل اية بس ياريت ياريس تشوفلى عجز ميزانيتى دى جاية منين ولا انا مش عارف احسبها احسبهالى ياريس ولك جزيل الشكر والسلام ختام ، مواطنك واخوك الصغر وابنك فلان الفلانى.