صلاح عبدالله يكشف إصابته بجلطة في المخ أثرت على حركته

قال صلاح عبدالله إنه تعرض لجلطة دماغية في عام 2010، تركت أثرًا على حركته في المشي.
وكتب صلاح عبدالله منشورًا مطولًا وتفصيليًا عبر حسابه على فيسبوك، قائلًا: «البعض سألني مؤخرًا بأدب واستحياء عن سر الزكة الواضحة في حركتي بِ #عائلة_الحاج_نعمان وِ #قيد_عائلي وأنا واثق أن الكثيرين من الأحبة المتابعين عارفين السر وآخرين منعهم ذوقهم من السؤال خشية إحراجي أو سألوا بناتي وأصدقائي المقربين من ورايا».
وأضاف: «في كل الشغل اللي شاركت فيه بعد 5 / 7 / 2010م الزكة موجودة وده تاريخ حافظه صم لأنه تاريخ الجلطة الدماغية التى أكرمني بها الرحمن ولم يبق منها غير هذه الزكة وبعض الآثار الأخرى التى استطعت بفضل الله التعامل معها».
واستطرد: «قبل التاريخ ده كنت بمشي وبجري عادي والدليل مثبت في أفلام ومسلسلات كتير قبل الجلطة وصحيح اليوم المذكور ده كان أصعب يوم في حياتي لما بعد الفحوصات لقيتني على كرسي متحرك وحولي كل الأحبة الصادقين المخلصين بيحاولوا يمنعوا دموعهم بس مش قادرين والدكاترة بيقنعوني هتقوم وهتمشي وهترجع زي الأول وصحيح مارجعتش زي الأول لكن بفضله وكرمه وإرادته قمت واشتغلت ولسَّه بحلم ببكرة أجمل وأفضل».
واختتم «عبدالله» قائلًا: «ولسَه بحبكم وهفضل أحبكم ودا اللي دفعني للبوح بسر الزكة هههههههههه يمكن تلاقوا بين السطور حاجة مفيدة تجدد أملكم في الحياة وتحكوها لنفسكم وقت اللزوم وتحكوها لكل يائس أو متعثر أو متشائم وأخيرًا وليس بيننا آخِر بإذن الله حابب أقولكم إن الأمل في بُكره عمره ماهيخلص ولا عمره هيبقى ذكرى وإن الناس الحلوة في حياتنا كتير ومش هيخلصوا وهيفضلوا موجودين ليوم الدين».