يوم من حياتي في العيادة.. النفسية

شاءت الأقدار أن أقضي يوما طويلا جدا من الساعة العاشرة صباحا حتى السابعة مساءً عند عيادة الدكتور هادي خشبة، أخصائي الأمراض النفسية والعصبية، ومحدش يسألني ليه!
فيه 3 حالات من العشروميت حالة اللي كانوا موجودين اتكلمت معاهم، أو هما اللي قرروا يتكلموا معايا، اتعلمت منهم حاجات بديهية بس من كتر ما هي بديهية مكنتش أعرف إنها ممكن تكون مهمة أصلا.
شخص 1 : أنا أحمد! هاي.
أنا: ....
أحمد : على فكره أنا بكلم حضرتك..!
أنا: أهلا
أحمد: أول مرة؟
أنا: أول مرة إيه بالظبط؟
أحمد: تيجي عند دكتور صبحي.. شكلك كده! بصي أنا حاسس إني متطفل وانتي مش حابه تتكلمي براحتك!
أنا:.....
أحمد: تعرفي.. أنا معنديش أي حاجة! والله ! بس معنديش أصحاب! محدش قادر أثق فيه! تتخيلي أنا باجي هنا بس عشان اتصاحب على دكتور واتكلم معاه، أنا بدفع تمن صحوبيته ليا وهو عارف.
الممرض: أستاذ أحمد اتفضل!
ودخل أحمد وسابني مصدومة.. صديق مأجور؟ ادفع فلوس بس عشان أتكلم؟ إيه اللي ممكن يوصل حد إنه يفقد الأمل في الإنسانية للدرجة دي؟
اللي بعده!
دخلت بنوتة شكلها بالكتير قوي خمس سنين ومعاها مامتها، الأم كانت بتخانق دبان وشها قعدت تستعجل الممرض وطلبت تدخل بنتها كشف مستعجل!
بصراحة أنا كان فضولي هيجنني واحدة عندها خمس أو حتى ست سنين.. اااااايه المشاكل النفسية اللي بتواجهها اللي تلزمها تستني دورها في مكان ممل زي ده وأمها بتستعجل الكشف بالطريقة المريبة دي!
لقيت الأم مركزة معايا، فقلت أقطع نظراتها المبهجة ليا وأسألها ...
أنا: هي عندها إيه؟
الأم: سلوكها! مش طبيعي! مبتسمعش الكلام في أي حاجة! محتاجة إعادة تأهيل وتربية!
أنا:.....
الأم تستكمل عااادي! متجاهلة نظرة الازبهلال اللي على وشي: إنتي عارفة أنا قريت في مجلة إن الأجانب بره بيودا عيالهم لمتخصص نفسي من وهما صغيرين قوي عشان يخليهم مظبوطين ومعندهمش مشاكل لما يكبروا.. بس أنا جيت متأخر شكلي!
أنا: هي اسمها إيه؟
الأم: هدى
أنا: هدى عندها كام سنة؟
الأم: خمس سنين وهتم الستة كمان شهرين!
أنا: هي في حاجة معينة إنتي شايفاها مش طبيعية ومحتاجة متابعة مع دكتور؟
الأم: لأ بس مثلا ياما ضربتها على الشخبطة على الحيطة ومفيش فايدة مهما زعقت أو ضربت بترسم من ورايا! وبرضه الأكل مبتكلش الأكل اللي بعمله وبتقول مش بتحبه! الحاجات دي لو مظبطتش من وهي صغيرة هتسوق العوج..
أنا:... ربنا معاكي
- صمت
البنت بتحب ترسم وده شيء عادي! ومبتحبش أكل أمها و ده برضه شيء عادي! أنا مش متخصصة نفسية أحكم على كل شخصية واتفزلك! بس حقيقي الأهالي ممكن يكونوا سبب في عقدة بدون قصد، الأم دي جهلها موديها في داهيه! شافت معلومة وقررت تطبقها زي ماهي شايفاها وشافت موهبة ممكن تنميها بشكل إيجابي لشيء سلبي بتمنعه بالضرب والعنف! وكمان فرضت ذوق في الأكل على طفلة لم تتعد الخامسة من عمرها! والدكتور اللي بياخد فلوسهم ده ابن كلب وأكبر مستغل لجهل الأم وقلة حيلة الطفلة!
اللي بعده!
شخص 3: أنا اسمي سهام إنتي اسمك إيه؟
أنا: سارة
سهام: بس انتي أول مره تيجي هنا صح؟ أنا أول مرة أشوفك.
أنا: آه
سهام: أنا مش مجنونة! وانتي كمان شكلك مش مجنونة، إنتي عارفة أنا بقالي كام سنة باجي هنا؟
أنا: صمت صمت صمت صمت
سهام : حوالي 8 سنين! اتعودت عليه! أنا بحبه قوي ومتأكدة أن في يوم هيحس بيا ولو محسش، كفاية إني بحبه وبشوفه كل ما بعوز !
أنا: (في سري) لا لا لالا كده كتيييير.. حاولت أمسك نفسي من إني أسألها بس بجد بجد معرفتش!!
حضرتك بتحبي الدكتور؟ هو ده بس السبب اللي بيخلي حضرتك تيجي بقالك 8 سنين؟؟
سهام: آه والله و كل ما ألاقي بنوتة حلوة زيك أو حتى ست كبيرة حلوة آجي اتعرف عليها وأعرفها بنفسي عشان تعرف إن الدكتور ده تبعي أنا هههههه
أنا: لا متقلقيش أنا مش داخلة للدكتور ولا ليا دعوة بيه اطمني!
سهام: أمال جاية ليه لمؤاخذة؟
أنا: دخلت العيادة بالغلط وكنت حرانة فقعدت في التكييف! باي باي يا سهام
......
ملخص اليوم العسول ده: الأهل، الصحاب، والحب نعمة.
أحمد وسهام بحكايتهم الصغيره دي بيقولوا حاجات مهمة قوي لو فهمتها لوحدك، ألف مبروك إنت إنسان بتفهم وبتحس و فلة شمعة منورة، و لو مفهمتش؟ ابعتلي رقمك هديك عنوان الدكتور هادي خشبة ولازم تروح فورا!
الأهل.. كلمتين ورد غطاهم! عيالكم مش غلطة وبتتصلح وبيتجرب فيها، عيالكم أمانة وتجاربكم الشخصية اللي عشتوها مش شرط تتوهموا إنهم هيعيشوا زيها والتجارب اللي بتقروها في المجلات، عيالكم مش حقل تجارب.. كفاية.. شكرا.. باي!
ملحوظة معروفة: تم تغيير الأسماء الحقيقية للحفاظ على خصوصية الأشخاص.