أفندم. أفندمين يا أخي. تقليدك لصوتي أفشل حاجة عملتيها في حياتك. كل الناس بترد على التليفون برقة. ألوه يا دكترة هي ابتسامة الترحيب اللي بيقابل بيها الواحد الناس اللي بيحبهم. زي خطوة عزيزة يعني، أو آنستم وشرفتم. أو إيه النور دا كله؟ إلا انت، زي عسكري الدورية: أفندم! مش ناقص غير انك تقول: هع! مين هناك؟ مافيش فايدة! عمرك ما حتتغير. عرفت خلاص أنا مين؟ من أول لحظة. طب أنا مين؟ سعاد. سعاد مين؟ زوزو. يا سلام! لسة فاكر صوتي؟ إنتي بتتكلمي منين؟ من بقي. هههاهاهاهاها! أخبارك إيه؟ إنتو اللي أخباركو إيه؟ بنحاول نخلي بكره أحلى شوية. مستحملين إزاي الشتا اللي عندكو ده؟ بنتدفا على أفلامك. لغاية دلوقت بتشوفوها؟إلا ليه مقالاتك مش زي زمان؟ مش زي زمان إزاي؟ مغمومة. إنتي متابعاها من عندك؟ أيوه امال. أنا صاحبة صاحبي. ما تتوهنيش في الكلام. ليه مقالاتك مغمومة كده؟ مانا طول عمري مهموم. دلوقتي مغموم. مش بس مهموم. ممكن تحكيلي عن المشهد الأخير في حياتك. إيه اللي حصل بالظبط؟ ما باحبش افتكر اللحظة دي. كل الناس هنا بيعتقدوا إن الحكاية مش انتحار. الناس في مصر دايماً قلبهم ما بيكدبش عليهم. لكن مين اللي عمل كده؟ إيه الدوافع؟ إنت عارف. كنت على طول شايف اللي جواي كويس. يا هل ترى لسة شايفه؟ ما تبقاش انت لو مش شايفني كويس من جوة. على ما أظن. زعلت عليا؟ مافيش حد ما زعلش. الدنيا كلها لسة لابسة أسود. كبة! أنا باسألك: إنت بالذات، زعلت عليا؟ أوعدك إن انا مش حانشر حاجة. بس قوليلي: الست اللي كانت ساكنة معاكي ليها يد في المسألة دي؟ خلاص! كفاية كده. مش عاوزة افتكر اللحظة الرهيبة دي. ما تنساش تسلملي على اصحابنا كلهم. فاكرة كانوا بيعملوا إيه لما بيشوفوكي؟ إلا قل لي: إزي البلد؟ زي مانتي شايفة. بخير بالرغم من الإرهاب. عمري ما سألتك عن حاجة وريحتني أبداً. مكالمتك دي كانت بالنسبالي زي الزلزال. ما كانش حقي اتكلم. مش كده؟ بالعكس. كل الحكاية إنها لخبطتني أكتر مانا متلخبط خلقة. أمال ليه كنت تملي تقول لي إنك الوحيد في أربع أجيال اللي ما وقعتش في حبي؟ هههههههه! على فكرة: عمري ما صدقتك في الحكاية دي. الفنانة ما سابتش حتة جواي فاضية للست. سم كده! هو انا مش حلوة ولا إيه؟ زي القمر. غصبن عنك. ههههههه! قابلتي عمار؟ أيوه. استقبلناه في المطار أنا وصلاح جاهين ويحيى العلمي ونجم. إزيهم يا ترى؟ كلنا مشتاقين ليكم. بوسيهملي. أدفع نص عمري واعرف إنت قلت إيه لدستور 30 يونيه؟ لأول مرة في حياتي كلها اقول نعم لحاجة. عشان كده باسألك. هم مش عملوا حق التصويت للمغتربين في الخارج؟ طب ماحنا مغتربين كمان في الخارج. حتكلميني تاني؟ حسب الظروف! مش عارفة حتصدقني ولا لأ: دي أول مكالمة أعملها من هنا. حاستنى مكالمتك. أحلف لك إني حاحاول. أرجوكي. سلام دلوقتي. باي باي. ليه بسرعة كده؟ ما اقدرش اقول لك. يمكن بعدين تحكيلي؟ صعب. باي باي يا سعاد. باي باي.