خطاب الرئيس الشهري

وحشتنا طلتك علينا يا ريس، هذا هو لسان حال المواطن المصري البسيط الذي عاهده الرئيس السيسي على المصارحة والشفافية من خلال لقاء شهري يتواصل فيه الرئيس مع المصريين، يحدثهم بكل صدق وأمانة حول همومهم ومستقبلهم.
المواطن يتساءل: يا ريس عارفين إن مشغولياتك ومسئولياتك كتيرة، بس مش العهد الوعد اللي فخامتك قطعته على نفسك أمام ال90 مليون مصري لما انتخبناك رئيس لجمهورية مصر العربية، مصر الثورة ومصر الأمل والمستقبل، واللي سيادتك وجيشنا الباسل صمام الأمان والسلام لينا من مؤامرات الإخوان والإرهاب.
يا ريس.. عارفين إن مشغولياتك كتير، وقدامك تحديات ومسئوليات تثقل كاهلك، بس ده مش سبب إن تحرمنا من طلتك علينا، الطلة اللي بتشفي صدورنا، إوعى يا ريس زحمة الدنيا وأبهة الرئاسة تنسيك أخوك وابنك وأمك وأختك من أبناء مصر البسطاء، اللي إنت أمل ليهم ونور عينهم زي ما احنا نور عينك.
عارف يا ريس، إنتا بالنسبة لينا إيه؟ إنت رب الأسرة، كلنا عارفين إن مصر كانت بتغرق، والمؤامرات كتير، وما زالت مستمرة.. كلنا يا ريس لامسين مجهوداتك الكبيرة علشان مصر ترجع على الساحة الدولية، بتبذل قصارى جهدك لتستعيد مصر مكانتها بين دول العالم، كل ده نضرب لفخامتك تعظيم سلام.. بس متنساش يا ريس جوا البيت المصري، إنه ده الأهم، خليك معانا تدينا الأمل، ونعاهدك إن نكون في عونك، ودراعك علشان بلدنا تنهض من كبوتها.
مع احترامي يا ريس لكل من يقولك إن الخطاب الشهري ده، لا مبرر ليه، وإنه اختراع مصري، متصدقهمش لأن إنت بالنسبة لينا كبير وكتير أوي، متصدقش اللي بيقولك إن عرض الخطاب التليفزيون أمر خاطئ، ده بيبعدك عنا.. خللي بالك من أبواق الإعلام الكاذبة، والحاشية والبطانة اللي بتخطفك من المواطن المصري البسيط، إنت منا يا ريس، إنت إبن البلد الأصيل، متخليش كلامهم يدخل بلدنا في حسبة برما، ويكون الكرسي وبريق السلطة سبب في بُعدك عنا وبعد الشعب عنك.
طل علينا يا ريس وماتنساش إن الوعد عهد وميثاق.. ماتنساش إن إحنا بنحبك، مش عايزين نحس إنك مخبي علينا حاجة أو خايف تصارحنا بالواقع.. أرجوك يا ريس كلمنا وطمنا، مش كفاية إن نسمعك في مداخلة في برنامج تليفزيون بالصدفة، طمنا وطمن الشباب، الشباب اللي بيخاف على روحه إن يتقبض عليه بسبب حرية الرأي اللي وعدتنا بيها، على فكرة يا ريس مش كلنا بنتفرج على برامج التوك شو، وحضرتك عارف إن كنا بنتفرج فيه كام برنامج توك شو مش كلنا بنتابعه، ومش كلنا عنده وصلة أو اشتراك.. كلم شباب الألتراس، وإسلام جاويش، في الخطاب الشهري وكلم وصارح شباب مصر من خلاله، من شاشة تليفزيون بلدنا تليفزيون الدولة، تليفزيون مصر.
متزعلش مني يا ريس، وعتابي ليك ده عتاب الابن لأبوه، فخامتك رب البيت.. اوعدني واوعد أبناء مصر إن إنت معانا على طول، وفرحنا بطلتك علينا في الخطاب الشهري.