د. ضحى بركات تكتب: أنت.. أنا "شعر"

مين قال أنا أبكى على أيام جميلة ف عمرنا..فيها الحنان فيها الغرام.وانت أنا
مين قال أنا أرضى لقلبك همسة من حر الألم ..أو حزن أو كسرة منى....ده انت أنا
عيش الحياة والحب وامرح. وافرح على قد اللى كان من حزن يجرح.
.مبروك عليك السعد لون مبروك عليك الحب مطرح .
وأما تعيش إحساس جديد وانت السعيد.. تبقى السعادة لى أنا
قسمة ونصيب بعد المغيب ترجع وتسقيك الهنا ..
لا متداريش ..الفرحة دى منها بعيش ..ده انت أنا

ولو بعيد وللا غريب برده قريب فى القلب ساكن كام سنة ..
.
ازاى أنا هقسى على توأم لروح منها بعيش....مدام لقيت طعم الهنا ميهمنيش ..
ده انت أنا
مبروك ومن قلبى اللى شاف كتير آلام....مبروك وفرحانة بجد ومش كلام
اطوى اللى كان وانسى الهموم والحزن وحروف الملام
انسى اللى كان لو يوم غلطت أو جرحت أو وفيت فوق الحنان
مبروك عليك الحب والفرح وحياة فيها الأمان
أما أنا ..هعيش مع ذكرى جميلة عشتها وهرجع لها ...كان ياما كان
حلو المكان
حلو الزمان .. والامتنان من روحى انا
راضية أنا ..يكفينى ربى بالمنى .والانس بيه كل الهنا.يغفر ويرحمنى أنا
يارب توبة م اللى كان .. دمع الندم يمحى اللى ران
يارب راجع لك مدان اقبل عليل عاش الهوان ..هو أنا
يارب مالينى الأمان ..تكتبنى من أهل الجنان ...نادم أنا حيران أنا..لكن طريقى من هنا
يارب عالم بالزلل. داوى فؤادى م العلل ..
وامحى لى أحوال الألم ..طاب الرجاء فيه الدعاء..من غير ملل....ربى أنا
رحماك يارب الكرم..اشحن لى عزمى بالهمم .
.واقف هناك...طالب هداك .... والسعد يوم تكتب رضاك ......ليا أنا