ابنة عائلة الإنتاج الفني بلا عمل.. حكاية رشا سامي العدل مع بيع المأكولات في دهب

بعد حكاية الفنان كريم الحسيني، الذي خذله الفن ولجأ إلى عربة بيع مشروبات ساخنة، تصدرت رشا ابنة الفنان الراحل سامي العدل محركات البحث ومواقع التواصل الاجتماعي، عندما أعلنت عن افتتاح عربة لبيع المأكولات في مدينة دهب.
مش لاقيه شغل .. ابنة سامي العدل تعمل على عربة طعام
ابنة سامي العدل تترك الفن وتفتح مشروع طعام في الشارع بدهب
ممثلة ومش بشتغل كتير
بثت رشا لايف عبر صفحتها على فيسبوك، ذكرت فيه أن تجاهل المنتجين لها في الأعمال الفنية دفعها للبحث عن وسيلة أخرى لكسب رزقها بعيدًا عن الفن وقالت: "أنا بفكر في الموضوع ده بقالي فترة، جيت دهب في شهر 7 اللي فات وقررت أشتغل، والناس عارفة إني ممثلة، بس أنا مش بشتغل كتير، أنا مش بلقي اللوم على حد، أنا نقابية بقالي 20 سنة، والنقابة على عيني وعلى راسي، وكل اللي بيطلعلي من النقابة هو الكارنيه والتأمين الصحي".
أضافت: "كمان لا ألقي اللوم على أصدقائي المخرجين والمنتجين، روحت طلبت شغل وهما متحركوش عشان كل واحد حر، وكفاية أجي على نفسي عشان خاطر الناس وأولادي، أنا تمردت أولا على بيتي وعلى ماما وأولادي وقولت إن أي حاجة مش مريحاني مش هقبلها ولا هعملها، والقرار ده ريحني جدا".
سعيت في الفن وفشلت
تابعت: "من شهر 7 اللي فات أنا بصلح من نفسي حاجات، ممكن يكون العيب فيّا ومش بقول إني ملاك، كلنا بناخد قرارات غلط، وأنا أخطأت كتير في حياتي، وأول الأخطاء عشان اتجوزت مرتين غلط، مش هلوم راجل اتجوزته ومصرفش على بنته، وأنا عشان اتربيت كويس مش هطلع أقطع في حد".
استكملت: "الناس بقت بتدوس عليّا عشان مش بتملق، أنا سعيت وفشلت، وأنا مش بركب تريند، اللي بعمله دلوقتي عشان أكسب لقمة حلال، وأنا مش بركب التريند عشان أنا كتبت عن المشروع ده من فترة طويلة، عايزة أقول إن سهل جدا أخد فلوس من أهلي، ومحدش هيتأخر عليا، بس أنا مش هستنى لحد ما أشحت أو أقول لله يا محسنين، وكل عيلتي جزمتهم على راسي".
اختتمت: "أنا مش هعيب على حد خالص سواء النقابة أو أهلي، يمكن أنا اللي غلط، بس مستعدة أتحمل نتيجة أخطائي، بس أنا هعمل اللي ربنا يقدرني عليه، إذا كان في دهب أو القاهرة أو أي مكان في الدنيا".
وتابعت رشا : ليس لدي إمكانيات كبيرة، وظروفي المادية دفعتني لتجهيز عربة لبيع المأكولات، الموضوع مش سهل لكن أنا عايزة أشتغل وأدور على مصدر رزق واعتمد على نفسي.
وأضافت: لن أقول أنني لا أجد عملًا، مش هستنى حد يشغلني لو ظروفي صعبة، وادعوا كل سيدة ورجل أن يعملوا في أي مهنة شريفة سواء الخياطة أو النجارة أو بيع المأكولات، مفيش حاجة اسمها مش عارف اشتغل إلا لو عندك عائق كبير.
إمكانيات بسيطة
وأكدت رشا أنها بدأت مشروعها بإمكانيات بسيطة وتسعى للتجربة والسعي حيث قالت: أنا بسعى وعايزة أعمل حاجة وأغير الواقع اللي أنا عايشاه وأقاوم الظروف، أنا غيرت طريقة تفكيري وخليته إيجابي، لكن التفكير السلبي هيخليك محبط ومش عارف تعمل حاجة.
وأضافت: في ناس عملتلي بلوك لما شافوني بشتغل الشغلانة دي ، اللي مش قادر يدعمني دي مشكلته هو، أنا مشكلتي المادية حاليًا بحلها بنفسي، ومش طالبة من حد يتدخل في حياتي ويقول لي إيه الصح والغلط، أنا مطلبتش مساعدة أو حاجة من حد.
أعمامي جزمتهم على راسي
وبعد ايام من البث المباشر الذي نشرته عبر صفحتها الشخصية نفت الفنانة رشا سامي العدل ما تردد بشأن مرورها ب«أزمة مالية»، قائلة: «لتصحيح بعض الأخبار والمفهوم لدى البعض، أنا ماقولتش إني مش لاقية آكل أنا قلت إني مستورة الحمد لله بس مش هاستنى لما أفلس».
وأضافت ابنة الفنان الراحل سامي العدل، عبر حسابها الخاص على موقع التواصل الاجتماعي «فيس بوك»: «أنا ماقولتش إني اعتزلت التمثيل، لأنه في دمي وعشقي الأكبر، أنا ما قولتش إني عملت عربية أكل أنا قلت بعمل أكل وببيعه وده عادي جدًا ستات بيوت كتير بتعمله»، مضيفة: «أنا قلت أهلي وعمامي تحديدًا جزمتهم على رأسي ولو احتجت حاجة عمرهم ما يرفضوني وهازود كمان أن مفيش زنقة ليا ماكانش ورا فرجها بعد ربنا عم ليا».
يذكر أن رشا، هي ابنة الفنان سامي العدل، ووالدتها هي الفنانة نادية شكري، شاركت وهي صغيرة في مسرحيتين، الأولى هي «الأمير الصغير» ، والثانية هي «السيرك» ثم شاركت في فيلم « عسل الحب المر» مع الفنان نور الشريف.