ياريتني مكانه.. أم ناصر تعيش بجوار قبر زوجها: عمره ما ضربني.. فيديو

رصد برنامج "تفاصيل"، المُذاع عبر فضائية "صدى البلد 2"، تقديم الإعلامية "نهال طايل"، تفاصيل حكاية سيدة تدعى "أم ناصر"، التي راعت زوجها المصاب بالشلل لمدة 70 سنة، وبعد وفاته؛ عاشت بجوار قبره.

وقالت "أم ناصر"،: "أمي ماتت وسابتني وأنا عيلة صغيرة عندي 7 سنين، وحماتي هي اللي ربتني، وكنت متربية أنا وجوزي مع بعض"، مضيفة: "اتجوزت وأنا عيلة صغيرة، وعمري ما اتخانقت معاه".
وأوضحت: "أنا سبت الدنيا وجيت أعيش جنبه في المقابر، لأنه هو اللي رباني وأنا ماليش إلا هو.. بقف على التربة بتاعته وأقرأ له الفاتحة، وأقعد أفضفض له، وهو معملش حاجه وحشه في حياته.. ودايما أفتكرله الخير كله".

وأكملت: "كان بيعيط علشاني ويطبطب عليا أما يلاقيني عيانه، هو مثال للرجالة الصح، ومتوفي بقاله كتير، وجالي عرسان كتير؛ بس أنا قولت لا"، مردفة: "عمره ما ضربني، ولا مد إيده عليا، وكان بيزعقلي أما أضرب ابني ولا بنتي".

وعن كيفية عيشها ي هذا المكان؛ قالت: "ولاد الحلال بيساعدوني وبيحنوا عليا، والدنيا ماشيه الحمدلله".
وأضافت: " عمري ما اتخانقت أنا وجوزي، ويا رتني كنت أنا اللي مت وهو لأ.. كان بيداديني زي العيال الصغيرة، ألاقي حد زي ده فين، نادر أما تلاقي واحد زي ده"، مؤكدا: "هو اللي رباني وربى عيالي وعيال عيالي".
واستطردت: "والدته كانت في مقام أمي، وكنت بشيل جزمتها على راسي من فوق، وهي اللي ربتني.. وكنت أما أحطلها الأكل كانت بتحضني وتبوسني".