هاني يونس: حل مشكلة غرق بدروم الرجل المسن والتدخل السريع يبحث مشكلته

قال هاني يونس مستشار رئيس الوزراء، تعليقا على مشكلة الرجل المسن الذي يسكن في بدروم غارق مياه الصرف الصحي، إنه تم حل مشكلته وتم شفط المياه من حجرته.
واضاف يونس على صفحته عبر موقع التواصل الاجتماعي فيس بوك انه اتصل بغادة والي، وزيرة التضامن الاجتماعى، وارسلت فريق التدخل السريع بالوزارة على الفور لاقناع الرجل المتضرر بالانتقال لدار رعاية مسنين او شقة مفروشة.
وجاءت تدوينه هاني يونس كالتالي:
مساء الفل
عم الحاج ده كان ممكن يكون أبويا أو أبو حضرتك
عم الحاج ده عنده 90 سنة، وساكن فى أوضة تقريبا بدروم منخفض عن سطح الأرض، قعدوه فيه أهالينا الطيبين فى المطرية
أبونا الطيب أوضته غرقت النهارده بطفح الصرف الصحى، والزميلة العزيزة مها سالم بلغتنى وبعتتلى الصور دى، والحمد لله ربنا أكرمنا وكلمت المهندس ممدوح رسلان، رئيس الشركة القابضة لمياه الشرب والصرف الصحى، اللى متأخرش وبعت رجالة شركة صرف صحى القاهرة على الفور، اللى اكتشفوا ان البلاعات مسدودة من اللى بيترمى فيها، وشفطوا الميه من الأوضة
ربنا أكرمنا أكتر وكلمت وزيرة التضامن الاجتماعى، الدكتورة غادة والى، اللى بعتت فريق التدخل السريع بالوزارة على الفور، هذا الفريق اللى يستحق تعظيم سلام، وكلفتهم باقناع الشيخ العجوز بالانتقال لدار رعاية مسنين او شقة ونفرشها له وكمان هيعملوا له بحث ولو له دواء هيصرف فورا، ولو ملوش معاش هيتعمل له ..
أنا باكتب الكلام ده ونزلت الصور علشان فيه صفحات كتير نشرت صورة أبويا ده
عندنا تحديات كتير، أيوه
عندنا مشاكل، وفقر، أيوه
بس كمان عندنا قلب، عندنا رحمة
والمهم منسكتش، نتحرك، نعمل حاجة، ولو قليل
تحيا مصر