محظوظة بحبكم.. راندا البحيري: الناس عايزين يعملولي مهرجان لوحدي

كتبت الفنانة راندا البحيري، عبر صفحتها الرسمية على موقع التواصل الاجتماعي "فيسبوك"، منشورا أثنت فيه على الدعم الذي تلقته من جمهورها بعد قيامها بالحديث عن عدم دعوتها على مهرجانات فنية.
وقالت راندا البحيري، "إللي طلعت بيه من اليوم الجميل ده إن أصحابي هنا وعيلتي وجمهوري عايزين يعملولي ((مهرجان)) ليا لوحدي من كُِتر ما بيحبوني انا محظوظة بحبكم ويا بختي بيكم أنا جالي تليفونات ورسايل وغمرتوني بحبكم أقسم بالله العظيم ايه داااا".
واختتمت "بجد مش هخذلكم وانا كسبانه بحبكم اوي بلا مهرجانات بلا بتنجان يالا نحدد يوم نخرج فيه كلنا و ناكل بيتزا".
وكانت وجهت الفنانة راندا البحيري، رسالة للقائمين على مهرجان القاهرة السينمائي، بعد تهميشها من الحضور، عبر حسابها الشخصي على موقع التواصل الاجتماعي فيسبوك.
وكتبت "بحب بلدي و هفضل أحبها .. بلدي ماشيه في دمي و جوا قلبي من سنوات و الي الآن مثلت بطولات و أفلام كتير جداً زمان بقي كنت اقرا دايماً مانشيت في مُعظم الجرايد و المجلات مكتوب ((غياب نجوم السينما عن مهرجان السينما)) و كنت بسمع ب وداني إشادة بيا و ب كام زميل يتعدوا علي صوابع الإيد الواحده .. اللي كنا بنروح سنوياً ندعم مهرجان بلدنا من ((قلبنا)) و الدليل انه من قلبنا ان مكانش فيه سوشيال و لا ترند و لا حاجه بتحصل اما بنحضر ولا مثلا بناخد فلوس ولا بناخد شهره احنا بس بنروح علشان نقف جنب مهرجان بلدنا اللي كان دايماً بيتعمل في الاوبرا المصرية".
وتابعت: "و علي الناحيه التانيه كان فيه ممثلين مبيروحوش مهرجان بلدهم ده و بيهتموا جداً بمهرجانات منافسه في بلاد معندهاش سينما بس علشان هياخدوا فلوس كتير لما يروحوا و كانوا بيروحوا جري و كنت برفض علشان بلدي المهم .. 2004 .. 2005 ..2006 و هكذا و كتير اوي من السنين كنت منتظمه في الحضور و الندوات وغيره لحد ما القائمين علي المهرجان إتغيروا و هوب من ساعتها إتقطعت الأخبار و العنوان الحالي اللي هو نفسه العنوان القديم اللي كان بييجي عليه الدعوات لسه موجود و مبيجيبش عليه اي دعوات .. زي ما يكون حد جه تدخل و مسح اسمي من المدعوين".
وأضافت: "وعموماً هو ريحني من وجع قلب الماكياج و الشعر و اختيار فستان مناسب ولائق للحدث.. و بجد بجد انا عند نفسي كبيره اوي اوي و اي مكان مش عايزني هو اللي خسران والله هو اللي خسران مش انا ... و ده حصل من سنين كتير اوي وانا عمري ما بروح مكان مش معزومه عليه و لا بروح مكان من غير دعوه علشان كده عمري ما هروح و البوست ده مش علشان هم يعرفوا ان مبيجيليش دعوه لا البوست ده ردا علي كل الناس اللي بتقول انت ليه مبتشتغليش او ليه مش موجوده علشان الدنيا كده .. انت لو مصاحب الكل و لذيذ و عسل هتبقي موجود و لو مش مصاحب الكل حقك هيتاخد".