2+2=5

جوه أسوار نادي الزمالك تلاقى طبل وزمر بتهلل للمرشحين على رئاسة وعضوية النادي في الانتخابات اللي هتتعمل في مارس منهم المستشار والدكتور ومنهم كمان اللي معاه رتبة في الداخلية من أبناء النادي والكل بيتسابق لنيل رضاهم في موسم الانتخابات.
وفيه ناس تانية انسحبت من مولد الانتخابات زى أيمن يونس وعزمي مجاهد لأنهم غير راضين عن التهليل والتطبيل اللي بيحصل مش مقتنعين بالفلكلور الشعبي اللي بيحصل في النادي على مناصب بجرة قلم من وزارة الرياضة تكون بره.
شفنا تربيطات شغالة في الضلمة علشان تكمل قائمة ويخوض بيها سعادة الريس الانتخابات وناس داخلة مستقلة يمكن تصادف وتنول رضا أعضاء الجمعية العمومية.
في الناحية التانية داخل النادي الاهلى تحس انه أصلا مفيش حاجة اسمها انتخابات ولا الباب مفتوح الإداريين جوه النادي مش لاقيين حد يترشح ناقص واحد فيهم يمسك ميكرفون ويقول مرشح لله يا بشر لحد ما جه مجدي عبد الغنى صاحب جون هولندا فى كأس العالم اللي ذل بيه الشعب المصري وفاضحه في كل حته يروحها وناقص افتح الحنفية في البيت ألاقى الجون بتاعه وحرك المياه الراكدة وفتح المزاد على الانتخابات ونزل على منصب النائب وعمال يقول في الفضائيات إنا هاخد المنصب بالتزكية يمكن برنامجه بيعتمد على الجون بتاع هولندا وبيعتبره احد انجازاته ده اللى خلاه واثق وقاعد على شاشات الفضائيات منشكح قوى.
بس للأمانة لا شفنا حد فى الاهلى بيطبل ولا بيزمر ولا حتى بيرقص لمرشح هو وداخل النادى كله شغال فى صمت لا حس ولا خبر الناس دى عارفة بتعمل ايه؟ بس مش عارف ليه قلبي حاسس ان مجدى عبدالغنى هيسخن الانتخابات وهيقعد يخبط فى الناس كلها هو عادته ولا هيشتريها من ايام اتحاد الكورة وكان عضو مشاغب وتلاقى خناقاته وصوته طالع وفاتح على الرابع ده حتى ابنه يوسف اللى بيلعب فى الدرجة الثالثة الحكام مسلمتش من لسانه شتم حكم لما طرده فى مباراة وتوقف علشانها كام ماتش وكان هيتشطب لولا ربنا ستر.
شفت الفرق بين انتخابات الاهلى والزمالك طبعا مفيش داعى للمقارنة خلينا فى حالنا احسن ماشى يا عم بس هما ناسيين شئ مهم ان الفيفا ضرب كرسي فى الكلوب وبعت خطاب ان الإنتخابات تتجمد لحين صدور قانون الرياضة الجديد وبيهدد بإيقاف النشاط الرياضى خلوا بالكم يا جماعة الفيفا مبيهزرش ومش هياخد بتصريحات طاهر ابوزيد وزير الرياضة العنترية ورفضه الخطاب وهينسف مخططات وتربيطات المرشحين للانتخابات.
ابوزيد لسه بيكابر كل قضاياه اللى دخل فيها بيخسرها معندهوش دراية بلوائح الفيفا ولا حتى اللوائح الداخلية ومعاه مستشاريين بيغرقوه ودخلوه فى صدام مع الاهلى والزمالك ولبسوه فى شجرة مع الاتحاد الدولى واللجنة الأوليمبية الدولية ورغم كل ده مش عاوز يقدم استقالة وماسك فى الكرسي الخشب بتاع الوزارة متستغربشي ده حال الكرة المصرية.
عمنا الراحل صلاح جاهين قال مرة فى كلمات بسيطة ومعناها كبير "أضحك نص ضحكة أهي أحسن من الدموع واضحك لو غصب عنك وارضي وخليك قنوع حاول تنسى اللي تعبك وأتحدى جميع مصاعبك ولو الأفراح مجتشى اضحك وبلاش خضوع دا خضوع الحزن قاسى ونهار مفيهوش سطوع يعنى انسي الهم واضحك".