قواعد التعايش كزوجة

الفنانة نانسي عجرم غنت أغنية أثرت فى كل أنثى على كوكب الارض وقالت "فى حاجات تتحس ومتتقالش فى وان جيت اطلبها انا مقدرش " أحب أعلق على كلمات الاغنية وأقولك غلط يا فنانة!
الرجالة ما ينفعش معاهم فكرة "فى حاجات تتحس" دى أبداً، عارفة ليه يا ستى؟؟ عشان هم مالهمش فى قصة التلميحات و"انت عارف انا زعلانة ليه" والمعانى الخفية للمفردات زى "مفيش وهو في، أو براحتك وهو مش براحته خالص" بتاعتنا كإناث.
الراجل بطبيعته لا يعلم كيفية التعامل مع الامور ببواطنها، بمعنى أصح مع خبايا ودقة التفاصيل التى تستطيع الانثى ملاحظتها والتعامل معها ببساطة.
فى كتاب "Men are from Mars, Women are from Venus" للكاتب الدكتور جون جراى تناول فكرة أن كلا الجنسين من كواكب مختلفة، ففكرة الكتاب تتلخص فى أن النساء يفكرن بمشاعرهن على عكس الرجال الذين يفكرون بأدمغتهم العملية البحتة.
قياسا على ذلك حياتنا اليومية كجنسين مختلفين وكيفية تعاملاتنا و تناولنا للامور وحدث ولا حرج عن كم تلك الاختلافات الهائلة فى كل تفاصيل الحياة بدءا من "فتح عيوننا للاستيقاظ وحتى أغلاقها للنوم مساء".
فانصيحتى لاى أنثى، ما تفتكريش إنه حيفهم التلميحات أو الطرق الغير مباشرة للتعبير عن إحتياجاتك وآرائك. اللى عايزاه قوليله عليه على المكشوف من غير لف ولا دوران. أفتكرى هند صبرى فى فيلم أحلى الاوقات "عايزة ورد يا إبراهيم و متقوليش كيلو الكباب أحسن من الورد!!"
الخلاصة: عايزة حاجة قوليها ومش مرة واحدة، لا، أكتر من مرة! هاتلى كذا.. أعملى كذا.. خرجنى.. أشتريلى.. عايزة هدية فى عيد ميلادى... خليكى صريحة و مباشرة عشان ما يبقلهوش حجة إنه مافهمش تلميحاتك أو صعب عليه ترجمة طلاسم معانى كلامك الخفى، وسلمى بقصة إنهم فعلا ما بيفهموش غير كلامنا المباشر.