نشطاء يدشنون هاشتاج "احميها بدل ماتتحرش بيها" لمواجهة جريمة التحرش

دشن نشطاء موقع التواصل الاجتماعى هاشتاج اسموة #حملة_احميها_بدل_ماتتحرش_بيها وذلك لادانة ماحدث لفتيات التحرير من اغتصاب وتحرش اول امس الاحد اثناء الاحتفال بتنصيب الرئيس السيسي.
وجاءت التغريدات معبرة عن غضب عارم وتنديد واستهجان لما حدث للفتيات حيث كتبت @AsMaSaMir7 : احميها عشان ليها حق زيك بالظبط انها تمشي ف الشارع من غير ما تخاف، وعلق FeRoNoKia@: لما تبقي واقف ف حادثة تحرش وكل همك تصور بدل ماتحميها..يبقي انت مافرقتش حاجة عن الكلب اللي بيتحرش بيها .
وقال @mohamedsaed820 : يمكن لما تقف معاها حي يقف مع امك او اختك او مراتك او بنتك ، واضافت @Soow_Alii : التحرش ممكن يكون نظرتك المقرفه.. كلماتك المقرفة اللى بتقرف البنت من نفسها مش بس باللمس!.
وفى نفس السياق قالت @mhsomh221 : في مجتمعي يصورونا إن المرأة ضعيفة وعاجزة عن حماية نفسها وأنها مطمع لأي رجل وكأنها تمشي عاريه في الشارع ، واضافت @yousef3hosam يا #راجل يا القاعد تدضحك و تبص .. بصلها ، شوفها اختك .. تقبل تشوف اختك بينهشوا فيها .. هتقدر ؟!!!!!!!! .
بينما كتبت @LeenGh9 : البنات ولبسها مش السبب!! المشكلة في التفكير والتوعية من الاساس ومن الصغر ، ووجهت @sarahsherif73 رساله للمتحرشين قائلة : فين نخوتك و رجولتك و انت بتضايق بنت و بتخوفها عشان انت اقوى منها ؟!! .
وغرد @The_Badboss قائلا : لازم يطبق قانون يحميهم ولو مفيش قانون يحميهم يبقي ننزل احنا نحميهم مش نعمل هوجه يومين وننسي كالعاده ، وعلق ameedshaheen@ : مشكلة التحرش مش اول مرة تظهر ..المشكلة الحقيقية هى عدم اعتراف مجتمعنا بالمشكلة .. الاعتراف هو اول طريق الحل.
وكتب kareemyasser8 : اي حد يبررلك التحرش ويقولك اصل البت متعرية و مكشوفه اظرفه قلم على قفاه و قوله اصل قفاك مغري و مكشوف ، وقالت rahmaah79500128 : كرهتونا فى اليوم اللى اتولدنا فيه لاقينا نفسنا بنات .
بينما استنكر البعض الاخر فكره ان تقوم حملات افتراضيه على مواقع التواصل الاجتماعى دون اخذ اي خطوة على ارض الواقع من توعيه او منع او سن قوانين حيث كتب @YoussefElNmr : 90٪ من اللى فى دماغكوا معندهمش تويتر اصلا ، انزلوا الشارع و اعملوا حاجة مفيدة ، واضافت @MaiHassan94 : عمالين تعملوا حملات تويتر و فيس بوك و محدش بيعمل حاجة على ارض الواقع .
وفى نفس السياق قال @AHSHA1 : دول شوية اشكال ضاله ما بيأثرش فيهم حملات .. لازم يتصلبو في ميدان عام ويبقو عبرة لغيرهم .، وعلق @mekkawyo : كيف سنقضى على التحرش بهاشتاج ؟! .
يذكر ان سيدة وابنتها من ضمن المجني عليهن، بالاضافة الي 3 آخريات تعرضوا لهتك عرض كامل من قبل متحرشين ، عقب تجريدهم من ملابسهم أثناء احتفالهم بميدان التحرير، بتنصيب المشير عبدالفتاح السيسي كرئيس للجمهورية، فيما ألقي القبض علي 7 متهمين، أمرت النيابة بحبس 6 منهم 4 ايام علي ذمة التحقيق وإيداع أحدهم دار الرعاية لحداثة سنه.