أبو العيال سابني وخلع.. نجوى تروي مأساة عدم وجود شهادات ميلاد لأطفالها|فيديو

«ولادي ملهمش ورق ولا شهادات تثبت إنهم عايشين فى الدنيا» .. بتلك الكلمات بدأت الزوجة نجوى فؤاد حديثها ل "صدى البلد" ل تروى مأساتها مع زوجها الهارب الذى امتنع عن تسجيل أبنائه.
تقول الزوجة نجوي فؤاد: "أنا اتجوزت منذ عام 2008 من زوجي وخلفت فى الأول ابني سيف المولود بمرض ضمور في المخ، ومشكلتي بدأت بعد الجواز بسنتين، وبعد الجواز بست سنين اكتشفت انه لم يقم بعمل شهادات ميلاد لأطفاله".
وأضافت الزوجة:" كنت عايشة بربي عيالي وبس وعلاقتى بأهلى مكنش فيها ود ومش بعمل مشاكل وعايزه احافظ على البيت واربي عيالى علشان لو روحت لأهلى مش هيتقبلوني، وابني تعبان وكان تاعبني وزوجى مكنش بيعالجه ويرفض ويقول أنه بصحة جيدة".
وأكدت: " اكتشفت انه مسجلش الأطفال فى الصحة لما طلبت منه شهادة الميلاد علشان ادخل بنتي اسما للمدرسة قالى الشهادة مع والدته ، ولما روحت لها قالتلي مش معايا أى شهادات خالص، ولما واجهته بالكلام ده اعترف إنه معملش أى شهادات للعيال، وبان على حقيقته".
وأضافت:" انا اتصدمت من كلامه ازاى أب مش عامل لعياله شهادات ميلاد، والناس هتقولى ازاى صبرتي لكل ده انتى جبتي اول طفل وتجيبي التانى ، وانا متجوزة جواز رسمي على سنة الله ورسوله، ومش ذنبي ان وانا عايشه مع جوزى ابو ولادي ومكنتش اتوقع انه ميسجلش العيال".
وأوضحت:" هو حصله مشاكل في حياته لما أنا كنت حامل في بنتي أسما واتقبض عليه ودخل السجن فى قضية قديمة، وخلفت البنت وعشنا وقالى هعيش واتعدل فى حياتي، وبعد كده اكتشفت انه بيشرب مخدرات".
وأضافت:" هو كان بيصرف علينا بس الصرف مش كتير وعلاج ابني لضمور العقل كان يحتاج لأموال كثيرة، ووالدتى كانت بتساعدني وتبعتلى فلوس قبل ما تموت، وهو رامي الحمل عليا لوحدي وكنت مستحملة وكان اليوم بيعدي زى اى ست شرقية تستحمل العيشة والبهدلة".
وأكدت:" أنا استحملت الضرب والإهانة وفقره علشان خاطر ولادي، لكن لما اكتشفت انه مفيبش شهادات ميلاد للولاد، بدأ يتعدى عليا بالضرب والاهانة وقالى مفيش مدارس ومش فاضى ليها".
وأضافت:" انا رفعت عليه قضية خلع واتطلقت منه ورفعت عليه قضية نسب بس هو مش بيحضر ولا جلسة، وأولادي مفيش حد دخل مدرسة فيهم بسبب عدم وجود شهادات ميلاد، بس انا بديهم دروس خصوصية لكي يتعلموا لكن مفيش اى احتكاك ليهم بالمجتمع والأطفال اللى في سنهم، وكمان ده مش أب علشان يسيب ولاده كده من غير حقوق".
وأضافت:" انا بشتغل على عيالي من ساعة ما اتطلقت منذ 5 سنوات منه وباخد معاش والدي ومش مكفي وعايشه فى شقة ايجار، وابني محتاج رعاية كبيرة، ومينفعش اسيبه لوحده كتير، وعايز حقوق ولادي وياخدوا حقوقهم من الدولة ويدفعوا تمن غلطة أب وده مش اب علشان يسيب ولاده كده، وأنه حقهم يدخلوا مدرسة وابني المسكين ده يتعالج وهو مش عايز يدفع".
وناشدت الزوجة نجوى الرئيس عبد الفتاح السيسي لحل مشكلتها قائلة:" يا ريس احنا بنحبك وحضرتك عامل مبادرات كتير للأطفال مينفعش فى الدولة المصرية تلات اطفال زي الورد زى دول ميدخلوش مدرسة ويتعلموا وطفل محتاج يتعالج وميتعالجش من ساعة ما اتولد".
واختتمت انها تطالب باستخراج شهادات ميلاد لاطفالها لانهم اصبحوا مدمرين نفسيًا بدون حياة طبيعية و تعليم.